Lungdamna Laisiangtho Luke 23:35-43 sung simna (Nov.20,2022)

Luke 23:35-43.,  35. Mipite in dingin en uh a, ahi zongin amaute’ makaite in ahih leh, “Hih pa in midangte a honkhia thei hi. Amah, Pasian’ teelsa Christu ahih takpi leh, ama pumpi kihonkhia ta hen,” ci-in a zahko uh hi.

36. Galkapte zong ama kiangah hong pai uh a, a dawn dingin leenggahzu hau pia-in,

37. “Nang, Jew mite’ Kumpipa na hih takpi leh, nang le nang kihonkhia in,” ci-in a zahko uh hi.

38. “Hih pa in Jew mite’ Kumpipa ahi hi,”ci-in a ma lutungsan ah theihsakna lai zong a suang uh hi.

39. Tua lai-a kikhai misuamte khat in, “Nang, Christu hilo na hi hiam? Nang le nang kihonkhia inla ko zong hong honkhia in!”ci-in Jesu a zahko hi.

40. Ahi zongin adang khat pa in ahih leh, “Nangmahin hih pa mah bangin sih thukhenna thuak napi-in, Pasian kihta lo na hi hiam?

41. Eite gel ihih leh i mawh na thaman a thuak ihi hi. Bang hang hiam cih leh, eite gel in i gamtatna tawh kituak takin a thuak ihi hi, ahi zongin hih pa ahih leh, tatkhialhna khat beek nei lo hi,” ci-in tua pa a taai hi.

42. Tua khit ciangin amah in Jesu’ kiangah, “Topa aw, na gam sungah na lut ciangin kei hong phawk in,” a ci hi.

43. Jesu in, “Ken a man takpi kong genin ah, tuni-in Paradisu ah kei tawh na om khawm ding hi,” a ci hi.

Hi in Topa' Lungdamna Laisiangtho ahi hi.