Lungdamna Laisiangtho Mark 10:32-45 sungsimna (29.5.2024 , Wednesday)

Catholic Nisim Lungdamna Laisiangtho Mark 10:32-45 sungsimna -----------------32. Jerusalem khua paina lampi ah amaute a pai laitakun, a nungzuite’ mai-ah Jesu a na pai masa hi. Amaute in lamdangsa uh a, amau a zui mite a lau uh hi. Jesu in sawm le nihte samkik a, ama tunga a piang ding thute gen a kipan hi,

33. “En un, Jerusalem khuapi ah a paito ihi ta hi. Siampi makaite le lai siangtho siamte’ khut sungah Mihing’ Tapa ki-ap dinga, amaute in amah sih thukhenna pia ding uh a, Gentile mite’ khut sungah a ap ding uh hi;

34. amaute in amah zahko-in, cil phih ding uh a, satgawpin a that ding uh hi. Ni thum khit ciangin amah a thokik ding hi,” a ci hi.

35. Zebedee’ tapa James le John-te a kiangah va pai uh hi. Amaute in, “Sia aw, kong nget peuhpeuh uh nong piakna ding ka deih uh hi,” a ci uh hi.

36. Tua ciangin Jesu in amaute’ kiangah, “Note’ aadingin bang kong hihsak ding deih na hi uh hiam?” ci-in a dong hi.

37. Amaute in, “Topa aw, na minthanna sungah kote na taklam’ khat, na veilam’ khat ka tut theihna dingun thu hong pia in,” ci-in a ngen uh hi.

38. Ahi zongin Jesu in amaute’ kiangah, “Note in nong nget uh na thei kei uh hi. Ka dawn ding hai dawn zo ding na hi uh hiam? Ka thuak ding baptaizna# thuak zo ding na hi uh hiam?” a ci hi.

39. “Ka hih zo ding uh hi,” a cih uh ciangin, Jesu in amaute’ kiangah, “Ka dawn ding hai na dawn takpi ding uh a, ka thuak ding baptaizna zong na thuak takpi ding uh hi.

40. Ahi zongin ka taklam le ka veilam ah tut theihna thu keimah in kong pia thei kei hi. A tu dinga a kiseh kholsa mite bek a tu ding uh hi,” a ci hi.

41. Nungzui adang sawmte in hih thu a zak uh ciangin, James le John tungah a heh uh hi.

42. Tua ahih manin Jesu in amaute sam a, “Gentile mite’ tungah a uk kumpite, amaute’ tungah kiliansak uh a, a uliante uh amau tungah a kithuneihsakna uh na thei uh hi.

43. Ahi zongin note’ lakah ahih leh tua bang hi lo ding hi. Note’ lakah mi lian a suak nuam peuhmah note’ nasem hi ding hi.

44. Note’ lakah a masa pen a suak nuam peuhmah, note’ sila hi ding hi.

45. Bang hang hiam cih leh, Mihing’ Tapa in midangte na a semsak dingin hong pai hilo a, midangte’ na a sem ding le mi tampi tankhia-in, a nuntakna a pia dingin hong pai ahi hi,” a ci hi.

Hi in Topa' Lungdamna Laisiangtho ahi hi.