Homily by Rev. Fr. Maximian Mungpi (May 24, 2022)

Jn 16: 5-11

 Tuni Lungdamna Laisiangtho sungah Topa Jesu in amah Leitung nusia in Pa kiang a pai ding thu a gen ciangin nungzuipite thanem in a om na thu I mu hi. Tua ciangin Topa Jesu in kei ka pai khiat leh note phattuam nading hi zaw hi. Ka paikhiat khit ciangin note tha hong pia ding, thuman thutak hong hilh ding Kha Siangtho Pasian ka hong sawl ding hi ci-in hehnepna pia hi.

 Leitung ah khat leh khat ki ngaihna, ki zopna te I et ciangin a dan tampi tak a om na te I mu thei hi. Gentehna in Singkung nih a ki nai na pen a puatham bek ki mu in amau khat leh khat ki thu theihna omlo hi. Lei tungmite khat leh khat ki naihna, ki zopna I cih tak ciangin a man ki zopna in khat leh khat a ki lamna hangin upna sungah Kha tawh khat leh khat ki thei in, ki thukhual in, khat leh khat phat tuam nading ki ngaihsutsak na pen a thuman ki ngaihna/ kizopna ahi hi.

 Tuni Topa Jesu in kei ka paikhiat khit ciangin Kha Siangtho kong sawl ding hi ci-in a gen na in aman nungzuipite a nusia hilo in, ama pumpi taksa tawh leitung I muh zawh nawnloh hang, ei amah a um, ama nungzuipi te tawh a ki nai veve, ei ii phat tuam nading, ih mailam nuntakna a hi zongin, Kha nuntakna ah I thanem loh na ding Topa Jesu in hong deih ahih manin ama pai khit ciangin Kha Siangtho Pasian eite kiangah hong sawl ding hi. Kha Siangtho Pasian in eite nisim nuntakna, Kha nuntakna sungah hong ompih den hi.

 Tua Kha Siangtho in eite bang hong hilh hiam ci-in Laisiangtho sungah I et ciangin Topa Jesu in tua Kha Siangtho in mawhna, dikna leh thukhenna cih te hong pulak ding hi. Mawhna cihin Topa Jesu sang lohna hi. Dikna in Topa Jesu in amah a sawlpa kiangah a ciahkikna pen dikna hi aa, tua banga a pai tak ciang bekin Kha Siangtho Pasian hong pai ding hi. Thukhenna in hi leitung a uk dawi mangpa in thukhenna thuak ding hi ci-in Kha Siangtho Pasian ei thuzui te tua nam thum teltak in hong pulak ding hi ci hi. Ih nisim nuntakna ah zong Kha lam ah ahi zongin I thanemna te, khat veivei ciangin I lungkiatna te I neih tak ciangin tua te paaikhia in, lungkiat thanemna te pen dawi mangpa galhiam ahi hi. Kha Siangtho Pasian leitung a uk dawi mangpa pen thukhen khin hi.

 Tua ahih manin I nisim nuntakna sungah Topa Jesu in amah tawh I ki nai den zawh nangin Kha Siangtho Pasian hong sawlna thu phawk kik in ei ten zong I nuntakna sungah Topa Jesu in hong ompih den hi cih thu phawkin ama deihna bangin a nungta zo tanu tapa te I suah zawh nang, tuni I zak Pasian thu te a nuntakpih zo te I hih zawh nangin Topa’n thupha namkim hong pia ta hen.