Homily by Rev. Fr. Joseph Zo Mung. (May 19, 2022)

Jn 15: 9 - 11
Christu sungah kong it thuzui NulehPa, ulehnau te, tuni Lungdamna Laisiangtho sungah Topa Jesu in “Pa in kei hong it bangin note ken kong it hi. Ka itna sungah om un. Kei mah in ka Pa thupiakte zui aa, hong itna sungah ka om mah bangin note in ka thupiakte na zuih uh leh ka it na sungah na om ding uh hi. Ka lungnopna note sungah a om theih na dingin ahi zongin, note lungnopna a ki cing theih nading ahi zongin, hi thu te note tungah kong gen zo hi” ci-in Topa Jesu in itna tawh thu ki mangna thu leh ama neih lungnop ki cinna eite tungah hong piak nopna thu tel takin hong gen hi.
Tua ahih manin eite in bang hun ciangin thu kimang zo ding I hi hiam cih leh I it te thu ki mang zo hi. I it te thu I mang ciangin lungnopna om hi. Topa Jesu in a Pa Pasian it ahih manin a Pa ii thupiak khempeuh hoih takin mang zo in, ka Pa ii thupiakte ka zuih zawh mah bangin kei ii kong thupiakte zong hong zui un ci-in eite hong zawn hi. Ka Pa in kei hong it bangin note kong it hi ci-in amah I it ding hong zawn hi. Itna leh thukimangna hi gel pen kikhen thei lo hi.
Ahi zongin leitung ah kua te thu ki mang hiam cih I et ciangin I it te sangin I kihtakte thu ki mang zaw kha thei mawk hi. Tua bang hun ciangin lungnopna kingah lo-in, lungkhamna ki behlap zaw hi. Nidang in dawi ki kihta ahih manin ki bia hi. Tu hun ciangin Pasian it I hih manin I bia aa, tua pan I ngah lungnopna pen ei sungah hong tungin nopsakna I ngah hi. Tua ahih manin tuni tu laitak I nuntakna sungah kua thumang ding I hi hiam I khensat ding kisam hi.
Kong it thuzui ute naute tuni hi Laisiangtho I sim kawmin Kha nuntakna ka ngah na dingin lam hong lakte a zui ka hi hiam, ka nuntakna hong susia thei tawmvei sung nopsakna hong pia ding dawi gilo ze-et na sungah ka om kha hiam cih phawkin leitung ah nuntakna hong pia ding, it na hong pia ding leh tawntung nuntakna, kha nuntakna dingin ngaihsunin tua te a zui thei te I hih zawh nangin hanciam ni.
Pa Pasian in ka thupiak te na zuih uh leh nopsa ding, kei nong it uh leh ka thukhamte zui ding ci-in itna pen thumangna tawh hong genteh hi. Tua ahih manin ei Pasian a it te in Pasian thu I mang zawh nangin hanciam ni. Tua banga I hih zawh nangin I biak Topa Pasian in mimal khat kim ciat thupha hong pia ta hen.