Misiangtho Ignatius of Loyola

Eite in Misiangthote’ nuntakziate simin ih kan hi. Bang hang hiam cih leh amau tangthute in eite tha hong pia leh ih lungsim hong thaksuahsak thute ahih man hi. Misiangtho te nuntakzia te a simna hangin Ignatius zong ama nuntakna kikhel hi. Amah in kumzalom (16) sunga asang pen Misiangtho te lak ah khat ahi hi.

Ignatius in 1491 kumin Spain gamah suak hi. Gal kidona khat ah thau khakna hangin anungzang leh akhe ah liamma nasiatakin ngah hi. Tua. ahih manin amau innkuan neih innpi khat ah omin aliammate adam dongin kibawl hi. Tua hun sungin Goberto Vagad pan Spain lai tawh aki-at ahi, “The Golden Legend” a ettehhuai mi cih thulu anei tangthu bu khat sim hi. Tua tangthu sunga Misiangtho te in ama lungsim la zo hi. Tangvalno galkap khat ahi Ignatius in nidanglai galhangte ii upna tungah akinga alungsim uh leh athupitna te uh amaute’ nuntakna sungah mukhia hi. Adam kuan, thadim nading atawlngat hun sungin Pasian vangliatna athang nadingin galhang khat hihnain athupi minthanna khat hi ci-in hong ngaihsun hi. Tua ahih manin amah in ama gamtat\luhek ahoih lamah akhantoh nading leh Misiangthote’ nuntakzia te etteh in nuntak nading khensat hi.

Thau khak na hangin akhe kitan ahih manin tawmvei sung khebai in om hi. Akhe dam kikin lam apai kik zawh ciangin The Catalonian Shrine of Our Lady of Montserrat ah pawi simin pai hi. Ama sim tangthu sunga galhangte gamtat luhek bangin Ignatius in tua munah zan khat sung tawntung ahun bei sak hi. Azingsang ciangin ama puanhoihte agei a om pawisim khat ii ippi tawh aki bawl puan tawh kikhel in silh hi. Ama namsau leh temta te Pasian tau tungah koih hi. Azing ciang pankipan amahkia bek om in Pasian thu lungngaihna kha tampi sung nei-in alamdang, athuthuk leh atheih huai Pawlpi thu leh Pawlpi sunga apiang thu tampi te thei in mu hi.

Ignatius in Topa Jesu ii lungdamna thu lunglut mahmah aa, tua lungdamna Lai Siangtho sunga munte ah pai kawikawi in thunget nopna lungsim nei hi. Siampi suah nopna lungsim damdamin akhangtoh hangin akisam laitan aman nei nailo hi. Tua ahih manin University of Paris ah Latin lai sin kipan hi. Tua sang a om alawmte (6) kaikawmin kipawlna khat phuan aa, tua kipawlna in Jesuit congregation akipatna hong suak hi. 1540 kumin Jesuit congregation in Roma pan kipsakna ngah hi.

Ignatius in alawmte tawh Christian Pawlpi akhantoh nadingin alauhuai mun leh gam te ah zong pai-in Pasian thu tangko ding akigingsa in aom na uh pulaak in Pawlpi ii nasemte ci-in anuntakna uh kipiakhia uh hi. Tua hun pankipan Jesuit congregation pan pawlpi ading in anuntakna uh apiakhia mi hong khang semsem hi.

Ignatius in Spiritual Exercise cih kha nuntak lamlak laibu khat gelh hi. Tua laibu in kha nuntakna ah tha hong pia takpi lamlak khat hi aa, Christian tampi te in tua laibu zangin thungetna leh Pasian thu lungngaihna te tawh kha tha la in om uh hi. 1533 kumin Ignatius in kaal (4) sung, Pasian thu lungngaihna kipan hi. Tua banga kaal (4) sung Pasian thu lungngai zolo te in zong Ignatius ii Kha lam tawh kisai lamlak laibu simna pan thala in khantohna tampi ngah uh hi.

Ignatius in “vakna, lam siauhna leh taina te in pumpi adingin khut leh khe te phattuamna hong pia hi. Tua mah bangin kha lam tawh kisai Exercise te in mihing ngeina kingaih luatna te pan ih kha suahtakna hong pia in ih nuntakna ah Pasian in hongsepsak nop nate hong mu sak hi” ci-in gelh hi.

1556 kumin Ignatius in thakhat in si vat hi. Amah asih hunin Jesuit congregation ah mi 100 val ta hi.