Lungdamna Laisiangtho Mark 5:21-43 sungsimna (Jan.31, 2023, Tuesday)

Mk 5:21-43, 21. Jesu in gunkuang tawh a galkah kik ciangin mihon tampite a kimah a kikaikhawm uh hi. Tuipi gei-ah a om laitakin,

22. Jairus min nei, kikhopna inn makaite khat, tua lai-ah hong pai a, amah in Jesu a muh ciangin a khe phungah bokin,

23. “Ka tanuneu si dek dek hi. Hong pai inla, ama tungah na khut nga in, tua hi leh amah damkik dinga, a nungta ding hi,” ci-in a thum phapha hi.

24. Tua ahih manin Jesu in amah a zui hi. Tua ciangin mihonpi in zong ama nung zui uh a, a nehcip uh hi.

25. Tua laitakin kum sawm le kum nih sung tawntung siluang natna a vei numei khat a om hi.

26. Siavuante in amah a bawl sungin gim mahmah a, a neihsa teng bei-in noptuam tuan loin a gim semsem hi.

27. Amah in Jesu’ thu a zak ciangin a nunglam panin mihonpite’ lakah lut a, a puantualpi a lawng hi,

28. bang hang hiam cih leh tua-nu in, “A puan mong lawngkha peuh le’ng ka dam ding hi,” ci-in a ngaihsun hi.

29. A puan mong a lawn khak khit phetin thakhatin a siluang kang pah a, a natna dam pah hi, ci-in a pum tung panin a kiphawk hi.

30. Jesu in ama tung pan vangliatna a paikhiat thei pah a, mihonpi’ lamah amah kihei-in, “Kua in ka puan hong lawng ahi hiam?” a ci hi.

31. A nungzuite in ama kiangah, “Mi tampi in hong nehcip mu napi-in, ‘Kua in hong lawng ahi hiam?’ ci-in bangci gen theih na hi hiam?” a ci uh hi.

32. Jesu in kua in lawng cih a muhna dingin a kimkot a en hi.

33. Ahi zongin numei nu in ama tunga thupiang thei ahih manin lau a, liingkawmin hong pai a, Jesu’ mai-ah boksukin thu piang khempeuh mantakin a gen hi.

34. Jesu in tua nu’ kiangah, “Ka tanu aw, na upna in nang hong damsak khin hi. Lungnuam takin pai inla, na natna pan damna ngah ta in,” a ci hi.

35. Jesu in tua bangin thu a gen laitakin, tua makaipa’ inn panin mite hong pai-in, “Na tanu si ta hi. Bang hangin siapa gimsak lai ding na hi hiam?” a ci uh hi.

36. Ahi zongin Jesu in amau thugente thudon loin, “Lau kei inla; um peuh in,” ci-in kikhopna inn makaipa’ kiangah a gen hi.

37. Amah in Peter, James le James’ sanggampa John-te simloh mi dang kuamah kizuisak lo hi.

38. Kikhopna inn makaipa’ inn a tun uh ciangin mite nakpi-in kap a a thum Jesu in a mu hi.

39. Inn sungah a lut ciangin, “Bang hangin hih bangin kapin thum na hi uh hiam? Naupangno a si hi lo hi; a ihmu ahi hi,” a ci hi.

40. Tua ciangin amaute in amah a nuihsan uh hi. Amah in amaute a pusuahsak khit ciangin numeino omna-ah numeino’ nu le a pa le a tonpih a nungzuite a lutpih hi.

41. Tua numeino a khutin len a, “Talitha cum!” a ci hi. A khiatna in, “Numeino aw, tho in,” a cih nopna ahi hi.

42. Thakhatin numeino tho pah a, lam a pai hi (Amah kum sawm le kum nih a pha hi). Amaute in hih thu lamdang a sa mahmah uh hi.

43. Tua thu kuamah in a theih lohna dingin Jesu in amaute khauhtakin thupia a, numeino nek ding bang khatpeuh a piakna dingun thu a pia hi.

Hih in Topa' Lungdamna Laisiangtho ahi hi.

Add new comment

2 + 1 =