Homily by Rev. Fr. Joseph Zo Mung (May 25.2022)

Jn 16: 12 – 15

 Christu sungah kong it thuzui ulehnau te tuni Lungdamna Laisiangtho sungah Topa Jesu in thuman thutak tel ding a hamsatna thu tel takin hong hilh hi. Tuni Laisiangtho sungah Topa Jesu in Kei mahin note kiangah kong gen ding thu tampi ka nei hi. Ahi zongin note in tu laitakin na sang zo, na tel zo nai kei ding uh hi. Thuman thutak Kha Siangtho a hong pai tak ciangin thuman thutak thu a vekpi in note hong hilh ding hi. Bang hang hiam cih leh amah in ama ut thu in hong gen lo ding aa, a zaksa thu te bek hong gen ding hi. Tua thamlo in mailam ah a piang ding thu te zong note hong hilh ding hi ci hi.

 Thuman thutak I tel na dingin Kha Siangtho hong pai ciangin amah tungtawn in telna ki nei pan ding cih pen Topa Jesu in a nungzuipi te na gen khol hi. Topa Jesu in a nungzuipi te khe a sil sakna, hi-in ka sa hi, la unla ne un, hi-in ka si hi la unla dawn un a cihna thu te pen, Nungzuipi te in Kha Siangtho a san ciangun na tel pan uh hi. Leitung ah tulaitak in zong en lehang, pawlpi tampi hong piangna te, gal leh sa hong piang na te, ki tot ki selna te pen thuman thutak I tel loh hang hi. I tel dan a kibatloh hang zong ahi hi. Hih thuman thutak tel na dingin subjective truth leh objective truth ci-in mang pau in namnih om hi.

 Topa Jesu ii hong hilhna thu te pen objective truth hi-in, ama gen bang lianin Kha Siangtho in hilh cianna hong nei hi. Subjective truth cih ciangin apiang thu tungtawn in I mit muhna te tawh I khensatna, kei muh dan, kei tel dan aman hi I cihna in buaina hong piangsak hi. Tua ahih manin thuman thutak I tel na dingin hun I lak kul hi. Lei tung thu mahmah ah zong Nu leh Pa hong itna pen I naupang lai-in ki tel lo aa, I khangno lai-in zong ki tel zo lo aa, ahi zongin nu leh pa din mun I tun ciangin aw..ka neu lai aa ka nu leh ka pa hong thu hilhna te tun tel pan ing ei ci-in a ta te tungah ahilh sawn zong mi tampitak om hi. It na nangawn zong tel ding haksa thei hi. Topa Jesu hong hilh thu in I mitmuh bek tawh thu a khensat pahpah ding hilo aa, a om thu tungtawn in I khensat ciangin Pasian in bang deih hiam cih I kan masak ding kul hi. Ei ii mitna bek tawh thu I khensat pahpah ciangin khialhna a om na thu tuni Laisiangtho in hong thei sak hi.

 Tua ahih manin Topa Jesu hong hilh thu te zong nungzuipi te in Kha Siangtho a san tak ciangin tel in tua Kha Siangtho lam hong lah ciangin hong tel sak mah bangin tuni I Pawlpi sung zong ah Upna pen zongin I muh ciangin a ki tel semsem hi ci-in Teologian ten gen hi. Hi thu tawh ki sai-in Misiangtho Aslem in “ka up theih na dingin ka tel ding ahanciam ka hi kei aa, ka up manin a tel ding ka hi hi” ci-in I up ciangin a tel semsem ding I hihna thu hong thei sak hi. Misiangtho Augustine in bang ci hiam cih leh “Ka up manin ka tel aa, ka tel manin ka um hi” ci-in upna leh telna thu a ki pumkhatna zong hilh cianna hong nei hi.

 Tua ahih manin eite in Pasian in thuman thutak hi cih I up khit ciangin tua I upna panin ama hong hilh thu te pen bang ci bangin aman a deih hiam cih pen Kha Siangtho tungtawn in a thei pan ding I hi hi. Tua ahih manin tuni in eite in Kha Siangtho a om lam phawkni. Pa, Tapa, Kha Siangtho hite pumkhat hi-in Pa ii hong it na pen Tapa in I mit muh mahmah in hong lakkhia aa, vantung gam thu te hong gen khia in, tua hong gen thu te pen Kha Siangtho in I tel theih na dingin lam hong lak hi. Tua ahih manin I nuntakna te sungah I muhna te ciang tawh, I telna te ciang bel tawh khensat lo-in Pasian in bang hong gen naum hiam? Kha Siangtho lam lahna ngai ni. I nuntakna te ah Kha Siangtho a om lam phawkni. Kha Siangtho lamlahna tawh khensat in na sem lehang, Topa Jesu hong piak ki-it na, ki lem na, lungnopna te I ngah ding hi.