Homily By Rev. Fr. Paul Muan Lian (Apr 8, 2022)

Jn 10: 31-42
Tuni I sim Lungdamna Laisiangtho sungah Topa Jesu in Pasian tapa ahihna thu, Pasian ahihna thu, ama ii pianzia a genna hangin Jew mite in amah suang tawh deng lup dingin sawm uh hi.
Tuni in Topa Jesu in ama gen mah bangin Pasian tapa takpi mah ahi hiam, ahih kei leh amah in zuau khem pa ahi hiam, amah in mihaipa ahi hiam, Pasian tapa takpi mah ahi hiam cih tuni eite in a lungngaih huai mahmah thu khat ahi hi.
Tu kaal Laisiangtho te sungah Topa Jesu in ama ii hihna leh pianzia te hong gen tawntung hi. Amah in kei in khuavak ka hi hi, khuavak na up uh leh note in khualzing sungah na om nawnkei ding uh hi, note in ka kammal te na up uh leh na zuih uh leh, na nuntakpih uh leh ka nungzuite na hi ding uh hi. Ka nungzuite in thuman thutak thei ding uh aa, tua thuman thutak in suahtakna pia ding hi. Kei in Abraham pianma in ka om khin zo hi cih ahi zongin ama pianzia te hong gen hi. Hi bangin agenna hangin Jew mite in suang tawh denglup dingin asawm ahi hi.
Ahi zongin Topa Jesu in Pasian a kineihkhem hi lo hi. Amah in mihing suahna hong la Pasian ahi hi. Pa Pasian leitung mite hong honkhiat nadingin hong sawl a it mahmah a tapa ahi hi. Jew mite in ama pianzia te asan theih loh uh ciangin Topa Jesu in “Note in kei nong up kei uh leh, ka gen thu te na san theih kei uh leh phamawhlo hi. Ka gamtatna te en in um un ci-in hong gen hi.
Ama gamtatna te in cina te damsak hi. Mittawte mu sak hi. Tui mawkmawk pan Lenggahzu suaksak hi. Ama nalamdang bawlna te in Pasian ii itna leh Pasian vangliatna te hong lak hi. Tua ahih manin ka gen thu te na um zo kei uh zongin ka gamtatna te en in mu unla thei un, Pasian um in ci-in tuni Topa in hong gen ahi hi. Tua in thuman thutak ahi hi.
Gamtatna in kampauna sangin thu bunzaw hi cih paunak om hi. Tua mah bangin Topa Jesu in kammal bek tawh a gen hilo in, ama ii gamtatna thu hong gen ahi hi. Tua ahih manin Topa Jesu in ka gen thu te tungah kinga kei unla, ka gamtatna te en unla um un ci-in Jew mite tungah a gen ahi hi. Tua mah bangin eite in zong I kampauna te sangin I gamtatna te tawh lamhoih lamman, I pianzia, Pasian tanu tapa I hihna te alakkhia zo, teci apang zo te I hih ding kisam hi.
Gandhi in bang gen hiam cih leh “Kei in Jesu Christu ka um hi. Ahi zongin Christian te ka um kei hi” ci hi. Ei Christian te in I gamtatna tawh I upna te I lakkhiat zawhloh man ahi hi cih hong phawksak hi. Tua ahih manin Topa Jesu in tuni eite hong hilhnopna in bang hiam cih leh amah in ama Pasian hihna pen a gamtatna tawh hong lak hi cih thu eite in I etteh ding ahi hi.
Tuni Laisiangtho a tawpna lamah Topa Jesu in amah a denglum nuamte kiang pan ki hemkhia in mundang khat ah pai hi. Nidanga John in tui a sawpna mun Jondan gun lamah pai hi. Tua lai ah amah taam aa, mi tampi ama kiangah pai uh hi, tua lai ah mi tampi in Jesu um uh hi ci hi. Cihnopna in Topa Jesu a galbawl, a that nuam mi a om hangin amah a um mi zong tampi na om veve hi cihna hi.
Tua ahih manin eite in zong Topa Jesu in Pasian hi cih a um, ama nung azui, amah abia te I hih zawh tawntung nangin eite in a kisam upna te Pasian kiangah thuum kawm, ngen kawmin eite mahmah in Pasian tanu tapa I hihna te kampauna bek tawh hi lo-in, I gamtatna tawh a lakkhia zo te I hih theih na dingin eite khat ciat Topa in thupha hong pia tahen.