Homily By Rev. Fr. Paul Muan Lian (March 25.2022, Fri)

Lk 1: 26-38
Tuni Lungdamna Laisiangtho sungah Vantungmi in Tonu Maria kiangah thu a zaksakna thu I sim hi. I Pawlpi in Vantungmi in Tonu Maria thu a zaksakna Pawi lianpi khat hong kham sak hi. Hih pawi lianpi I bawlna in Pasian takpi mihing hong suahna hang ahi hi. Hih pawipi, hi thu piang in leitung tangthu sungah a lamdang pen thupiang ahi hi. Bang hang hiam cih leh Pasian takpi in mihing suahna hong lakna pawi ahi hi.Tua ahih manin a kha in sim to leng, hih March kha pan in a kha (9) na ciangin Tonu Maria sungpan Topa Jesu hong suak khia hi cih thu zong eite in I mu hi.
Hih pawi I bawlna in Tonu pawi bek hilo in Topa Jesu pawi zong a bawl I hi hi. Tua ahih manin pawi nih a kigawmin a bawl I hi hi ci-in Pope Paul VI in ong gen hi. Thu in mihing suahna hong la in tua thu in Tonu Maria ii tapa hong suak hi. Tua thamlo in Tonu Maria in Pasian Nu a hong suahna thu zong tuni I phawk ding deih hang. Tua ahih manin Topa Jesu leh Tonu Maria ii pian zia te tuni I lungngaih dingin I pawlpi in ong deih hi.
Pasian gelna a tangtun theih nadingin tuni in Tonu Maria in a nasang ahi hi. Topa Jesu mahmah in Pasian hi napi in amah leh amah kiniamkhiat in, bangmah ahi lo danin hong om in, a kimu lo pan a ki mu thei dingin hong langkhia in, Tothum Pasian khat sungah a kihel Pasian khat ahih amah bangin na khempeuhte Topa ahih hangin amah in ama bawlsa asia thei mihing khat ong hih dingin hong teel hi. Hih in ama vangliatna a kiamsakna hilo in eite hong itna, hong hehpihna hong lahna hi ci-in Misiangtho Leo in na gen hi.
Tuni in I Christian nuntakna ah I etteh ding, I nuntakpih dingin eite khat ciatin zong ki phatsakna, ki liatsakna, ki hihsakna te I nusiat ding ahi hi. Tuni in Pasian takpi in eite tawh hong omkhawm ding, ei mihingte bangin hong om bek thamlo in sila bangin, mi gilo bangin Singlamteh tungah thahna a thuak dongin Pa thu mangin eite hong itna hong lak hi. Tua in ei mihing te in I etteh ding leh I nuntakpih ding thu ahi hi cih I phawk ding ahi hi.
Tonu Maria kiangah Vantungmi in thu a zaksakna hangin tuni in eite in gumpa, honpa I nei hi. Tua ahih manin eite in lungdamna leh lamdang sakna tawh kipakna tawh hi pawi a bawl akham I hi hi. Bang hang hiam cih leh Pasian in ama kamciam mangngilh lo hi. Tonu Maria Pasian nu in hong teel sakna pen eite adingin a lungdam huai ahi hi. Bang hang hiam cih leh Tonu Maria pen a kiniamkhiat Tonu ahi hi. Kei in Pasian sila nu hing, na gen bangin kei tungah hong piang ta hen cih pen ama ii kiniamkhiatna ahi hi. Amah in Pasian tungah upna anei nu, lungsim siangtho nu zong ahi hi.
Tua banah Vantungmi in Pasian adingin a piang thei lo na khat beek omlo hi a cih mah bangin tua in eite adingin a lungdam huai thu, Topa tungah muanna hong piangsak thu ahi hi. Hi thu te hangin eite in tuni in lungdamna tawh pawi I kham hi.
Tonu’ pianzia lungngai lehang, Tonu pen zuthawl a kipiasa nungakno khat hi ci-in Laisiangtho sungah I sim hi. Tua ahih manin amah in mailamah a nuntakzia dingte gelkhol ding, ngaihsun khol ding cih eite in I um hi. Tua ahih manin amah in anuntakna sungah Joseph tawh om khawm ding ahi zongin, inn nupi picing khat hih theih nading ahi zongin ana gelkhol, a na ngeihsun khol khat ahi hi. Ama ii gelkholhna te Vantungmi in thu a zaksakna hangin tuni in ki lumlet mang hi. Amah in ama ngaihsun bang piang thei nawnlo ding cih a theih ciangin bangzah in lung patau in lunghiang ding ahi hiam.
Tonu in alung patua mah ta leh tuni in na gen bangin kei tungah hong piang ta hen ci-in na gen hi. Tua a gen na hangin leitung leinuai, vantung vannuai a om khempeuh in lungdam mahmah hi. Tua ama ii thukimna hangin eite gupkhiatna lampi hong ki hong ahi hi. Tuni in eite in ama thuak haksatna, ama puak vangik te I theihpih kei hi. Ahi zongin Vantungmi in Tonu kiangah thu a zaksakna pawi I bawlna hangin ama itna ahi zongin, ama ki piakkhiatna ahi zongin, Pasian tungah a ki-ap zawhna te ahi zongin eite in I etteh ding ahi hi.
Tua ahih manin Topa Jesu leh Tonu Maria te pianzia te etteh in eite nuntakna sungah kiniamkhiatna, Topa sungah ki piakkhiat zawhna te anei zo semsem Christian te I suahzawh na dingin Topa’n mimal kim khat ciat thupha hong pia ta hen.