Homily By Rev. Fr. Maximian Mungpi (March 29.2022, Tue)

Jn 5: 1-16
Christu sungah kong it thuzui ute naute, tuni Lungdamna Laisiangtho sungah bang za I hiam cih leh kum (36) sung, cina a om mipa Topa Jesu tawh a kituahna I sim hi. Jerusalem pai na lampi gei, bual khat ah cidamna ngah nadingin bual kilok a ngak mi tampi te lakah tua mipa zong khat ahi hi. Topa Jesu in ma thu a zak ciangin hehpihhuai sa-in, ama kiangah va pai-in nadam nuam hiam ci-in dong hi. Tua mipa in tua bual tui a kilok ciangin kei hong pua ding mi omlo hi ci-in na dawng hi.
Topa Jesu in diingto inla, na lupna phek la-in pai-in ci-in thu pia hi. Tua ciangin cina pa a diing leh diing zo pah in dam siang pah hi cih thu I za hi. Topa Jesu in bang hangin cina pa kiangah na dam nuam hiam ci-in dong ahi hiam cih leh mawhna pan kikhel kik aa, Pasian thu leh la lam ah I nuntak ding Topa Jesu in a dotna na hi zaw hi.
Tu hunah mi tampite in nuntakna nuamsa keng, haksa sa ing I cih hangin ei mahmah panin I kikhel ding pen hamsa kisa hi. Cina pa in zong damna angah nop hangin amah leh amah kikhel ding hamsa sa hi. Tua ahih manin hih Vuahun sung I nuntakna sungah Pasian tawh kizop kikna te I neih zawh nangin hanciam ding hong thupi mahmah hi. Bang hang hiam cih leh Vuahun sung pen Pasian tawh I nei theih nang hunhoih hunpha ahihna te phawkin eite ii nuntakna sungah ka lungkham lua I cih leh zong, tua lungkhamna sungah tucip loin diing to in Pasian tawh I kizopna te sittel kikin Pasian deihna bangin I nuntak ding tuni Laisiangtho in hong theisak hi.
Laisiangtho lui sungah kamsangpa Ezekiel in tui in cidamna leh nuntakna hong pia hi ci hi. Tua mah bangin tuni Laisiangtho sungah zong tui kilok ciangin mite in cidamna ngah thei, ahih hangin tua tui kilokna sungah a tung masa pen te bekin cidamna nangah hi.
Ahih hangin tuhunin Mesiah Topa Jesu hong tungta aa eite in upna tawh Pasian lam ah kilehkik in, eite in kikhel nopna lungsim tawh I pai leh cidamna, gupkhiatna te I ngah ding hi. Tua ahih manin hi Vuahun sungah I sep dingin thungetna te ahi zongin, piakkhiatna te ahi zongin, pumpi kidekna te ahi zongin Pasian tawh I ki zop kik nang, I kikhel kik nang thupi mahmah hi.
Sabbath ni ahi phial zongin I nasepna te in mite a lungkimsak, thupha bawlna ahi hi. Tua ahih manin Topa Jesu in Sabbath ni te tanglo in mi cina te amuh leh damna pia, ahehpih thei mahmah Pasian ahihna te tuni in hong lakkhia hi.
Tua ahih manin eiten zong Pasian hehpihna sungah nungta in, Pasian tawh I kinaikik theih nang thungetna te hahkatin, pumpi kidekna te hi vuahun sungah ahi thei pen in bawlin, hong tung ding Paska pawi pen kilawm kituak takin lungnopna tawh I muak theih nang I hanciam ding tuni Laisiangtho te tungtawnin eite tha hong pia hi. Aza angai mimal kim ciat tungah I biak Pa Pasian in ama itna sungah hong cing hong kem den ta hen.