Homily by Rev. Fr. Mark Khai Dal (Aug 11.2022)

Christu sungah kong it thuzui U Leh Nau te aw, zum lam thubuaina a om ciangin ah, thukhun a palsat mi leh bawlsiatna athuak mi ci-in ah mi nih a ki hel kul hi. Mi tung ah mawhna I bawl tak ciang in zong, khutkhial pa leh athuak pa ci-in zong mi nih ki hel leu leu hi. Tu ni I zaak Misiangtho Matthew at lungdamna laisiangtho18: 21-19:1 ah, Topa Jesu in eitung mawh hongbawlte tungah bangzah ciangdong mawhmaisak na pia thei ding cih thu hong gen hi.

Misiangtho Peter in mite’n nang tungah mawhna hong bawl a leh, “Sagih vei mawhmaisak ding” na ci-hi. Jew minamte ngeina ah “Mawhmaisak na Thumvei” kaan pia lo ding ki cing ta na ci uh hi. Jesu in a hih leh “Sawm sagih mun sagih vei dong in maisak ding” cih-thu eite tung hong pia hi. Cih nopna ah mi tung ah mawhmaisakna I piak ciang-in bangzah bangzah cih ciangtan om lo-in mawhmaisakna atawntung a pia un hong cihnop na hi zaw hi.

Mawhna tampi tawh, Pasian mai ah pai-in mawhmaina inget sim-in mawmaina hong pia kei ning ci-in ah Pasian in cik mah hun-in hong nial ngei lo hi. Mawhna nei ei mihingte I hihleh Pasian tung ah bangmah tawh a kithuk kik zawh loh ding leiba khat I neitek hi. Tua leiba aveng na ding, amai na ding eitungah mite’ hong bawl mawhnate I maisak kul hi.

Mawhmaisak na tawh kizui-in nam (3) hong hawm nuam ing.

Nangaa ding-in mawhmai sak in.

Mawmaisak na pen kua mah aading hi-lo zaw-in, ei aa ding mah na hi zaw hi. Mawhmaisak thei-lo mi-in apai pai na ah vangik leh guu apua kawi kawi mi tawh aki bang lel hi.

Mite’ mawhna maisak in.

Mihing na hih na I a manphatna thu tungtawn-in mi hazaatna, mi gensiatna, mi bawlsiatna na thuak tak teh hong bawlsiate aading thungetsak in mawhmai pia in.

Nang leh nang mawh kimaisak in.

“Tuibuasa ki luak kik thei nawnlo” cih kammal om mah bangin Pasian tung leh Siampi pa tungpan mawhmaisakna I ngahkhin na pi’n ei leh ei I kimai sak zawh loh teh mailam ah I sep ding te kisem zo nawn lo, tulai a isep ding te lah kisem zo nawnlo thei hi. Tua a hih man in ah Nang leh nang mawhna kimai sak na-in na kihehpihna lah-na zong ki ci thei hi.

Mite’mawhna I maisak ciang-in lungsimtak takpi tawh I maisak ding Pa Pasian in tu ni izak lungdamna Laisiangtho tungtawn-in thu hong hilh hi. Mite’ mawhna ka maisak mah bangin ka mawhna zong hong maisak in ci-in zong thu I nget den kul hi.

Thuhkik nopna lungsim neihna tawh ki it ki lemna a ki ngah zawh loh ban-ah tua lungsim-in Pasian tawh I ki nai zawk semsem na ding lampi, ngaihsutna, kampau te na ngawn hong khaktan sak lai hi.

Mawh ki mai sak zawhloh na pen akhum mahmah guza a hih leh Mawh kimai sak na in akha mahmah zatui na hi pah hi. Sunglam damna a thupit lam phawkciat ni. Mawhmaisak na pen ei leh ei hong damsak bek thamlo, I natna leh I mawhna na ngawn hong damsak lam phawk ciat ni.

Topa Jesu aw ka sunga aom kei hong nasak meikuang pi ka suhmit zawhna ding thupha hong pia in ci in ah thungen kawm-in Pasian tung ah Thupha gen ni.

*** Topa Pasian in na omna ciat uh ah note tawh hong om khawm tawntung in, thupha hong pia tawntung ta hen.