Homily By Rev. Fr. Thomas Tuang (March 15.2022, Tue)

Mt 23: 1 – 12
Tuni Lungdamna Lai Siangtho sungah Topa Jesu in Pharisee te tungah hang takin thu a hilhna thu I mu hi. A diakdiak in Pharisee te, thukham hilh sia te leh biakna Makai te in amaute ii vang ding, amau minthan nading, amau phat nading bek sem in, amau aana zang khialin mite tungah Pasian dan aa ahilh ding uh phawk kha lo-in amau ii deih bangin lamlak ahih manin Topa Jesu in a tai ahi hi. Pharisee te lungsim puakzia te Topa Jesu in deihlo ahih manin a tai ahi hi.
Pharisee te in Moses thukham te bangin mite thuhilh napi in amaute in amau hilh bangin sem ngeilo uh hi. Amaute lungsim puakzia pen ka gen bangin sem un. Ahi zongin ko ka ut bang un gamta ding cih dan ahi hi. Pasian min pua aa nasem te in Pasian deihna tawh ki tuak aa, lam man, thuman thutak hilh dingin Topa Jesu in a lamen ahi hi.
Topa Jesu in kiniamkhiatna tawh mapang ding, kiniamkhiatna tawh nasep ding pen tuni nasia takin hong gen hi. Kiniamkhiatna in hoihna phatna te phungpi ahi hi. Kiniamkhiatna omlo in hoihna phatna dangte ki ngahlo hi. (Pau 16: 18) sungah “Siatma in kiphatsakna hong tunga, lungsim kiliatsakna pen I tukma in hong tung hi” ci hi. (James 4: 6) sungah “Pasian in a ki phasakte langpang hi, a kiniamkhiat te thupha tawh pahtawi hi” ci hi.
Tuni in ei Christian te lungsim puakzia dingin kiphatsakna te nawlkhin in, kiniamkhiat in khat leh khat ki deihsakna tawh mapang ding ahi hi. Pasian na I sepna ah ei ii minthan nading, min ngah nading in sem lo-in Topa deihna bangin I sep ding kisam hi. Tua hi leh eite in thupha I ngah pan ding hi. A kiniamkhiat mite ki lamsang dinga, a kiphasak mite ki nenniam ding hi ci-in tuni in Lai Siangtho in ong gen hi.
Tua hi aa, Makai sem ding te I lungsim puakzia dingin bang dan hiam cih leh adangte sila hi ding, sia sem in a sawl ziauziau ding hilo, amakaih ding. Sawl ding bek hilo, makaih ding. Ei mahmah Pasian mai ah Pasian sila hing ci’n ki ngaihsun in tua lungsim tawh sem ding. Ei leh ei sia bangin I ki ngaihsut leh Topa Jesu mun mang thei hi. Topa Jesu mun a mang loh na dingin tuni in kua mah sia na kici kei un. Vantung a om Pa lo ngal, sia/ Makai omlo hi ci hi.
Cihnopna ah ei leh ei I kiliatsak khak ding pen kidop ding hong theihsakna ahi hi. Leitungah Pa, sia, Makai tampi tak om hi. Tuni in tua te a ci nuam hilo zaw in tuni Lai Siangtho deihna in ei leh ei Makai, sia I kisak luat loh ding a gennopna ahi hi. Bang hang hiam cih leh Pasian sungah makaihna in sila bangin sepna ahi hi. Pasian adingin sila, mite adingin Makai, mite adingin sia, mite adingin Topa I suah theih na dingin Topa kiang pan kiniamkhiatna eiten I zong loh phamawh hi. Topa mai ah kiniamkhiat aa nasem te in man nei bek hi.
Tua ahih manin Topa mai ah aman nei mite I suahzawh na dingin Makai te ahi zongin, sia te ahi zongin, To te ahi zongin, Pa te ahi zongin, Nu te ahi zongin Topa deihna bangin kiniamkhiatna tawh hoih takin I ta te thu I hilh theih ding, I makaih theih ding, Pasian deihna tawh kituak in I makaih thei ding zong I hanciam ding ahi hi. Tua ahih manin mimal khat ciat khat ciat kiniamkhait aa Topa a zong mite, Topa na asem mite I hih zawh na dingin hanciam ciat ni.
#RVA, #KalayDiocese, #Homily,