Homily By Cate. Joseph Hau Kap (March 3.2022, Thur)

Lk 9: 22 – 25
Tuni Lungdamna Lai Siangtho sungah Mihing tapa in gimna lianpi thuak dinga, upa te, Siampiliante leh Lai Siangtho siamte in amah nialin that dinga, a ni thumni in hing kik ding hi ci-in Topa Jesu in nungzuite kiangah na gen hi. Zanni in leitung bup a om Catholic Christian te in thupi takin Vut siangtho pawi bawlin vut siangtho ki nuhin Piancil Lai Siangtho sungah Pasian in mihing abawl lai-in lei pan hong kibawl na hi aa, lei ah na ciah kik ding hi cih thu lungngai pha in leitung a kip loh zia leh a kip khuapi a zong I hihna te lungngaipha in om na ni-in ki zang hi.
Tua khit nikhat ni ahi tuni in Topa Jesu in a nungzuite kiangah ama sihna ding thu a gen ciangin nungzuite in tel zo lo uh hi. Amau ngaihsutna ah Topa Jesu pen kumpi in hong tu dinga, a Pu David Tokhom luahin Israel mite peuhmah guallel ngei nawnlo ding, Sal tang ngei nawnlo ding, Pasian in ompih tawntung suak dingin a ngaihsut kawmkal uh ah Topa Jesu in tua bangina gen ciangin nungzuite in lamdang sa in a lungsim sung uh ah Topa Jesu kammal tel zo lo uh hi.
Tua khit ciangin Topa Jesu in ka nung hong zui nuamte in amah leh amah ki nialin, a singlamteh ki suanin ka nung hong zui ta hen ci-in gen hi. Ei ii mihing lungsim deihna te nialin Pasian deihna bangin nungta kalsuan ding ci-in, tua lai ah haksat lianpi om hi cih Topa Jesu in ong muhpih ong theihpih ahih manin singlamteh gen hi. Jesu nung zuihna hangin I pumpi deihna te ki dekin, ki nial in a gik mahmah singlamteh tawh a ki bang ahi, haksatna, bawlsiatna te maingat ngam a zui ding cih pen Pasian deihna, Topa Jesu hong hilhna hi. Eima ii phat tuam nading I zon leh I Kha nuntakna te ki sumin ki tan thei ahihna te hong hilh hi.
Mikhat peuhin leitung khempeuh I neih hangin I Kha nuntakna tan lehang bang phattuamna om ding hiam cih ngaihsut huai hi. Hi leitungah mipi misiam I hi aa, mihau mi lian I hi aa, anuamsa pen I hih hangin tua te Pasian kiangah ki masuan thei lo ahihna te phawkin I Kha nuntakna te a zong te I hih ding kisam hi.
Tu in Vua hun hita in Lent ki ci hi. Lent cih ciangin khuakhal a cihna hi. Singkungte en leng a tehluite khia khehin tehno tehthak ni suak hi. Tua mah bangin I mihing nuntakna singkung bangin ngaihsun leng, a beisa hunlui sungah ken bangzah ciangin Pasian maiah bangzah ciang mawhna bawl ka hiam? Ka ngaihsutna, ka gamtatna, ka kampauna, ka gamtatlohna te leh Pasian mai leh mite maiah bangzah ciang milui hikhin aa, anin hikhin aa, a thahat nawnlo ka hih lamte ki enpha aa, Vut nuhni pankipan Vua hun sungin mithak I hih ding, Pasian tawh kilawmta I hih na dingin ki puahphat hun ahih manin hih Vua hun sungah zungthak te I khah na dingin I mawhna te lungngai in, kisikkik in, mawhna dan lohna te bawlin, an tang thungetna te nei-in, thupha tampi I bawl ding hun, Pasian mai leh mite mai ah I cinlohna te ki tel dot aa, ki puahphatna dingin Pawlpi in hong bawlsak ahi hi.Tua ahih manin ei leh ei hoih takin I ki tel dot mahmah ding ahi hi.
Tua ahih manin a tul theilo, a bei thei lo khuapi I tun theih na dingin nuntakna thak tawh mithak suak aa, Jesu sungah zungthak khahin tehno te suaksak in, dawnno te suak sakin, paakhoih, gahhoih te I gah theih na dingin hi Vua hun sungah I gamtatna khempeuh, I sep leh sep loh mawhna te ki sikkik in ki puahpha in I om ding hun hi cih phawkin Topa lam ah ki sek thakna, tha lak thakna, zungkhak thakna te I neih theih na dingin thungen in, antang in thupha te I bawl theih na dingin han ciamni.