Homily by Rev. Fr. Joseph Zo Mung on Sixth Sunday of the Year 2020

Homily by Rev. Fr. Joseph Zo Mung Hun Nautang Nipi (6) na Lungdamna Lai Siangtho (Mt 5:17-37). 17. “Kei pen thukham ahi zongin, Kamsangte’ thuhilhnate ahi zongin a beisak dingin hong pai hi, ci-in hong ngaihsun kei un; a beisak dinga hong pai ka hi kei a, a kicingsak dingin hong pai ka hi zaw hi. 18. Bang hang hiam cih leh aman takpi kong genin ah, van le lei a mangthang zongin a vekpi-in a kicin matengin hih thukhamte a neu pen ahi a, laimal sutvom neu khat nangawn ahi zongin maimang ngeilo ding hi. 19. Tua ahih manin hih Pasian’ thupiakte’ lak pan a neu khat nangawn palsat a, midangte zong a zuih lohna dingin a hilh peuhmah vantung gam sungah a neu pen hi ding hi; ahih zongin thupiakte zui-in midangte a hilh peuhmah vantung gam sungah milian hi ding hi. 20. Bang hang hiam cih leh note kong genin ah, note’ dikna in lai siangtho siamte le Pharisee-te’ dikna sangin a hoih zawk kei uh leh, vantung gam sungah na lut thei peuhmah kei ding uh hi. Hehna tawh kisai Thuhilhna (Lk 12:57-59) 21. “Tanglai mite’ tungah, ‘Mi na that kei ding uh hi; mi that peuhmah in thukhenna a thuak ding hi,’ ci-in a kigenna thu na zaksa uh ahi hi. 22. Ahi zongin ke’n kong genin ah, a sanggam tungah a hehte peuhmah in thukhenna a thuak ding hi; a sanggam’ kiangah, ‘Kimanna neilo,’ci-in a ko mi in uliante’ mai-ah thusitna thuak ding uh a, ‘Mihai,’ ci-a a simmawh mi peuhmah hell meikhuk sungah khulna a thuak ding hi. 23. Tua ahih ciangin na biakna ding nate ap dingin biakna tau ah na pai laitakin na sanggam in na tungah lungkimlohna khatpeuh a neihna thu na phawk leh, 24. na biakna ding nate biakna tau mai-ah nusia phot inla, pai-in amah tawh kilemna bawl masa in; tua khit ciangin paikikin na biakna nate pia pan in. 25. Thukhenna zum hong tun na langpa tawh zum na paikhop laitak a hun a hoih lai-in kilemna ding hanciam mengmeng in. Tua hi kei leh amah in thukhen mangpa’ khut sungah hong ap ding hi. Thukhen mangpa in kumpi ulianpa’ khut sungah nang hong ap dinga, amah in thong sung hong denna ding hi. 26. Aman takpi kong genin ah, na liau sum ding na piak khit matengin thong sung panin na suakta ngei kei ding hi. Numei le pasal Mawhna tawh kisai Thuhilhna 27. “Numei le pasal mawhna na bawl kei(c) ding hi,’ a cihna thu na za khin uh hi. 28. Ahi zongin ken kong genin ah, mawhpih nopna tawh numei khat peuhmah a ente in a lungsim sungah tua numei tawh a mawh khin ahi hi. 29. Na taklam mit in khialhna hong tut leh khelkhia inla paimang in; bang hang hiam cih leh na pumpi bupin hell khuk sung na tun sangin na pumpi na khat pelemin vantung gam tung lecin nang aadingin hoihzaw hi. 30. Na taklam khut in mawhna hong tut leh sattan inla paimang in; bang hang hiam cih leh na pumpi bupin hell sung na tun sangin na pumpi na khat pelemin vantung gam tung lecin nang aadingin hoihzaw hi. Kimakna tawh kisai Thuhilhna (Mt 19:9; Mk 10:11-12; Lk 16:18) 31. “ ‘A zi a ma nuam peuhmah in makna lai pia ta hen,’ cih thu a omsa ahi hi. 32. Ahi zongin keimah in note’ tungah kong genin ah, pasal dang tawh a mawhna hang longal thu dang khatpeuh paulapin a zi a mak a, a zi in pasal a neihkik leh numei le pasal mawhna(d)a bawl a suak hi. A kimasa numei a teenpih peuhmah mi’ zi tawh a mawh a suak hi. Kiciamna tawh kisai Thuhilhna 33. “Tua banah, khanglui mite’ kiangah, ‘Zuauthu tawh na kiciam kei un, Topa’ tungah na kiciamnate(e) ciampel kei unla, ama tungah na kiciam bangun tangtun un,’ a kici thu na za khin uh hi. 34. Ahi zongin keimah in note’ tungah kong genin ah na kiciam peuhmah kei un. Vantung tawh na kiciam kei un, bang hang hiam cih leh vantung in Pasian’ tokhom ahi hi; 35. Leitung tawh na kiciam kei un, bang hang hiam cih leh leitung in Pasian’ khe ngakna ahi hi; Jerusalem khuapi tawh na kiciam kei un, bang hang hiam cih leh Kumpi lianpa’ khuapi ahi hi. 36. Na lutang uh tawh zong na kiciam kei un, bang hang hiam cih leh na samzang khat a kang a vom dingin na bawl thei kei uh hi. 37. Na gen thute peuhmah uh ah a hite, ‘Hi mah,’ ci unla, a hilote, ‘Hi lo,’ ci un. Hih sangin tamzaw leh hoih lohna panin hong pai ahi hi.