Homily by Rve. Fr. Raphael Khuppi

Tuni pen Hunnautang nipi 34 na sungah kigin ni hi a, Biakna kum abei ni zong ahi hi. Zingciang pan kipanin Adventu Nipi masa tawh biakna kum thak sungah a lut ding I hita hi. Biakna kum ii ni nunung pen ni ahih mah bangin, I sim khiat Pasian Kammal, lungdamna laisiangtho zong hun nunung tawh kisai Topa Jesu’ hong hilhna thu ahi hi.
Hun nunung tawh kisai in chirsitian tampi te’n I buai pih mahmah thu khat ahi hi. Hun nunung pen mikang pau in The Day of the Lord, Topa’ Ni zong kici hi. Topa’ ni cih ciangin Topa hong pai ding ni ahih kei leh Topa hong pai kik ding ni cih nopna zong ahi hi. Topa’ ni tawh kisai in Laisiangtho lui sungah enleng Ezekiel 13:5, Joel 1:15, Malakhi 4:5 cih te ah I mu thei hi. Tua mah bangin Laisiangtho thak ah zong Sawltakte nasep 2:20, 1Cor 5;5, 2Thesolonica 2:2, 2Pet 3:10 te ah ki mu thei hi.
Hih LST munte ii hong gen nop bulpi in bang hiam cih leh, hun lui sungah hita leh hunthak sungah hita leh huntawp ni, thukhenna ni, ahih kei leh Topa Jesu leitung mite thu khen dingin hong pai kik ding hun pen om gige hi cih thu hi. Tua ni ahihkeileh tua hun pen hong nai mahmah hi, ci-in kamsangte’n hong gen uh hi. Ahi zongin tua Topa’ ni pen bang ni bang hun lian cih genna om lo hi. Tua ahih manin eite’n I theih dingah nikhat ni teitei ciangin tua “Topa’ NI hong tung pelmawh ding ahih manin, atawntungin kiging sa in om un, hong ci uh ahi hi.
Tua ahih leh eite bangci kigin ding I hiam? Christian pawl khat te genna ah Topa ni hong nai mahmah ta hi. Leitungah siatna tampi tak hong tungta, linlawnna patauhna, mulkimna tampi hong piang ta hi. Leitung bei ta ding hi, Topa hong paikik ta ding hi, ci-in mite linglawng sakin patau sak uh hi. LST sungah Topa Jesu in ka hun hong nai ciangin hi bang thute hong piang ding hi, ci-in hong genna zong om mah h. Ahi zongin tua bang thute hong pian ciangin umna neilo te bangin lau-in linglawng kei un, ci hi.
Ute naute aw, launa pen Jesu uplahna pan hong piang ahi hi. Nungzuipite Jesu tawh gunkuang tungtuang khual a zinna uh ah huihpi tuihual tawh hong kituah ciangin lau lua mahmah ahih manin Jesu kiangah hong kiko uh hi. Jesu in thupia in huihpi tuihual a daihsak khit ciantin amau te tai hi. Na upna uh koi ah om hiam? Jesu amaute om khawm gige nangawn pen laulai veve uh hi. Leitung lungsim in amaute zo veve hi. Tua hi a, leitung lungsim in hong zawh ciangin I upna tha hong nem in launa, linlawnna, lungmuanlohna hong tuam zel hi.
Tua ahih manin, tuni Lungdamna LST sungah Topa Jesu in, vanlelei a mangthang zongin ka thugente maimang ngeilo ding hi, ci hi. Amah I upnak leh leitung in bangbang asuak phial zongin nang na kisia kei ding hi. Topa’ hong genna behna ah, hih thupiang khempeuh thuakzawh na ding thahatna na neih na ding un a tawntungin thungenin vil niloh un, hong ci hi.
Tua ahih manin, eite’n Topa’ ni I ngak kawmin thu I nget tangtang ding Topa’n hong deih hi Banghang hiam cih leh, eite hong susia nuam Satan in sunlezan in tawlnga lo in na sem hi. Eite kisiat na dingin lampi tuamtuam zongin hong nawng kai sak a, thang hong siah den hi. Tua ahih manin lungmuang ci-in a ih mumu hilo in, I mitte hak gige in, kim leh pam khua dak in, thungen tawntung ding hihang. Tua ahi leh Satan in hong zo ngeilo ding hi.
Thuzui ute naute aw, ani anai lian I theih loh hang Topa’ Ni, huntawpni in ei hong ngak gige ahih manin kiging tawntung ni. Topa tawh tonkhawm den ni. Nisimin thungenin amah tawh tonkhawm peuh leng huihpi nungin tui hual hong khang zongin cik mah hunin lau nading bangmah omlo hi. Gunkuang sungah nang tawh Jesu hong tuang khawm den hi cih phawk inla lungmuang in.