Lungdamna Laisiangtho John 4:5-42 sung simna (March 12, 2023)

John 4:5-42., 5. Tua ahih manin Jacob in a tapa Joseph a piak, lo mun awng gei-a om Samaria khuapi khat, Sychar kici khua ah a tung hi.

6. Tua lai-ah Jacob’ tuikhuk om a, Jesu a khualzinna-in gim ahih manin tuikhuk gei-ah a tu hi. Tua hun pen sunkimo pawl ahi hi.

7. Samaria numei khat tui tawi dingin a pai ciangin Jesu in ama kiangah, “Ka dawn ding tui hong pia in,” ci-in a ngen hi.

8. (A nungzuipite an lei dingin khuapi sungah a pai khin uh hi.)

9. Samaria numei in Jesu’ kiangah, “Nangmah in Jew mi hi napi-in Samaria numei ahi kei’ kiangah bang hangin tui dawn ding hong ngen na hi hiam?” a ci hi. (Jew mite in Samaria mite tawh kithuahin kiho lo uh hi.)

10. Jesu in numei nu’ kiangah, “Pasian’ hehpihna ahi zongin, dawn ding tui hong ngenpa ahi zongin thei hi lecin, ama kiangah tui na ngen dinga, amah in nuntakna tui nang hong pia ding hi,” ci-in a dawng hi.

11. Numei in, “Topa aw, nangmah in tui dipna ding na nei kei hi. Tuikhuk zong a thuk hi. Tua ahih manin nuntakna tui koi ah ngah ding na hi hiam?

12. Nangmah in hih tuikhuk hong pia ka pu ka pa uh Jacob sangin lianzaw na hi hiam? Amah in hih tuikhuk kote hong pia-in amah a kipan a tate le a ganhonte in hih tuikhuk pan tui a dawn uh hi,” a ci hi.

13. Jesu in ama kiangah, “Hih tui a dawn mi peuhmah a dangtak kik ding hi.

14. Ahi zongin ken ka piak ding tui a dawn mi peuhmah cikmah hunin dangtak kik ngei nawn lo ding hi. Ken ka piak ding tui in tua mi sungah nuntak tawntungna tui a phulkhiasak tuinak a suak ding hi,” a ci hi.

15. Numei in ama kiangah, “Sia aw, ka dang a tak kik ngei nawn lohna ding le hih mun a tuitawi-a ka pai nawn lohna dingin, tua tui kei hong pia in,” ci-in a ngen hi.

16. Jesu in tua nu’ kiangah, “Pai-in na pasal va sam inla, hong paikik in,” a ci hi.

17. Numei in, “Ken pasal ka nei kei hi,” a cih ciangin Jesu in, “Pasal ka nei kei hi,” na cihna thu a man hi.

18. Bang hang hiam cih leh, pasal nga na nei ngei khin hi. Tu-a na neih pa pen zong na pasal hilo ahih manin na thu gen a man hi,” a ci hi.

19. Numei in, “Sia aw, kamsang khat na hih lam kong thei hi.

20. Ka pute ka pate un hih mual tungah Pasian a bia uh hi. Ahi zongin note in, ‘Jerusalem khua bek Pasian biakna ding mun ahi hi,’ na ci uh hi,” a ci hi.

21. Jesu in ama kiangah, “Numei aw, kei hong um in. Hih mual tungah hi loin, Jerusalem khuapi ah zong hi loin, Pa na biak hun uh hong tung ding hi.

22. Note in na theih lohpi uh na bia uh hi. Kote in ka theih uh ka bia uh hi. Bang hang hiam cih leh, hotkhiatna in Jew mite’ pan hong pai hi.

23. Ahi zongin a bia taktakte in kha tawh ahi zongin, thuman thutak tawh ahi zongin, Pa a biak ding uh hun hong tung ding tham loin tu-in hong tung zo hi. Bang hang hiam cih leh, Pa in amah a bia dingin tua bang mite a deih hi.

24. Pasian in kha ahi hi. Amah a biate in kha le thuman thutak tawh a bia ding uh hi,” ci-in a gen hi.

25. Numei in, “Christu* kici Messiah hong pai ding ken ka thei hi. Amah hong pai ciangin na khempeuh hong pulaak ding hi,” a ci hi.

26. Jesu in tua nu’ kiangah “Nang tawh a kiho keimah in tua pa ka hi hi,” a ci hi.

27. Tua khit phetin a nungzuipite hong tungkik uh a, numei tawh a kiho a muh uh ciangin lamdang a sa uh hi. Ahi zongin, “Bang deih na hi hiam? Bang hangin tua numei tawh kiho na hi hiam?” ci-in kuamah in a dong ngam kei uh hi.

28. Tua khit ciangin numei in a tuibeel nusia-in, khua sung ah paikik a, mite’ kiangah;

29. “Hong pai unla, ka gamtatna khempeuh hong genpa hong en un. Tua pa in Christu ahi hiam?” a ci hi.

30. Amaute khuapi sung pan paikhia uh a, ama kiangah a pai uh hi.

31. Tua kalin a nungzuipite in, “Rabbi aw, an ne in,” a ci uh hi.

32. Amah in, “Note’ theih loh an nek ding ka nei hi,” a ci hi.

33. Tua ahih manin a nungzuipite in, “Mi khatpeuh in an nek ding na puak khin ahi hiam?” ci-in khat le khat a kikum uh hi.

34. Ahi zongin Jesu in amaute’ kiangah, “Keimah hong sawlpa’ deihna bang sem a, ama nasepna ka zawhna in keima an ahi hi.

35. Tu zawh kha li ciangin buh at hun ta ding hi, cih thei hilo na hi uh hiam? Ken kong genin ah, buh min zo a, a at hun ta hi, tu-in khuadakin lote en un!

36. A vawhpa le a atte a lungdam’ khawm theihna dingin buh atpa in thaman ngah a, tawntung nuntakna dingin gah a khawm hi.

37. Tua ahih manin, ‘Mi khat in vawh a, mi dang khat in a at hi,’ a kici in thuman ahi hi.

38. Na sep lohna mun uh ah a at dingin note kong sawl hi. Midangte in sem khin uh a, note in amau sepna ah na kihel uh hi,” a ci hi.

39. Numei in, “Amah in ka gamtatna khempeuh hong gen hi,” ci-a teci a panna hangin tua khua a Samaria mi tampite in amah a um uh hi.

40. Tua ahih manin Samaria mite ama kiang ah a tun’ uh ciangin amau khua ah a taamna dingin thum uh a, ni nih a taam hi.

41. Ama thugente’ hangin a um mi tampi a kibehlap hi.

42. Amaute in tua numei’ kiangah, “Kote in nangma nong genna hang bek-a um ka hi nawn kei uh a, tu-in ko mahmah in ka za uh hi. Hih mipa in leitung Honpa hi takpi hi, cih ka thei uh hi,” a ci uh hi.

Hi in Topa' Lungdamna Laisiangtho ahi hi.