Homily By Rev. Fr. Joseph Zo Mung (March 9.2022, Wed)

Lk 11: 29-32
Christu sungah kong it thuzui nulehpa, ulehnau te, tuni Lungdamna Lai Siangtho sungah mipi te a tam semsem ciangin Topa Jesu in “Hihte a gilo khang mite ahi hi. Amaute in lim lamdang hong nget uh hangin Jonah lim longal lim dang amaute’ tungah kilak lo ding hi” ci-in gen hi.
Hi khang mite in Topa Jesu kiangah na lamdang abawl ding bek ngen hi. Ahi zongin Topa Jesu in hi lai ah Jonah sangin alianzaw mi khat om hi ci hi. Jonah in thu a gen ciangin mi tampi a kikhel na thu amaute in thei ahih manin Topa Jesu kiangah na lamdang ngen uh hi. Ahi zongin amaute sungah Topa Jesu a om lam phawk lo uh hi. Tua ahih manin Topa Jesu in amaute tel theih dingin Janah sangin a lian zaw mi khat hilai ah om hi ci-in gen hi.
Eite in zong khat veivei I leitung nuntakna ah buaina, haksatna, cihmawh zawngkhalna te I tuak ciangin hi khangmite bangin nalamdang lamen in I om thei kha hi. Kua in hong huh tam maw I ci kha hi. Ei sungah Topa Jesu a om lam kiphawk kha lo hi. Eite hong huh dingin Topa Jesu in hong ngak gige ahih lam kiphawk kha lo hi. Siangtho Pumpi mai ah I pai ding, Khi thungetna tawh thu I nget ding lam kiphawk kha lo hi. Ei leh ei a kikhel thei I hih lam ki phawk kha lo-in midang vive ki mawhsak kha lai hi. Ki ukna hoih leh, kumpi hoih leh, I vengte hoih leh ci-in ei leh ei ki khel sawmlo hi. Tuni in Topa Jesu in ei mahmah pan I kipat ding, ei ong huh nuam, I hih theih na dingin lam hong lak ding Topa Jesu om hi cih thei in I lungtang mahmah pan kisatsuah in ei leh ei a I hanciam ding a kisapna thu tuni Lai Siangtho in hong thei sak hi.
Khat veivei ciangin eite in ei ii hih theih lam phawklo in huhna I ngah ding bek I lamen kha thei hi. Romi in bang naci hiam cih leh “Zanni in kei pil ka hih manin leitung bup ka kikhel sak nuam hi. Ahi zongin tuni in ciimna ngah ka hih manin kei leh kei ka kikhel ding hi, kikhel ding ka kipan ding hi” ci hi.
Tua hih manin tuni Topa Jesu in hi lai-ah Jonah sangin alianzaw khat om hi acih thu phawkin eite sunga om, eite kha tha hong pia Topa Jesu phawkin I san theih Sacramentu te sangin, I nuntakna te sungah nalamdang te a lamen te hi nawnlo aa, I hih theih zah tawh ei mun pan ki pankhia in, ei leh ei I ki puahphat khit teh midangte a puahpha zo te I hih zawh nang hanciam ni.