Lungdamna Laisiangtho Jn 21:20-25 sungsimna (18.5.2024 , Saturday)

20. Peter a nunghei leh Jesu’ it nungzuipipa in amaute a zuih laitak a mu hi. Hih pa pen, nitak-an a nek khawm lai uh a, Jesu’ ang ah kingam a, “Topa, kua in nang hong lehhek ding ahi hiam?” ci-a a dong pa ahi hi.

21. Peter in amah a muh ciangin, “Topa, amah bangci ding ahi hiam?” ci-in a dong hi.

22. Jesu in ama kiangah, “Kong paikik hun dongin amah a nuntak ding ka deih leh zong, bang phamawhsa na hi hiam? Nang na hih leh, ka nung hong zui in,” a ci hi.

23. Tua ahih manin, “Tua nungzuipipa si lo ding hi,” ci-in sanggamte’ lakah a kigenthaang hi. Ahi zongin Jesu in amah si lo ding a cihna hi lo a, “Kong paikik hun dongin amah a nuntak ding ka deih leh, bang phamawhsa na hi hiam?” a ci hi bek hi.

24. Hih nungzuipipa in hih thu khempeuh teci panga, a gelhpa ahi hi. Ama teci panna a man hi, ci-in ka thei uh hi.

25. Jesu in nadang tampi zong a sem lai hi. A vekpi-in kigelh khin hi-leh a kigelhna laibute leitung ah ta zo lo ding hi, ci-in ka um hi.