Homily by Rev. Fr. Mark Khai Dal. (July 28, 2022)

Thursday of 17th Ordinary Week Year- b

Mt 13: 48 - 56

Christu sungah om kong-it thu zui, u leh naute aw tu-ni I zaak Misiangtho Matthew at lungdamna laisiangtho in Vantunggam pen bang tawh hong etkaak hiam cih leh a ngahsa ngasate kaaikhawm kikpa-in tua ngasate sung lakpan a limci leh a limcilo atengkhia ngabengte’nasep na tawh hong etkaak hi. Adang khat in gen kik leng, Vantung gam leh ngasa namkim bek tham lo a neu a lian namkim tawh a dim ngasa matna ngeen tawh a tehkaak hi. Nga hoihte ki tawm kik, ki kem kik ding a nga hoihlo te ahih leh a ki pai khia mah bangin, “Leitung hun abei ciangin vantung mite hong kumsuk in midikte’ lak pan migilote khen khia-in meiphualpi sungah khia ding uh a, tua lai-ah kahna le hagawina a om ding hi”  ci-in ah Laisiangtho in hong gen hi. Topa Jesu kammal in nitawp ni ciangin mipawlkhat te, meikuangpi sungah mei tawh haal-na atawtung thuak ding hi cih thu hong theisak hi. Kikheelna neilo in ahoihlo lampi tawn, a hoihlo nate I sepkhiat teh ih kha nuntakna te  ei mah mah in a susia I suak a, tawntung Pasian haamsiatna, gawtna I thuak ding mawk thei hi. Ngamat na ngeen in hih leitunga om Pasian’ Pawlpi’ lim hi a, tua pawlpi tungtawn-in Pasian’ mai I zon ding, Pasian I pom kik ding hong gen nuam hi.

Tu ni I lungngaih ding nam thum om hi.

Lungngaih ding khat na ah, Lungsim sunga asia, a pha khentel theine(conscience) I, aman phatna thu hi. Lungsimsung-ah theihna in Pasian’ thukhensat na maleep na hi. Thu I nget tak teh I lungsim sungah, a sia apha khen tel theihna in, a hoihlo aa nuntakna, kampau khialhna leh gamtak khialh nate  hong sit tel sak hi. Nisim aa I sepkhiatte I ngaihsun kik dan, i lungngaih kik dante  I zongsat ding thupi a, Pasian tawh hong ki gamlasak nate, munte ngaisun kik in I ki-kheel ding thupi hi.

Lungngaih ding 2 na ah, Hell gam om hi cih pen thuman thu hi cih theih telna I neih ding honglak hi.  Tawp nunung thukhenna leh Hell khuk, om taktak hi cih thu I nialkhak leh a theilo ki neihte tawh I kibang ding hi. Mawhna lian tawh a nunta Mihing khat a sihteh, a kha in Pasian tawh ki tuam khenna thuak in Meikuangpi sung ah a kiading hi. Tua mun ah tawntung gimthuakna a thuakding hi cih-pen I phawk den kul hi.

Lungngaih ding 3 na ah, I nuntak hun a bei ciang Christu’ thukhenna tokhom mai-ah a tung ding I hi a, tulai tak I neih pumpi tawh I om sung-in I gamtatna a sia le a phate tawh ki zui-in eite khatciat in  thukhen na a sang tek ding I hi hi. Pasian in I tuam neih I nuntak na tek pen I bawl tawm ding, ih puahphat kik ding hong sam hi. Pasian in eite hong bawl’ lai-in siiklim(Setyoke) in hong bawl hi lo-in, a ma lim leh mel tawh a kibang ding in hong bawl bek tham lo-in, suakta-tak in thu leh na te teel theihna zong hong guan a hi hi. Tua theihteelnate I zatna tawh ki zui in, a sia I teel leh a sia bangin thukhenna kithuak ding a,  a hoih, apha sem ding, bawl ding a, I teel leh thukhen hun teh, suakta tak in tua I teel na tawh ki zui in, thu hong ki khen ding hi cih-pen I kimangngialh bawl loh ding, I phawkden ding thupi mah mah hi.

Na hoih napha sepkhiat hun ding I nei lai a, tua I neih hunsung teng in, tawntung nuntakna hongpia thei lampi tawn ding in, eite hong bawl Pasian in hongsam hi. Eite hong bawlpa a hi, I Pasian I deihna bangin, a nungta zo, a kikhel kik zo, tanu tapa te I hih den na ding hanciam ni.

*** Topa Pasian in na omna ciat uh ah note tawh hong om khawm tawntung in, thupha hong pia tawntung ta hen.