Homily By Rev. Fr. Raphael Khuppi (March 12.2022, Sat)

Mt 5: 43 – 48
Christu sung ah kong it thuzui u le nau nu leh pa te tuni ihsim lungdamna laisiangtho in ah Mt 5:43-48 ciang ahihi. Hih lungdam na lai siang tho sung ah topa jesu in van tung a om na pa uh a ki cin mah bang in note zong na ki cing ta un. “Be perfect as your heavenly father’s perfect” ci-in hong hilh hi.
Tua ahi man in topa Jesu in vantung a om ih pa a kicing mah bangin eite a kicing ding in hong deih hi. Hong ki cing sak nuam hi. Tua kicin na ih ngah theih na ding in bang lam pi tawnding ih hi hiam cih zong a mahmah in hong gen beh lai hi.Tua in bang hiam cih leh “na gal te na it un la hong bawl sia te a ding thu na nget sak un” ci hi. Tua in ei te ki cing na ding lampi ahihi. Siampi laibu 19: 18 na sung ah no mau na ki-it mah bang un na veng te uh na it un ci-in laisiangtho lui sung ah thu khamna na om hi.
Tua in bang thu gen hiam cih leh Jew mi khat in jew minam dang khat a it na leh thu kham a zui na hi khin hi cih hong thei sak hi. Na mi pih te na it leh nang pen thukham a zui na hihi. Midang na it zawh kei leh zong phamawh lo cih tawh ki bang hi. Ahi zong in hih pen thu kham lui hi a, thu kham thak tak ciang in Topa Jesu in hih pen ki cing sa zo lo hi. Banghang hiam cih leh ei hong it te bek it leng bang phat tuam na om ding hiam. Ih mi pih te bek it hi lehang ei pen Christian ih hihna bang phat tuam na om ding hiam. Gentile mi te na ngawn in tua bang in it na nei hilo a hiam ci-in Topa Jesu in eite thu hong hilh a hihi.
Tua a hih man in u te nau te ih mi pih te bek a it, ei hong it te bek a it, ei hong ngai te bek a ngai hi lo-in Topa Jesu gen mah bang in ei hong mudah te na ngawn a it te, ih gal te nangawn a it te leh hong bawl sia te nangawn ading thu anget sak zo te ih hih na ding hong deih hi. Tua ih hih zawh a leh ei te a kicing mite ih hi pan ding hi cih Topa Jesu in eite hong hilh a hihi. Pasian in ama it na mi hing te tung ah hong lah na ah bang mah deidan na nei lo hi. It tuam, paih tuam nei lo hi. Tuni ih sim lungdam na laisiang tho sung ah mi hoih te tung ni a taang sak mah bang in mi hoih lo te tung ah zong a ni taang sak aa, a gam tat pha te tung ah leh a gamtat sia te tung ah zong a ki bang in guah a zu sak hi.
To pa itna pen mi kim tung ah hong tung hi. Ahi zong in ei mihing te ih hih leh hih it na pen mi kim tung ah ki pia khia zo lo hi. Ei ong it te bek it nuam in, ei hong paak ta te bek ki pak ta nuam in, ei ading in na hoih a bawl te ading bek in na hoih ki bawl sak kik num hi . Hih pen tu ni Topa Jesu hong gen na tawh kisai in en leng kicin na hi nai lo hi cih Topa Jesu in hong thei sak hi. Ih ki cin nop taktak leh Christian tak tak ih suah nop leh Pasian ta taktak ih suah nop aleh van tung a om ih pa ii ta te ih hih nop taktak aleh hih ciang tawh ki cing zo lo hi. Hong mu dah te nangawn it in, hong gal bawl te na ngawn ei ten lawm bawl in hong bawl sianuam te nangawn a ding in thu anget sakzo te ih hih ciang in eite pen Christian tak tak hihang .
Tua ahih man in tu hun lai tak in minam ading a vei, mitam pitak I om a tua sung ah ei Khua bek,ei pawl bek cih tawh akalsuan te ki om thei hi. Tua pen Christian dan ahih loh na thu tuni in Topa Jesu in hong theisak hi. Tua a hih man in eite hong it lo, hong ngai lo, hong mudah hong tuam bawl te tung ih it zawh , thu a nget sak zo, na ih sep sak nop ciang bek in ei te in Christian taktak Pasian ta te ih suak zo ding hi ci-in tuni laisiang tho in hong thei sak hi.
Topa Jesu in eite ih ithuai loh,ih gitloh mahmah hang in ei te hong it veve hi. Tua ahih man in hih it na thu ah Topa Jesu ii itna eite in etteh in, Vantung a om na pa uh a kicing mah bang in no te zong na kicing un hong cih mah bangin haksa mahmah ta leh kicin na lam pi masuan in vantung pa kiang a zua zo ding leh a tate tak tak ih hih theih na ding in ah eite in athak in hanciam ni ci-in ih ki hanthawn hi. Na vek pi uh tung ah Pasian in thupha hong pia ta hen.