Vut Siangtho Pawini. Homily By Rev. Fr. John Pau Sian (2.3.2022, Wed)

Mk 6: 1-6,16-18
Tuni pen Vut siangtho kinuhni hi a, Vua hun kipatni zong ahi hi. Tua ahih manin ei Catholic Pawlpi sungah vut siangtho ki nuhna in bang hong lak hiam cih leh I mawhna te kisikkik aa, mailam ah nuntakna thak tawh I nuntak zawh nang ki puahphat na hun ahi hi. Mawhna kisikkikna in ki dekna neih ding a kisam ahi hi. Thunget ding ki sam hi.
Adam leh Eva te in mawhna a bawl ciangin Pasian in mawhna dan na pia pah lo hi. A kisikkik nang un hun na pia lai hi. Thu tampi na dong lai hi. Ahih hangin amau te in amawhna uh ki siklo in khat leh khat na mawhsak uh hi. Ahi zongin tuni Vut siangtho ki nuhni in eite in I mawhna te I ki en kik dinga, kisikkik na tawh Topa aw, ka mawhna te hong maisak in ci-in I thum na dingin Pasian in hun tampi hong pia hi.
Tua ahih manin hih Vut siangtho kinuhni pan ni (40) sung, pumpi kidekna te nei-in, thungetna, an tanna te tawh Pasian kiangah I kileh kik nading kigingna ahi hi. Hi kigingna ii a khiatna bang hiam cih leh Topa Jesu ii gim thuakna, singlamteh tungah a sihna, tua khit ciangin sihna pan hong thawhkikna Pasca pawi ading kigingna ahi hi. Na khat I hih ma in kigingna ki nei den ahih manin hoih tak kiging leng tampitak nuamtuam ding hi.
Ni (40) sung Vua hun I neihna zong pen, Moses in Sinai mual tungah ni (40) sung thungen in Pasian tawh ki ho aa, Pasian in zong thu kham nam (10) suangpek na pia lai hi. Topa Jesu in zong lungdamna thu a tangko ma in ni (40) sung, gamsungah om in a Pa tawh a ki ho ahi hi. Tua ahih manin eite in hi Vua hun ni (40) sungah pumpi kidekna te bawlin Pasian tawh I kinai na dingin I hanciam hun ahi hi.
Hih Vua hun sungah eite kidekna te pen mailam ah hong pai ding I nuntakna thak sungah Pasian tawh ki pawl aa, Kha Siangtho makaihna sungah nuntakna thak tawh I kalsuan zawh na dingin eite in I hanciam ding ahi hi. Lai Siangtho nihna sungah eite pen Pasian ii thupuak te I hihna I mu hi. Tua ahih manin Pasian thupuak eite in Pasian deihna tawh ki tuakin Pasian kammal te mite tungah I puakzawh na dingin I lungsim thupi masa hi. Ih lungsim Pasian tawh a kipawl theih nading, Ih lungsim sungpan kiging leng eite gamtat kampauna te Pasian deihna tawh a ki tuak pan ding hi.
Ki khelna pen eite lungsim pan hong pai masa hi. Lungdamna Lai Siangtho sungah na thungetna te uh mite muh dingin hanciam kei un. Kong khakcip unla, Pasian muhna ah thungen un. Na thupha bawlna te uh zong na taklam khut in a bawl thupha pen na veilam khut theisak kei un ci-in Topa Jesu in hong hilh hi. Cihnopna ah eite nasepna te, Pasian kiangah I ki piakkhiatna te pen Pasian tawh kinai nading hi aa mite phat ding deihna hilo hi.
Tua ahih manin hi Vut siangtho kinuhni pankipan in eite ii hun te, pumpi kidekna te Pasian ap in, Topa Jesu ii gimthuakna te, Topa Jesu in sihna pan hong thawhkikna Pasca pawi ading I kiging zawh nangin han ciam ciatni.