Homily by Rev. Fr. Raphael Khuppi. (27.8.2022)

Mt 25: 14 - 30
Topa Jesu hong gen thungentehna in bang hong gen hiam? Akhatna ah Pasian ei mihingte gibg sapna tawh kizui in ama na I sepna ah thuman cihtakna I neih zawh na ding leh a nihna ah Jesu Topa in eite tungah piak ding a hong kamciam khempeuh leitung ah hita leh vantung ah hitaleh ciampel lo-in tang tung sak den hi, cih hong thei sak hi.
Ute naute, tu ni mahmah in na leitung nuntakna bei-in Topa tawh maitang kituah in I ki muh ciang, “A thuman a citak nasem pa aw, leitung ah na nasep zo na hih manin kei tawh a kibangin nuamsa khawm ding hi, hong cih leh bang zah takin na lungdam ding hiam. Ahi zongin, “a citak lo, a thadah nasem pa aw, hih mun pan paikhia inla, tawntung meikuang sungah lut in hong ci kha leh bang zah in dah huai ding hiam? Tua ni tua hun a ding ngaihsun khol-in I nuntak ding thupi hi.
Pasian in ei mi hing te khat ciat khat ciat tungah siamna khat tek hong guan hi. Tua siamna pen selcip ding hilo a, zatkhiat ding ahi hi. Met bawl in pungsak ding hi hang. Mite phat tuam na ding leh hong pia pa Pasian min a kiphat na dingin zang siam ding hi hang. Thugen siam te’n thugenna tawh ahi zongin, pilna siamna a nei te’n pilna siamna tawh ahi zongin tumtheih saitheih siam te’n tumtheih saitheih tawh ahi zongin Topa hong piak siamna talent tek tawh ama gam zai na dingin I sep ding ahi hi.
A kidop huai mahmah thu khat ah tua in bang hiam cih leh, Topa hong piak siamna talent te ei mau zontawm siamna dan khat in ngaihsun in, pung sak mengsak lo-in mite phat tuamna ding zang lo, zeek lo-in, aituam ading bek a, I zat khak leh Topa tawh I kimuh ciangin a citaklo nasem pa aw hong ci ding hi.
Lam khat panin, leitung nate leh leitung minthanna te sungah lungkim lua kha in vantung nate I mangngilh khak ding lau huai hi. Topa in eite leitung ah a tul dinga hong bawl hi lo hi. Vantung gam a luah dinga hong bawl ahi hi. Tua hi a, leitung nate, leitung min leh vangte pen leitung mah ah a kinusia ding hilel ahih manin tua a kisia thei, amaimang ding nate zangin tawntung kimang ding lungnopna lammah mitsuan gige in I nuntak ding Topa’n hong deih ahi hi.
Tua ahih manin, ute naute, leitung ah tawm vei I nuntak sungin ka masuat dingin bang hiam cih lungngai ni. Ka nuntakna a bei ciangin Topa kiangah ken bang tawnpih ding ka hiam? Pilna, siamna, min leh vang, neih leh lamh, sum leh paii te vantung ah ki tonpih thei lo ding hi. Tua te pen Vantunggam a dingin met bawl sawm ni. Mite phat tuamna dingin na hoih sepna in zang ni. Topa gam tangzai na dingin zang siam ni. Cimawh dong tuak te a dingin hawm siam ni.
Tua hileh, Topa mai ah I din ni ciangin “ka nasem hoihpa aw, kei tawh mang khawm ni” Topa’n hong ci ding hi.