Topa tungah ki-ap in thu ngen ni

Tuni Lai Siangtho masa in mawhna pen mihing khat ciatin I bawl hi-in, bang bang hitaleh eite in kisikkik in Pasian kiang zuanin hi lehang, Pasian in I mawh I khialhna te phawk nawnlo in, I hoihna te bek mu in eite hong honkhia hi cih hong hilh hi. Pasian tawh kalsuanna pen thupi pen hi cih hong musak hi.
Lungdamna Lai Siangtho sungah “Note’ hoihna pen, Pharisee te sangin a liat zawk kei leh vantunggam na tung kei ding uh hi ci-in Topa Jesu in hong gen hi. Pharisee te in amau’ hoihna, dikna te tawh vantunggam ngah ding ci-in um uh hi. Ahi zongin Topa Jesu in tua upna, muhna nial hi. Mihingte I dikna, I phatna pen thukham tung bek hilo in lungsim hoih, lungsimpha neihna, I kiim I paam a om mite, I lawm I gual, I sanggamte, I pawlpi mite tungah bangzahta in dik zo, bangzah in hoih zo cih nakpi in thupi hi cih ki mu thei hi.
Hih Lai Siangtho sungah hehna in eite hell khuk sung hong tung sak thei hi cih ki mu thei hi. Pasian tungah hehna, I sanggamte tungah hehna, mite tungah hehna, tua hehna te khempeuh in eite Pasian tawh hong ki gamla sak thei hi. Eite thungetna Pasian in hong sang nangin bang kisam hiam cih leh khat leh khat kilemna thupi hi. Khat leh khat ki muhdahna, ki thangpaihna te Pasian in a deihloh lam hong mu sak hi.
I sanggamte, mite I muhdah khak leh ki-it zo nawnlo hi. Tua ahih manin mite I muhdah khak loh na dingin bang kisam hiam cih leh I lungtang sunga hehna te, I kampauna, I gamtatna tawh I hehna te I kidop ding ahi hi. I kampauna te tawh mite tungah hehna te I pulak ciangin siatna te hong piangsak semsem thei hi. Tua ahih aman I ki dop mahmah ding nakpi takin thupi hi. Gamtatna tawh hehna in a sia penpen ahi hi.
Tua ahih manin Misiangtho Paul ii hong gen, hehnepna tha piakna te phawkni. Eph 4: 20 sungah “Na heh ciangun mawh kei un.” ci hi. Mihingte I heh ciangin I mawhloh ding baih lo hi. Ahi zongin Paul in bang hangin tua bangin tha hong pia hiam? I heh khak leh zong ei leh ei mawhna lam ah I tun loh na dingin kidawm ding ci-in hong hilh nopna hi.
Tua ahih manin eite nuntakna ah I kalsuan zai dingin Pasian Kha Siangtho, Pasian thupha I nget taktak ding ahi hi. I lungsimte I ki kep zawh nading, mite I simmawh khak loh nading, mite tungah I heh khak loh nading, mite I muhdah khak loh nading I ki dop ding ahi hi. (Piancil 4: 6-7) sung mahmah ah hehna in I sanggamte na ngawn hong that sak hi. Tua a hih manin hehna, thangpaihna te Pasian bekin hong hon zo hi. Pasian itna leh Pasian thupha bekin I lungsim sunga a hoihlo te panin hong suakta sak zo hi.
Tua ahih manin eite in I lungsim sungah Pasian I upna te, Pasian I phawkna te, Pasian I zahtakte lungngai in ahi thei pen in a kidawm siamte I hih theih na dingin I kampau, I mukpauna te kidawmin kalsuan ni. Tua hi leh eite Pasian tanu tapa te I suak dinga, hell gam, samsiatna gam tawh ki pelh ding hi hang.
A tawpna ah kum zalom 3 lai a anunta Tusibus ii thungetna tawh ka khup nuam hi. “Kua ma adingin gal hong hisak kei-in, mite tawh a ki tot khak leh zong ong kilemsak kik pahpah in. Mite tawh ka kilem lohna te uh a om leh zong kilem theihna thupha hong pia in. Ka hoihlohna te ka ki puah theih nangin thupha hong pia in. Ka thanemna te ka muh theih nangin thupha hong pia in. Mite hehna, thangpaihna te ka bawl loh nangin thupha hong pia in. Ka kampauna te mite nuamna, mite thalawpna, mite thangahna ahih theih nangin thupha hong pia in. A cimawh mite hehnepna kammal te a pia zo dingin ong huh in. Pasian deihna tawh kituak in nungta zo, Pasian ii lungsim pua mikhat hong hi sakin” ci-in thu a nget mah bangin eite mimal khat ciat zong Topa tungah ki-ap in thu ngen hi.