Homily By Rev. Fr. Joseph Zo Mung (March 24.2022, Thur)

Lk 11: 14-23
Kha Siangtho nasepna pen ki pumkhatna hi-in, dawi mangpa nasepna pen ki khenthangna, upna leh thuman thutak pan pialna hi ci-in amasa pen in ong thei sak nuam ing.
Tuni Lungdamna Lai Siangtho sungah Topa Jesu in dawi lut mi khat sung pan dawi hawlkhiat sak ahih manin tua mipa lungdam in damna ngah hi. Ahi zongin a kiim aom mite in Topa Jesu na gensia uh hi. Tua bek thamlo in nangin Pasian tapa takpi na hi hiam? Na lamdang hong lakin ci-in nalamdang na ngen lai uh hi. Topa Jesu in tua mite lungsim thei ahih manin dawi leh dawi kido leh dawi mangpa ukna gam bei ding hi ci hi. Dawi lut mipa in Topa Jesu um in damna ngah hi. Ahi zongin a gei aom mite in mu na pi-in um lo uh hi. Tua uplahna in dawi mangpa ze-et na hi. Eite sungah zong hih mite tawh a kibang mi tampi I om hi.
Lai Siangtho masa (Jer 7) sungah Pasian in ka thupiakte na zuih uh leh keima mi na hi ding uh hi ci hi. Pasian in zuih ding upna bulpi hong pia hi. Topa Jesu mahmah in zong nungzuipi te tung pan a kizom upna bulpi ong pia hi. Ahi zongin Lai Siangtho sangkah khat peuhin hi man kei ee hong ci leh lam ki pial thei pahpah hi. Topa Jesu in ka sa ne aa, ka si a dawnte in tawntung nuntakna ngah ding hi, hi bangin na bawl un ci-in ong vaikhak bangin nungzuipite pankipan in Catholic pawlpi in ki zom toto in a ki bawl hi. Tua tungtawn in zong nalamdang tampi hong lakin mi tampi in damna ngah hi.
Tonu Maria beel in thu I ngetna te ah zong, Lai Siangtho sangkah khat peuh in RC te in Maria bia hi, tua pen man lo hi a cih pen, a bia I hih loh lam thei na pi-in dawi ze-etna I tuak ciangin I up ding haksa hi. Tua ahih manin tuni in a hi te a hi bangin, a hi lo te a hi lo bangin I muh tel theih ding thupi hi. Dawi mangpa ze-etna I tuak ciangin aman leh amanlo zong kikhen tel thei lo hi.
Topa Jesu nasepna in mite hotkhiatna hi aa, a damlo te damna piakna, a ki pumkhat lo te ki pum khat sakna hi aa, tua bangin RC te in nasem in leitung bup ah ki pumkhat zo hi. Ahi zongin dawi mangpa nasepna in a kipumkhat te ki khen thangsak, upna nei mite lam pialsak, thu man thei mite khem bawl hi. Tua ahih manin tu in Christian te sungah pawl khat leh khat ki bang hi a ci zong om lai hi.
Tua ahih manin i mit tawh I muh na ngawn, I kam tawh I gen, Lai Siangtho sungah I muh takpi te pen ong ki khem ciangin I lunghimawh thei hi. Tuni Lai Siangtho sung mahmah ah dawi lut mipa sung pan Topa Jesu in dawi ahawlkhiat amu mite in Beelzabul min suangin ahawlkhia hi na ci lai uh hi. Tua mah bangin tu hun Christian te sungah zong Catholic siangtho pawlpi ka um hi a ci mite ii upna, nungzuipi te pan hong ki zom upna te pen a telcianlo te in manlo hi ci-in Christian veve, upna picing aneilo, tua pan lam pialin a kikhenthang, Christian te ki pumkhatna dingin thungen lo-in, na sem lo-in, Christian te ki khen na dingin pawl a phuanphuan mi zong tampi tak om hi.
Kong it thuzui ute naute, tuni in I upna ki ngaihsun ni. Lai Siangtho bulphuhin a um ka hi hiam? Pasian kammal a um ka hi hiam? Nungzuipi te pan hong pai upna bulpi te a um ka hi hiam? Lai Siangtho in bang khiatna nei aa, koi pan hong pai hiam ci-in I pawlpi hong hilh upna bulpi te teltakin kan aa, I nuntakpih ding kisam hi. Hi te I tel phial zongin dawi ze-et na I thuak ciangin man lo hi a ci zong om thei kha ding hi. Ahi zongin eite in tua bangin ze-et na I tuak ciangin I upna koi man hiam cih ki sit tel in Pasian deihna I zuih ding ki sam hi.
Thuman thutak in ki khel ngeilo aa, tua thuman thutak I san aa I nuntakpih ciangin lungsim suahtakna, lungnopna ki ngah hi. Tua ahih manin Topa Jesu in ka nungzuipi te pen kei tawh a kipawl hi aa, kei tawh a kipawllo te in kei hong langpangte hi ci hi. Sacramentu te a umlo te, ama hong piak thukham te a umlo te pen amah a langpangte hi cih phawkin I upna te sungah kiptaka I nuntak zawh nang hanciam ni.
Tua ahih manin Kha Siangtho nasepna te phawkin ki pumkhatna I nei hiam? Pawlpi hong piak thukhamte ka zui hiam, ka lungsim sungah aman leh amanlo ka khen tel thei hiam, mi cih khempeuh ka um kha pahpah hiam cih kan tel in aman upna sungah I nuntak den zawh nang han ciam ni. Tua banga I hih zawh nang I biak Topa Pasian in mimal khat kim ciat thupha hong pia ta hen.