Homily by Rev. Fr. Mark Khai Dal. (July 21, 2022)

Christu sungah om kong it thu zui u leh nau te aw “Pasian in bil nih hong pia a, kam khatbek hong pia hi” bang hang hiam cihleh amah in Thu I ngaih ding ong deih zawk man hi a, kam tawh I genkhiatsang azah nih in bil tawh thu I ngaih ding Pasian in hong lunggulh man hizaw hi. Thungen te I ngaihtak teh I theihloh thute, I zaakngei loh thu te I za a, thu theihna I khang hi.

Tu ni I zak Matthew at Lungdam na laisiangtho 13:10-17 in bang hong gen nuam hiam? Topa Jesu I nungzuipi khempeuh te in Ama’ bawlkhiat-na, sepkhiatnate, a genkhiat thugentehna khempeuhte tel zo-lo ding hi na ci hi. “Note in ngai nagi nappi-in, na tel thei ngei kei ding uh hi. En en na pi-in, na mutel thei kei ding uh hi.” Kamsang pa Isaiah I a gen kholhna thu te tun in in atang tung ta hi. Pasian kammal I zaa a, I ngaih ciang in ei zaaknop na munte bek, ei deihmunte bek, ei lungsim tawh a kituak thute bek I ngaih takteh Pasian’ hong gennopna thute I za zonawn lo a, I mutel zo nawnlo thei hi. Topa Jesu in thu a gen ciang Thungenteh na khat tawh gen zel, adang khat tawh a gen kik zel hang pawlkhat ten atel zo kei hi. Ahih hang Pharisees te leh Lasiangtho siam te in Pa Pasian’ Kammal a genkhiat lam telkhia, mukhia, Topa Jesu I anuntak zia teng zong a teltheih uh hang Topa Jesu in Tothum Pasian lak ah To nihna a hihna leh Pasian taktak a hih na thu, Messiah eite hong Gumkhia pa ahihna thute tel mah taseleh um nuam lo in langpang nuam zaw uh hi. Messiah in kua beh leh phung pan hongsuak khai ding, koi ah hong khangkhia ding cih te a teltheih khit uh hang a up ding leh a san ding uh hamsa sa mah mah hi. Tuhun ei Christian te zong Topa Jesu thu I theihnop teng leh theihding a akilawm teng i theih khit hang, i up ding leh athute ngai in i nuntaak pih ding pen hamsa I sa thei kha hi.

“Pumpi tawh I kinai semsem hang khathu tawh I kigamla semsem thei-a, kha thu tawh I ki nai semsem teh pumpi in I ki gamla semsem thei lai zel hi.” Siangtho pumpi tawh I kinai semsem mah bang in khanuntak na tawh I kinai semsem ding kisam hi. Pasian tawh I kinai semsem a, Pasian thu I zaksem sem teh Pasian thu I tel loh lam hong ki lang semsem a, Pasian I vangliatna, minthan nate hong kilang sem sem hi. Topa Jesu in thugentehna te azatna thu in athu gen te I mu a, I zak ding, leh tua I muh I zak, thu te I tel semsem na ding thu ahi hi. Hong gen thugentehna te I tel semsem na ding in-ah, eiten bang hih ding hiam cihleh Pasian it kawm leh laukawm in a ma hong gen khiat thu te I ngaisiam ding hi.

A masa pen in bang hih ma sa ding I hiam? I zon kul hi. Bang teng zong ding? Pasian I it theih na ding Pasian zong masa ding hihang. Pasian I tel theih nading, thuman thutak tawh I nuntak na ding leh amah tawh pumkhat isuah na ding Pasian zong ding hi hang. I nuntak na sungah mawhna te paikhia in mawhna hong piangsak thei munte, nate, kampau, luhek te I kidop ding leh thungetna tawh I nuntak ding kisam hi. Tuate in ei tungpan Pasian’hong lametna te ahi hi. Itna bulphuh in Pasian tawh I kipumkhat na dingin, I lungtang sungah ei ten sepkhiat nopna lungsim I neih kul hi. Mi dang te ngah pakpak loh hamphat tuamna leh Pasian hong piaksa thupha te ngaihsun kawm kawm in Pasian tawh I kinai sem sem na ding in hanciam ni. Pasian mai ah pai in, tu in, khukdiin zel-in Pasian in eite khiang pan bang deih hiam? Bang lunggulh hiam cih I lungngai ding hi.

‘Pasian in ei te hong teel khin ta a, ei ten zong a mah I tel kul ta hi.” Amah I tel ciangin I nuntak na sung ah amah mah thupi bawl zaw a, thupi sak zaw in, I lungsim, I pum pi, I kha leh I thaneih khempeuh tawh, I ngaihsutna khempeuhte tawh I it kul hi. Pasian’ hong gen thu-te limtak ngaisiam in, I ngaih tak teh zong ei deih munt bek ngai a, Pasian’s deih thute koicing bang hi-a, ei tungah hong gen nop thu te in koi-ci dan hi cih te limtak a, a ngai siam leh atel siam zo tanutapate I hih semsem na ding in han ciam ding hi hang.

*** Topa Pasian in na omna ciat uh ah note tawh hong om khawm tawntung in, thupha hong pia tawntung ta hen.