Misiangtho John Mary Vianney

Misiangtho John Vianney in 1786 kumin Piantit gam, Dardily khua ah suak hi. Anulepa te pen Pasian ahanciam mahmah te hi. John Vianney Siampi suak nuam mahmah aa, ahi zongin Siampite neih ding zah pilna nei nai lo hi. Tua ahih manin 1809 kumin Napoleon Bonaparte ii galkap sungah lut aa, tua ah kamsiatna ci ding hiam mite muh khialhna te thuak zel hi. 1810 ciangin galkap bupi khat ii phalna tawh galkap sungpan khawlin ciah kik hi.

 Kum 20 a phak ciangin Lyons Siampi sinna sangah lut hi. Theology leh Philosophy sinna in ama adingin haksalua ahih manin sang uk Siampipa in ciah sakkik dingin ngaihsun a, ahi zongin Siadawpa in “Pawlpi in pilna nei te a kisap mah bangin asiangtho mi te zong kisam zaw hi” ci ahih manin amah kiciah sak lo hi. 1815 kum in ama Pasin thu hanciamna leh migitna hangin Siampi suak a, mimal 230 bek aom, khuano khat ahi Ars ah Parish Siampi sem hi.

Tua khua mite in Pasian phawk nawn lo in gamtat sia mahmah uh hi. Amah atun cilin Missa kah pen piteek te bek om hi. Ahi zongin John Vianney ii thungetna leh kidekna hangin asawtlo in khuamite hong kikhelin Biakinn lam hong zuan kik uh hi. Tua hun sungin John Vianney in nasia takin ze-etna thuak hi. Ami kimuhlo pi in aw ging, alupna kilamto cih bangin atuamtuam in dawi in bawlsia hi. Ahi zongin John in daitakin thungetna tawh tua ze-etna te zo hi.

Tua bangin Dawi ze-etna pen 1824 kum pankipan kum 30 sung thuak hi. John Vianney in dawi ze-et na nasia tak a thuak banah Siampi dang te simmawhna zong thuak lai hi. A Siampipihte’ mihai cih na nangawn thuak hi. A hi zongin Siadawpa in “Ka Siampite khat ciatin akibang haina tawm tek nei uh hi ci-in um ing” ci hi. John Vianney in kidekna bawldenin ama kiangah mawhsut apai mite’ mawhnadan dingin amahmah in mawhnadan lohna bawl zel hi. Mawhsutna ngai Siampi in a minthangna leh mite’ lungsim, kha akaihkhop zawhna hangin mitampi ama kiangah hong pai uh hi. Mawh sutna angaih ciangin nikhat nai 14-18 sung tu a, naupangte ading Pasian thusinna nasia tak vaihawm sakin khangno te kicing takin Pasian thu hilh hi. Asawt lam ciangin ama kiangah mawh sut dingin Siadawte, Siampite leh Nungak siangthote nangawn ong pai uh hi. John Vianney in Misiangtho Philomena beel mahmah hi.

Tua Misiangtho tawntawnin thu angetna hangin cinate damsakin, mawhna sungah akidiahte kikhel kik sak zo hi. Na lamdang tuamtuam zong bawl thei ahih manin Siadawpa in phalna ngahlo in na lamdang nabawl nawn kei-in ci hi. Tua zawh khat vei naupang khat singkungtung pan akia suk John Vianney in mukha hi. Anuai tung leh si ding cih thei ahih manin tua naupang pen singkung leh lei kikal ah aom laitakin John in khawlsak aa, Siadawpa kiangah phalna vangenin tua zawh ciangin tua naupang damtakin lei ah koih suk hi.Tua banah John Vianney in mikhat amuh phetin tua mi ii mailam thu ding gen thei hi. Mite in John Vianney pen anungta Misiangtho hi ci-in um uh ahih manin ama puan themte at in, a samzangte bot in, ama zat thungetna lai bu sung alai dalte kekkhia in ahi zongin kem cing uh hi. Tua te in amau lawm le gual te sungah adam lo te dam nadingin hitaleh mawhna sungah akidiahte kikhel nadingin hitaleh azat ding un akep uh hi. John Vianney in pahtawina min cih te nial hi. 1852 kumin Msgr ngah hi. A mah a ki pahtawina Singlamteh leh Diocese lian ah tavuan ki piakna te zong nial hi. 1859 kum in si a, tu ni dong ciang Parish Siampi te a huh Misiangtho in om hi.

“Pasian tungah aplo in nasepna te in amawkna hi.” (St. John Mary Vianney)