Singhiang Siangtho Pawi Ni. Catholic Nisim Lungdamna Laisiangtho. 2.4.2023(Sun)

Matthew 26:14-27:66
14. Tua khit ciangin sawm le nihte’ laka Judas Iscariot in siampi makaite’ kiangah va pai a,

15. “Keimah in note’ khut sungah Jesu kong piak leh, bang zahin nong guai ding uh hiam?” ci-in a dong hi. Amaute in dangka san sawm thum ama aading a sehkhia uh hi.

16. Tua hun a kipan Judas in Jesu a lehhek theihna ding hun hoih a zong hi.

17. Silngo sawh loh Khomun Pawi ni masa pen ni-in Jesu’ kiangah a nungzuipite hong pai uh a, “Paisan pawi an nek theihna dingin koi ah hong bawlsak le ung deih na hi hiam?” ci-in a dong uh hi.

18. Amah in, “Khua sungah hih bang mi khat kiangah pai unla, ‘‘Siapa in, Ka hun hong nai ta hi; na inn ah ka nungzuipite tawh Paisan pawi kong bawl ding uh hi, ci-in hong vaikhak hi,’ va ci un,” a ci hi.

19. Tua ahih manin a nungzuipite in Jesu cih mah bangin hih uh a, Paisan pawi nekna ding a bawl khol uh hi.

20. A nitak ciangin Jesu in a nungzuipi sawm le nihte tawh sabuai ah kingamin an a ne khawm uh hi.

21. An a nek laitakun Jesu in, “Ken a man takpi kong genin ah, note’ lakah khat in kei hong lehhek ding hi,” a ci hi.

22. Amaute dah mahmah uh a, ‘Topa aw, kei ka hi hiam?” a ci tek uh hi.

23. Jesu in, “Kei tawh ankuang ka sawk khawm pihpa in kei hong lehhek ding hi.

24. Mihing’ Tapa in Lai Siangtho sungah a kigelhsa mah bangin a pai ding hi. Ahi zongin Mihing’ Tapa a lehhekpa in gimna nakpi-in a thuak ding hi. Tua mipa in a nu sung pan piang kei leh, ama aadingin hoihzaw ding hi,” a ci hi.

25. Amah a lehhek dingpa Judas in, “Topa aw, kei ka hi hiam?” ci-in a dong hi. Jesu in, “Na gen bangin nangmah na hi hi,” a ci hi.

26. Amaute in an a nek laitakun Jesu in khomun* la a, thupha a piak khit ciangin, balnenin a nungzuipite pia-a a genna panin, “Hih in ka pumpi ahi hi. La unla, ne un,” a ci hi.

27. Tua khit ciangin hai zong la a, lungdam a koh khit ciangin amaute pia a, a genna panin, “Na vekpi-un dawn un;

28. bang hang hiam cih leh, hih in mi tampite’ mawhna a maina dingin a kibuakhia ding thuciam thak ka si ahi hi.

29. Ken kong genin ah, ka Pa gam sungah note tawh leenggahzu thak ka dawnkik ni matengin, ka dawn ngei nawn kei ding hi,” a ci hi.

30. Amaute in phatna la a sak khit uh ciangin Olive Mual ah a pai uh hi.

31. Tua khit ciangin Jesu in amaute’ kiangah, “ ‘Keimah in tuucingpa ka satlum dinga, tuuhonte a kithehthang ding uh hi,’ ci-a Lai Siangtho sungah a kigelh mah bangin tuzan mah mahin kei hangin na vekpi-un lungkia-in nong taisan ding uh hi.

32. Ahi zongin ka thawhkik khit ciangin note’ mai, Galilee gamah ka na pai ding hi,” a ci hi.

33. Peter in ama kiangah, “Nang hangin mi khempeuh lungkia-in hong taisan uh hangin ken kong taisan ngei kei ding hi,” a ci hi.

34. Jesu in ama kiangah, “Ken a man takpi kong genin ah, tu zan mahmahin ak a khuan ma-in thumvei kei nong nial ding hi,” a ci hi.

35. Peter in ama kiangah, “Nang tawh sihkhawm ding ka hi zongin, nang kong nial ngei kei ding hi,” a ci hi. Tua mah bangin nungzuipite khempeuh in zong a ci uh hi.

36. Tua khit ciangin Jesu in amaute tawh Gethsemane kici huan khat ah pai uh a, “Keimah hua lai-ah pai-a thu ka nget kalin hih lai-ah na tu un,” a ci hi.

37. Amah in Peter le Zebedee’ tapate gel tonpih a, amah dah lua-in lungkham a kipan hi.

38. Tua ciangin Jesu in amaute’ kiangah, “Si dek takin ka dah hi. Hih lai-ah na om unla, kei hong ngak un,” ci-in thu a pia hi.

