Sia. Joseph Hau Kap tungpan nisim kha-an vakna

Catholic Nisim Lai Siangtho: Hun Nautaang Nipi Kaal (24) Na, September 17, 2020 Lungdamna Lai Siangtho: Luke 7: 36-50,  36. Pharisee-te khat in nitak an nekpih dingin Jesu sam a, tua Phariseepa’ inn sungah lutin an a ne hi. 37. Jesu in tua Pharisee-pa’ inn-a an a nek lam tua khua-a mawhnei numei khat in a theih ciangin sathau namtui suang ngo thawl khat tawi-in paipih a, 38. Jesu’ nunglam a khe phungah dingin kap a, a khete khitui tawh kawtsakin a sam tawh nulsak a, nam-in, a sathau namtui tawh a zut hi. 39. Amah a sam Phariseepa in a muh ciangin, “Hih pa kamsang ahih takpi leh amah a lawng kua hi a, hih nu bangci numei hi-in, mawhnei khat ahih lam a thei ding hi,” ci-in a lungsim sungah a ngaihsun hi. 40. Jesu in ama kiangah, “Simon aw, kong gen ding khat a om hi,” a cih ciangin amah in, “Sia aw, hong gen in,” a ci hi. 41. Jesu in, “Sum metkhakpa’ tungah mi nih in sum a ba uh hi. Khat in denarii zanga ba-in adang khat in sawmnga a ba hi. 42. Amaute in a leiba uh loh zo lo tuak uh ahih manin amah in a leibate a nihin maisak tuak hi. Tua bang ahih leh, tua nihte’ lakah kua pen in sum neipa itzaw ding ahi hiam?” ci-in a dong hi. 43. Simon in, “Leiba a tamzaw a kimaisakpa hi-in ka um hi,” ci-in a dawng hi. Jesu in, “Na cih bang a man hi,” a ci hi. 44. Tua ciangin amah tua nu lamah kihei-a, Simon’ kiangah, “Hih nu na mu hiam? Na inn ah kong pai a, ka khe silna ding tui nong pia kei hi. Ahi zongin hih numei in ka khepekte a khitui tawh kawtsakin a sam tawh a nul hi. 45. Nangmah in kei nong nam kei hi, ahi zongin hih numei in inn sung kong lut a kipan tawlnga loin ka khete a nam tawntung hi. 46. Ka lu sathau nong nilhsak kei hi, ahi zongin amah in ka khe sathau namtui hong zuutsak hi. 47. Tua ahih manin ken kong genin ah, ama mawhna tampite kimaisak khin ahih manin amah in itna lian a lak hi. Ahi zongin tawmno bek a kimaisakte in tawmno bek mah a itna uh a lak uh hi,” a ci hi. 48. Tua ciangin Jesu in tua nu’ kiangah, “Na mawhnate kimaisak zo hi,” a ci hi. 49. Ahi zongin amah tawh an a ne khawmte in, “Mawhnate nangawn a maisak hih mipa kua ahi hiam?” ci-in khat le khat a kiho uh hi. 50. Tua ciangin Jesu in numei’ kiangah, “Na upna in nang hong honkhia khin hi. Lungnuamtakin na pai in,” a ci hi.

Hih in Topa' Lungdamna Lai Siangtho ahi hi.