Homily by Rev. Fr. Paul Muan Lian (May 20.2022)

Homily By Rev. Fr. Paul Muan Lian (May 20.2022)
Jn 15: 12 – 17
Tuni Lungdamna Laisiangtho sungah midang khat a dingin I piak theih itna lian pen in bang ahi hiam cih Topa Jesu in eite teltakin hong gen hi. Kilawmtatna, ki-itna, ki muanna, ei leh ei ki phawklo zah liangin I lawmte ading ki piakkhiat nopna lungsim neihna, lawm tangin nuntakna piakngamna in itna lian penpen hi cih tuni Topa Jesu in hong gen hi.
Laisiangtho sungah Pasian in itna ahi hi ci-in hong gen hi. Pa Pasian in a tapa khat bek a neih hong piak zah dongin eite hong it ahi hi. Topa Jesu mahmah in eite adingin sihna hong thuak hi. Tua Topa itna lian mahmah ahih manin ama sungah I lungnopna te in cikmah hunin a mangthang thei lo, a kiam ngeilo lungnopna, a mangthang ngei lo lametna te I neih ding kisam hi cih zong hong phawk sak hi.
Tuni Topa in note khat leh khat na ki-it un ci-in thupiak khat hong pia hi. Tua thupiakna ah amah in eite midang te adingin ki piakkhiat ding hong deih hi. Ken note kong it mah bangin note khat leh khat na ki-it un ci hi. Amah in Calvary mualtung, singlamteh tungah kikhai in sihna a thuakna tawh ama itna hong lak hi. Tua leh eite in mite I itna bang tawh lak ding I hi hiam. I puak ding, I zuih ding singlamteh I pom tentan ding, tua tawh Pasian hong itna midangte tungah itna I lak ding hi cih tuni Topa in eite hong phawksak hi.
Misiangtho Paul in Pasian itna a nuntakna tawh thei ahih manin “Tua itna tawh kua in eite hong khenkhia zo ding ahi hiam” ci-in na kiko hi. Lungkhamna, gimna, bawlsiatna, gilkial daangtaakna, lauhuaina, thatna te in Christu hong itna tawh eite hong khenkhia zo ding ahi hiam? Bang hang hiam cih leh bang mah in eite ama hong itna pan hong khensat zo lo ding hi. Sihna ahi zongin, nuntakna ahi zongin, vantung mite ahi zongin, upna nei te ahi zongin, tu laitak ahi zongin, mailam hunah ahi zongin, vangliatna ahi zongin, vantung pan ahi zongin, leinuai pan ahi zongin, a kipiangsak na te khat bekin Topa Jesu Christu sunga om Pasian hong itna panin hong khentat zo lo ding hi ci-in tel takin ka thei hi ci-in Misiangtho Paul in na gen hi.
Tua ahih manin eite zong I nuntakna te sungah midangte I itna in, amaute’ hoihna phatna hang hilo, amaute thusiamna hang hilo zaw in Pasian in eite tungah hong itna lian lua mahmah ahih manin tua itna thei in, phawkin Pasian ii thupha, Pasian ii itna, Pasian ii maisakna te eite in phawkin, tua mah bangin midangte tungah I it ding tua in itna man taktak hi ci-in tuni Topa Jesu in ken note kong it bangin note khat leh khat na ki-it un ci-in hong vaikhakna te a nuntakpih I hihna tawh gah hoih gah pha a gah te I hih ding Topa in eite khat ciat thupha hong pia ta hen.