Homily By, Rev. Fr. David Lian (March 21.2022, Mon)

Luke 4: 24-30
Christu sung ah kong it thuzui Nu leh Pa, U leh nau te tuni Pasian kammal lung ngai leng laisiangtho masa sung ah pasian in Syria mi Galkap mang pa a hi Naaman natna pan in a damsak nathu ih mu hi. Hih Naaman ih cih pen galkap mang khat hi in, kumpi pa maipha a ngah pa leh gal do siam in galdo na ah zong gualzawh na tampi angah pa a hihi.
Amah in gualzawhna pan in Israel mi numei khat ama inn ah nasem ding in anei hi. Hih galkap mangpa in gualzawhna tampi angah hang in damlo in phaak natna aneipa ahihi. Tua ahih man in a nasem nu in a tonu kiang ah ka topa pen Sameria aa kamsangpa kiang ah ki lak leh ama phaak natna pan dam thei ding hi ci’n a gen ciang in Naaman zong Israel gam ah pai-in kamsangpa kiang ah dam na anget nathu ih mu hi.
Hih bang in apai theih na dingin kumpi Aram in lai na khak sak hi. A laikhak pen Israel kumpi pa’n a muh ciang in banghang a hih bang in kumpipa in kei kiang ah hongsawl a hihiam? Kei in a dam sak thei, si sak thei Pasian hi lo hing. Hih laihong khak pen gam khat leh khat gal ki do na dingin hong khak hi kha ding hi ci -in dah mah mah in a puan te balkek hi. Hih thu kamsang Elisha in a zak ciangin kumpipa kiang ah hih Naaman pen kei kiang hong puak in ci-in kamtai khat sawl hi.
Elisha kiang ah Naaman a tun ciang in, Elisha in Jordan gun ah pai-in sagih vei kisil in. Tua hi leh na natna te dam siang ding hi ci-in gen hi. Tua ahih man in na sem te in Naaman kiang ah pai in a cih bang in gamta in ci-in a gen ciang in Naaman zong pai in gunah sagih vei akisilkhit ciangin dam siang hi ci hi. Tua khit ciang in Naaman in hi bang in lei tung mundang ah Pasian man ka mu kei hi. Israel gam bek ah Pasian om hi cih ka thei hi ci-in apulak na thu zong ih mu hi
Tuni eite ih nuntakna leitung, ihgam ah en leng a dam lo vive ih hihi. Covid-19 a kipan mitampi tak dam lo in natna ngah in mitampi tak in hong sihsan khin ta uh hi. Mi khempeuh pen damlohna panin ki dam nuam tek hi. Tua ahih man in ih pumpi dam nading, ih lungsim dam na ding, ih kha a dam na ding in Pasian kiang a zuan siam te ih hih ding thu pi ka sa hi
Topa Jesu mahmah in adam lo te bek in Siavuan ki sam a, a dam te in Siavuan kisam lo hi acih mah bang in damsiang na hong pia thei, nuntak na hong pia thei Pasian kiang a zuan te ih hih theih na dingin hanciam ni. Topa Jesu mahmah in hih leitung ah hong pai lai in kei-in midik te a sam ding hilo in mawhnei mite kisik nading in kongpai hi acihmah bang in eite adam lo mi, mawhna sung ah a kidiah mi ih hih man in damna hong pia thei Pasian kiang ah zuan ni.
Naaman in kamsangpa thugen mang ahih manin dam na ngah hi. Eite khempeuh zong tuisawp na ih san na hang in dam na ih ngah hi. Tua in bang dam na hiam cileh mawhna pan siangtho na, Pasian tawh ki zop kik theih na te hi. Tuisawpna ding tui te pen thupha ki pia hi. Tua tui pen na dang te sang siang lo zaw thei mai ding hi. Ahi zong in hih tui in mawh na pan siangtho na, Pasian tawh ki zop kik theihna te hong ngah sak hi cih te hong phawk kik sak hi. Ei RC pawlpi te in mawhsut na te ih nei hi. Tua mawhsutna hang in kha damna. lungsim damna te hong pia hi.
Tuin leitung in dam lo hi, natna, dahna, gal ki do na te tawh ki dim hi hang. Tua ahihman in eite in kiniamkhiat tak in Pasian kiang ah thum in ei leh ih innkuan, ih veng, ih gam sung ah dam na hong piak na ding in amah zuan in, thungen in tha la ni. Topa Jesu in kamsang te pen a ma khua, ama inn, ama gam ah a kisang om lo hi ci hi. Elijah hun lai in zong kum thuum leh kha guk bang kialpi tung in Pasian in Elijah pen meigong Zarepath kiangbek ah sawl in paisak hi ci hi. Elisha hunlai in zong phaak natna nei mi tam pi om mah taleh Syria mi Naaman bekin damna ngah hi ci hi.
Hih bang in thu agen ciang in miten Topa Jesu pen ken ah khiat sut ding sawm uh hi. Ahi zong Topa Jesu pen amau telak pan ki hemkhia hi. Eite sung ah Topa Jesu nisim in hong pai nuam hi. Topa Jesu in a khua pih te it hi, Pasian thu tangko nuam hi. Ahi zong miten sanglo hi. Tuni eite in minam thak, Israel mite ih hihi. Tua ahih man in ei te in Topa Jesu sang ni, ama kammal te nuntak pih ni. Tua hileh Pasian ihsung ah hong teng in na hong sem in, nalamdang tampi te ih mu thei semsem ding hi. Ih gam ah zong ki lem na om thei ding hi. Pasian tawh ih om leh dam na hong pia thei Pasian eite tawh ong om ding hi.
Tua ahih man in ih leitung, ih innkuan, ih gam khempeuh adam na ding Naaman bang in ih om na pan Pasian kiang zuan in paikhia in Pasian thu mangna tawh damna ih ngah na dingin hanciam ni ci-in tha kong pia nuam hi. Lung dam mah mah hi.