Rev. Fr. Thomas Tuang tungpan Kha-an vakna

Lungdamna Lai Siangtho Mt 24: 42-51 Bulphuhin a theih huai mahmah ih nuntak pih ding thu manpha tampi tawh thapiakna.

Ih sih ciangin Topa gam ih tun theih nadingin bang kisam hiam cih leh hi leitungah hun ih neih lai-in tuni bek amanpha pen ni, tuni bek anungta lai ding, tuni nuntak nitawpni ding danin kingaihsun in nuntak ding kisam hi. Sihna in Calendar ahi zongin appointment a kici, bang hun ah kimu ding cih hun leh nite om lo hi. Tua hi a, Topa Jesu hong pai kik na hoihtak ih dawn theih nadingin bang kisam hiam. Navakna, ih nuntakna manpha sakin Pasian thu sungah pilvangna te kisam hi. Ih nuntakna te manpha sak in Topa deihna bangin nuntakna cih nopna hi. Tuni ih nuntakna ah ih kidop nadingin Lai Siangtho in hong thei sak hi. Tua ahih manin a kigingte in akigin bangin gualzawhna, hotkhiatna, suahtakna ngah ding hi ci-in tuni Laisiangtho bulpi in hong gen nuam ahi hi. Nisim naisim ih nuntakna sungah athupi pen bang hiam cih leh nasem kicianlo, nasem ginalo bangin ih om khak loh ding, ka pupa/ ka Topa hong ciah nai kei in teh ci-in ih ut bangin ih kalsuan khak loh ding thupi hi. Ka Topa banghun banghun in hong pai zongin kei ii cihtakna, thumanna amuh nadingin om ning, nungtaning, kalsuan ning, hanciam ning ci-in anungtate Topa hong pai ciangin/ ih nuntakna abei ciangin Topa tawh ih kimuh ciangin Topa in hong honkhia ding hi. Cihtakna leh kiginna om kei leh bang mah ki lamen ngam lo hi. Bang hang hiam cih leh Topa Jesu hong pai ding hun ki gen khol thei lo hi. Mihingte ih nuntakna mahmah zong kigenkhol thei lo hi. Ahi zongin tu ni Laisiangtho bulpi in hong gennopin kigingkhola om te in a kiginkholh bangin Suaktakna, gualzawhna, lawhcinna, picingnate ngah ding hi ci hi. Tua te ih ngah nadingin amasa pen in Pasian tawh ih kilem ding kisam aa, anihna ah ei leh ei ih ki lem ding , a thumna ah midangte tawh ih kilem ding kisam hi. Hi namthumte tawh ih kilem ding kisam hi. Tua hi leh ei te in Topa Jesu banghun banghun in hong pai zongin a kigingkholte, nuntakna ah kiginsa-in asem abawlte ih hihna lakzo in nikhat ni ciangin Topa tawh omkhawm in, tawntung nuntakna eite hong pia ding hi. Tua ahih manin eite in a kigingkhol mite ih hih zawh nadingin pilvang takin nungta ni..