Homily By Rev. Fr. Joseph Zo Mung (March 17.2022, Thur)

Lk 16: 19-31
Leitung I nuntakna sungah en kawikawi leng, mihau tampi a om mah bangin, mizawng zong tampi om hi. Tua nuntakna te I et ciangin ahaute leh azawngte kuate eng zaw I hi hiam? Ei te in hauhna leh zawnna koi teel zaw ding I hi hiam cih ngaihsun ni.
Tuni Lungdamna Lai Siangtho sungah mihaupa om zia leh mizawngpa Lazarus ii om zia te Topa Jesu in gentehna in hong gen hi. Mihaupa in manta meel puan leh saihadial puan silhin nisimin noptatin an lim pente ne-in om hi ci hi. Mizawngpa Lazalus ahih leh tua mihaupa ii kong gei ah om in meima vei-in, Uite’ nek an nagawn engin om aa uite in ama meima te liak sak hi ci-in ama ii zawnna pen Topa Jesu in gentehna in gen hi. Atawpna ah amautegel a sih ciangin Lazarus pen Abraham ang sungah tungin mihaupa pen hell gam sungah tung hi ci hi.
Tua ciangin Abraham ang sungah Lazarus a om amuh ciangin mihaupa in Abraham kiangah ‘ka dangtaak mahmah hi. Ka leii dawn ah tui a hong taak na dingin Lazarus ong huh sakin’ ci-in huhna ngen hi. Ahi zongin Abraham in I kikal ah guamthukpi khat om ahih manin ong pai thei lo ding hi ci-in dawng hi. Tua banah inn a om ka sanggamte zong kei bangin a tatsiat loh na dingin, vantunggam a tun na dingun ahilh dingin Lazarus na sawlsak in ci-in huhna ngen lai hi. Ahi zongin tua lai a om mite thu gen te a up kei uh leh Lazarus pai-in a gen hangin um lo ding hi ci-in Topa Jesu in Abraham ii gen te eite tungah, Pharisee mite tungah hilhcianna in hong nei hi.
Tuni I lungngaih dingin bang hangin hi mihaupa hell sung tung hiam? Hell sung a tun na a khatna in Pasian leh mihingte bang kiciam hiam cih leh Pasian tungah upna, muanna a nei te vantunggam tung ding hi. Ahi zongin hi mihaupa upna pen ama sum tung bekah ahi hi. Pasian muang nawnlo in ama neih leh lamh tung bek muang in Pasian deihna zui nawnlo hi.
Pasian in khat leh khat ki-it ding deih hi. Hi mihaupa in ama hauhna pen Pasian kiang pan apai hi aa, mizawngte huh ding cih phawk lo hi. Amah leh a mah ki muangin a gei a om Lazarus huh ding cih phawk nawn lo, Pasian phawk nawnlo hi. Tua in hell sung tungsak hi. Ahauh manin hell sung a tung hi lo-in, ama hauhna tungah amah leh amah ki muangin Pasian muang nawnlo ahih manin hell sung a tung ahi hi.
Lazarus in bang hangin vantunggam tung hiam? Amah zawng mahmah aa, nek ding dawn ding bang mah neilo ahih manin amah in Pasian tung bek ah muang hi. Amah leh amah zong ki muang lo, mite huh ding zong muang zo nawnlo in, Pasian tung bek ah muang ahih manin, Pasian tung bek ah upna nei ahih manin amah vantunggam a tung ahi hi.
Tua ahih manin hauhna leh zawnna in vantunggam tun nading a khaktan hi lo aa, Pasian deihna zuihna leh zuih lohna in vantunggam tun nading a khaktan ahi hi. Tua ahih manin hi leitungah nek ding, dawn ding I nei kei phial zongin Pasian muangin, um lehang ei adingin vantunggam om hi.
Tua ahih manin leitungah Pasian phawklo zah dongin I hauhna te sungah nop I sak luat khak leh hell gam tung ding cih hong thei sak hi. Hell gam I tun khit ciangin zong ki honkhia thei nawnlo hi cih zong tuni Lai Siangtho in hong thei sak hi.
Abraham in nang leh ko kikal ah guamthukpi khat om hi ci hi. Tua ahih manin leitungah I om laitakin kisik theih nading hun ki nei hi. Tu in kua muang I hi hiam? I sum leh paai te bek muang I hi hiam? Mihau leh mizawng tawh bang hangin genteh hiam cih leh mihaute in pen adeihdeih lei zo, a duhduh ne zo, a ut bangin gamta thei, mite tungah thupha bawl nuam leh zong bawl thei, mite a bawlsiat nop leh zong bawlsia zo uh hi.
Tua ahih manin hi leitungah mi a buaisak te pen azawngte sangin ahaute hizaw hi. Ahaute in amau hauhna bang ci bangin zang hiam cih thupi hi. Pasian muangin Pasian deihna banga anungta te in tawntung nopsakna ngah ding hi. Tua ahih manin eite in Pasian deihna I zuih zawh nangin hanciam ni.