Misiangtho George

St.George, Lydda khua ah a suak hi. Rome gam-a galkap thunei ulian khat a suak hi. Diocletion kumpipa gam a luah Galerius in Catholic Pawlpi tawh kisai thupiakna laite a hawmkhia dingin ngaihsutna a pia hi. A thupiakte 1.Galkap khempeuh in kumpipa bia ding uh a, biak ding a nial peuhmah a nasepna pan kitawpsak ding i, 2.Biakna tawh kisai laite Pasian laibute leh thungetna laibu khempeuh kaikhawmin haltumna ding leh biakinn khempeuh zong haltumna ding thute ahi hi. Tua tham loin kumpipa pen gimnamtuite tawh pahtawina bawl ding, a nial peuh that ding, cih thute thukhunin neih dingin thu a pia hi.
     St.Ambrose in St.George thu hih bangin a gelh hi. George in Jesu Topa tunga a ciampello galkap khat ahi hi. Mi dangte in biakna sungah a om uh hangin laupipi-in Pasian a bia hi uh-a, St.George ahih leh amah bek in Topa Pasian min hangsan takin genkhia ahih manin Pasian thupha a kicing takin a ngah hi, galte bawlsiatnate a thuak dingin a kigingsa-in a om hi. St. George in Catholic thuzui mite aadingin kumpip mai-ah hehpihna ngen dingin khentatna a nei ngam mi khat ahi hi, a ci hi. George in ama neihsa leitangte zuakin mizawngte a pia hi. Ama ngimnasa bangin kumpipa tawh va kumu-a thuzui mite aading a ngetsak ciangin thahna a thuak zenzen leh ama luang, Lydda khua ah a vuina ding a genkhol hi.
    Kumpi Diocletion omna Nicomedia khua ah St.George va pai a, kumpipa mai-ah amah Christain khat ahih lam hangsan takin va kipulaak a thuzui mite suahtakna dingin hehpihna va ngen hi. Tua ciangin George na kiman pah-a kumpipa biak dawi a biakna ding leh a biak nop kei leh a ngawngtan dingin thu a pia hi. Hih thu tawh kizui-in AD 304 kum April (23), Good Friday ni-in ngawngtanna a thuak hi. A luang pen ama deihna bangin a lawmte in Lydda khua ah vui uh a, a han tungah lingpak kung a suan uh hi.
    Kum tawm khat khit ciangin Diocletion kumpipa leh amah a laih Galerius te hong si uh hi. Constantine kumpipa hong kah ciangin Christain thuzui mite suaktatak-a Pasian biak theihna thu pia a, St. George ngawng a kitanna munah a gol mahmah Basilica biakinn khat a lamsak hi. Hih thu tawh kisai a theihhuai thu in a nuai-a bang ahi hi.
    Gal kidona ah gal a zo Constantine, a pa pawl dang hi a, a nu pen Catholic thuzui mi khat ahi hi. Ama gam do dinga a hong kuan a galte thahatna thei ahih manin Pasian a muang hi. A pa biakna a muan hangin kilamdanna a om kei hi. Tua hangin a nu kiangah huhna a ngen hi. A galte in a hong neh mahmah lam a thei uh hi. Tua bangin amaute in a cihna ding uh thei loin a om laitakun Singlamteh dial khat (flag) te tawi kawmin galdo le-teh gal na zo ding hi, ci-in lai kigelh laigual leh singlamteh lim hong kilak na lamdang a mu hi. Tua pen galkap om khempeu in zong mu uh ahih manin singlamteh dial khaite bawl pah uh-a galkapte in tawi kawmin a va do uh leh a zo gawp uh hi. Ahi zongin Constantine kumpipa in Singlamteh thu a thei kha ngei nai kei hi. Tua ahih manin a nu Helena kiangah a dong hi. A nu in Singlamteh tungah sihna a thuak Jesu Pasian, Honpa Topa pen Catholic-te biak Pasian Tapa ahih lam a gen ciangin Constantine in tua Singlamteh a va zonsakna dingin a nu kiangah huhna a ngen hi. Sum leh paii a bei khempeun zong ama sik dingin a gen hi. Hih vaipuak khempeuh a nu in a vekpi-in a sep khit ciangin Kumpipa Constantine, thuzui mi hong suak bek tham loin ama ukna gam zong Christian gam a suaksak hi. Ni danga a bu mite zong suakta takin Pasian a biasak hi.
    St. George min pua biakinn tampitak zong a kilam hi. St.George in biakna aadinga a lah ama hangsannate a thei khangnote in zong amah bangin Jesu Topa tungah a upnate uh a khang semsem hi.