39. Jesu a mai lamah tawmkha pai lai-in lei-ah boksuk a, “Ka Pa aw, ahih theih leh hih hai tawh hong kipelhsak in; ahi zongin keima deihna bang hi loin nangma deihna bang hi ta hen,” ci-in thu a ngen hi.

40. Tua khit ciangin a nungzuipite’ kiangah a paikik leh, amaute a na ihmu uh hi. Tua ciangin Jesu in Peter’ kiangah, “Note in nai khat sung nangawn kei tawh hong om khawm zo lo na hi uh hiam?

41. Ze-etna na thuak lohna dingun thungenin ngak gige un.Lungsim a ut hangin pumpi a thanem hi,” a ci hi.

42. Amah a nihveina va pai kik a, “ka Pa aw, hih hai kei dawn lohin kipelh thei lo ahih leh, nangma deihna bang hi ta hen,” ci-in thu a ngen kik hi.

43. Khatvei amaute’ kiangah hong paikik a, ihmu a om a mu hi, bang hang hiam cih leh a mit uh a kham hi.

44. Tua ahih manin amaute omsak a, khatvei va paikikin a nget ngei bangin a thumveina thu a ngen hi.

45. Tua khit ciangin nungzuipite’ kiangah paikik a, “Note ihmu-in tawlnga lai na hi uh hiam? En un, Mihing’ Tapa mawhneite’ khut sungah a kilehhek hun hong tung ta hi.

46. Tho un, pai ta ni! En un, kei hong lehhek dingpa hih lai-ah hong pai ta hi!” a ci hi.

47. Jesu in tua bangin a gen laitakin a nungzuipi sawm le nihte’ lakah khat ahi Judas hong pai a, amah tawh, siampi makaite le mipite’ upate in a sawl mihonpite in namsau le molhtumte tawi-in hong tonkhawm hi.

48. Tu-in tua a lehhekpa in amaute kiangah lim khat pia a, “Ka nap ding pa in Jesu ahi hi; amah man un,” a ci hi.

49. Jesu’ kiangah Judas paipah a, “Rabbi aw, na cidam ta in,” ci-in a nam hi.

50. Jesu in ama kiangah, “Lawm aw, hih lai-ah na sep ding sem ta in,” ci-in a dawng hi. Tua ciangin mihonpite in Jesu nehphei uh a, lencipin a mat khit uh ciangin a kai uh hi.

51. Jesu tawh a omkhawm mite’ lakah khat in thakhatthu-in a namsau tungah a khut nga-in dok a, siampi lianpa’ nasempa a sat leh, a bil a satkhia hi.

52. Tua ciangin Jesu in ama kiangah, “Na namsau a paii ah siat in. Bang hang hiam cih leh namsau tawite namsau mah tawh a si ding hi.

53. Ka Pa’ kiangah ngen leng vantung mi hon sawm le hon nih sanga tamzaw ka kiangah thakhatin hong puakpah ding um lo na hi hiam?

54. Tua bang ahih leh, hih bangin piang ding hi, ci-a Lai Siangtho’ gensa bangci tangtun theih ding ahi hiam?” a ci hi.

55. Tua laitakin Jesu in mihonpite’ kiangah, “Note in galguk mat bangin kei hong man dingin namsau le molhtum tawi-in hong kuan na hi uh hiam? Keimah in biakinnpi sungah nisimin thu ka hilh a, nong man kei uh hi.

56. Ahi zongin hih thute khempeuh in kamsangte’ gelhsa Lai Siangtho a tangtunna dingin a piang ahi hi,” a ci hi. Tua khit ciangin a nungzuipite khempeuh in amah nusia-in a taisan uh hi.

57. Jesu a man mite in lai siangtho siamte le upate’ kikaikhopna siampi lian Caiaphas’ inn ah amah a paipih uh hi.

58. Ahi zongin Peter in siampi lianpa’ inntual dongin Jesu galzuih a, inntual ah lutin, bang thu piang ding hiam, cih a theihnopna-in a cingte tawh a tukhawm hi.

59. Tu-in siampi makaite le thu vaihawm upate buppi in Jesu a thah theihna dingun ama langah zuau teci a zong uh hi,

60. ahi zongin zuauthu teci pangte tampi hong pai uh hangin a mu zo kei uh hi. A tawpna ah thuzuau teci nih hong pai uh a,

61. “Hihpa in, ‘Keimah in Pasian’ biakinnpi susia-in ni thum sungin ka lamkik thei ding hi,’ ci hi,” a ci uh hi.

