Misiangtho Emily de Vialar

Misiangtho Emily de Vialar in Piantit gam, Gaillac khua-ah 1797 kumin suak aa, nau pasal nih nei hi. A tung pankipan siangthona akiplet khat hi a, van hoih tuamtuam te zang lo in limlangh ki-et nangawn kidek hi.

Emily in kum (7) a phak hun ciangdong, amau khua-ah pilna sin in tua pan Paris khua, nungak siangtho sangah pilna sinin om hi. Emily kum 15 aphak hunin a nu si aa, tua ciangin amah a khua-ah ciah kik in a Pa’ makaihna nuai-ah om hi. A Pa in Emily pen pasal khat tawh gawm nuam ahih manin apa leh ama kikal ah haksatna hong piang hi.

Emily in pasal neih ding ngaihsun zo lo ahih manin apa’ vaihawm sakna anial ciangin apa heh semsem hi. A diakdiak in Emily in a cimawh naupangte lai a hilhna leh ci-na te ahuhna hangin a Pa lungkim lo diak hi. Emily in amah teenpih dingin a dong te khempeuh nial in asiangtho nuntakna tawh midangte ading nasep nadingin khensatin Pasian tungah ki-ap hi.

Piantit gal ki do na hangin a kisia ahi, pil sinna, cidamna leh haksatna nam tuamtuamte, puahthak kik ding pen Emily in lunggulh mahmah hi. Apu in apiak neih leh lam te tawh Gaillac ah inn khat lei-in numei no thum ii huhna tawh naupangte pilna lam ah lapsangna leh ci-na te huhna te ki pan uh hi. A sawt lo in amaute kiangah mi giat hong ki behlap uh hi.

 Siampipa’ panpihna tawh 1833 kum March kha pankipan amaute in nungak siangtho suah ding hong hanciam uh hi. 1833 June kha ciangin numeino 26 te in Gaillac khua-ah hong kikaikhawm uh aa, 1835 kumin nungak siangtho dingin kiciamna nei uh hi. Amaute’ kipawlna min dingin The Congregation of the Sisters of St. Joseph of the Appiration (SJA) ci-in phuak uh hi. Fr. Louis Mercier in amaute huh denin amaute’ kha lamlak Siampi zong ahi hi. Haksatna tampi a thuak uh hangin thu ngetna tawh ki-ap in kalsuan uh aa, Pasian in thupha pia hi. Tua nungak siangtho te’ Constitution pen Misiangtho Emily in 1835 kumin kipsak hi.

Misianghto Emily ii phuat nungak siangtho te in a diakdiakin tagahte kepna, naupangte pilna lam ah panpihna, ci-nate khoina cih te tawh Pasian na sem uh hi. Emily a sih hun ahi, 1856 kumin Congregation khat phuankhia zo in Nungak siangtho sang (40) zong leitung gam tuamtuamah phuan zo hi. Emily pen 1951 kumin Pope Pius XII in Misiangtho in tangko hi.

Emily ii anunung kam vaikhak in….“khat leh khat na ki-it un. It na in ngaihsut hoih neihna leh a hoih deihsakna bek hi lo-in sepkhiatna kisam hi” ci-in gen hi.