62. Siampi lianpa dinga, “Dawngkik lo ding na hi hiam? Hih mite in nangma lang khatah teci bangci-a pang uh ahi hiam?” ci-in a dong hi. Ahi zongin Jesu pau loin a om hi.
42. Amaute in, “Hih mipa in midangte a gupkhiat zawh hangin amah le amah kigumkhia zo lo hi. Israel’ Kumpipa ahih leh, tu mahmahin singlamteh tung pan hong kumsuk ta hen. Tua hi leh, amah i um ding hi.

43. Amah in Pasian a muang hi. Pasian in amah a deih leh, tu mahmahin amah hon ta hen; bang hang hiam cih leh, amah in, ‘Pasian’ Tapa ka hi hi,’ a ci hi,” ci-in a zahko uh hi.

44. Tua mah bangin amah tawh singlamteh tunga kikhai khawm misuamte in zong a zahko uh hi.

*45. Sunkim nai sawm le nai nih pan nitak nai thum dongin leitung khempeuh ah khim zingin khua a mial hi.

46. Nai thum hun pawlin Jesu in, “Eli, Eli, lema sabachthani,”(a) ci-in nakpitakin a kiko hi. A khiatna in, “Ka Pasian, ka Pasian aw, bang hangin kei hong nusia na hi hiam?” a cih nopna ahi hi.

47. Tua muna ding mi pawlkhat in a zak uh ciangin, “Hih mipa in Elijah a sam ahi hi,” a ci uh hi.

48. Amaute’ lakah khat in thakhatin va tai a, tui hupna la-in leenggahzu thuuk’ sungah a diah khit ciangin, pumpeeng dawnah koihin Jesu dawn dingin a pia hi.

49. Ahi zongin mi dangte in, “Khawl phot in; amah a honkhia dingin Elijah hong pai hiam, en ni,” a ci uh hi.

50. Tua ciangin Jesu nakpitakin kiko-a a tawpna hu sangin a si hi.

51. Tua hun laitak thakhatthu-in Biakinnpi’ puandal a tung lam pan a nuai lam dong kikekin phel nih a kisuah hi. Zinliinga suangpite kitamkham hi.

52. Hante zong kihonga, a sisa mi siangthote’ luang tampi hingkikin hong thokik uh hi.

53. Amaute a thawhkik khit uh ciangin han sung pan paikhia uh a, khuapi siangtho sungah lutin mi tampite’ kiangah a kilang uh hi.

54. Tu-in Jesu’ luang a cing galkap zakhat ukpa le amah tawh a omkhawmte in zinliing a muh uh ciangin lau mahmah uh a, “Hih mipa in Pasian’ Tapa taktak ahi hi,” a ci uh hi.

55. Tua lai munah a gamla panin a gal et numei tampi zong a om uh hi; amaute pen Galilee gam pan Jesu’ nung zui-in, amah a huhte ahi uh hi.

56. Tuate’ lakah Mary Magdalene, James le Joseph-te’ nu Mary le Zebedee’ tate’ nu zong a om uh hi.

57. Nitak lam ciangin Arimathea khua mi Jesu’ nungzui Joseph min nei mihau khat zong hong pai hi.

58. Amah Pilate’ kiangah pai-in, Jesu’ luang ngen a, Pilate in a piakna dingin thu a pia hi.

59. Tua ahih manin Joseph in Jesu’ luang la a, saihadial puan siangtho tawh a tuam hi.

60. Tua khit ciangin suang kikhuat ama han thak sungah sial a, han kongvang suangtumpi khat tawh a huk khit ciangin a paikhia hi.

61. Mary Magdalene le a dang Mary-te hankhuk galah tu-in a om uh hi.

62. Kigin ni khit a zingsang ciangin, Pilate mangpa’ kiangah siampi makaite le Pharisee-te a kikaikhawm uh hi.

63. Amaute in, “Tua mi khempa in a nuntak lai-in, ‘Ni thum khit ciangin ka tho kik ding hi,’ a ci hi.

64. Tua ahih manin ni thum ni dong han a cing dingin thu pia in; tua ahih kei leh a nungzuipite pai-in a luang gu ding uh a, ‘Amah sihna pan thokik zo hi,’ ci-in mite’ kiangah gen kha ding uh hi, tua hi leh hong khem masakna uh sangin hong khem nunungna uh nasiazaw lai ding hi,” a ci uh hi.

65. Pilate in amaute’ kiangah, “Note in a cing galkapte na nei uh hi; paipih unla, na hih zawh zahun cingsak un,”a ci hi.

66. Tua ahih manin amaute a cingte tawh pai uh a, han hukna suang a ciamteh khit uh ciangin hoih takin a cingsak uh hi.

Hi in Topa' Lungdamna Laisiangtho ahi hi.