Homily By Rev. Fr. Joseph Zo Mung (March 18.2022, Fri)

Mt 21: 33-43, 45-46
Christu sungah kongit thuzui nulehpa, ulehnau te, tuni I sim Lungdamna Lai Siangtho sungah bang mu I hiam cih leh Topa Jesu in Lo neipa khat in a lo ah lenggah suanin tua lenggah a ciing nading a sep ding teng aman khit ciangin a cing dingin lokhawhlawh te sawl in amah gamdangah pai hi ci-in gentehna khat hong gen hi.
Tua khit ciangin ama ii a ngah ding teng a la dingin ama nasemte a sawl ciangin tua lokhawhlawh te in khat pen suang tawh na dengin, khat pen that in, khat pen na satgawp uh hi ci-in hi Lai Siangtho sungah I mu hi. Tua ciangin lo neipa in a tapa pai sak aa, tua lokhawhlawh te in hi pa in gamh luah ding pa hi that ni ci-in na that uh hi ci-in hi Lai Siangtho sungah I mu hi. Tua khit ciangin Topa Jesu in a nungzuipi te kiangah lo neipa in tua lo khawhlawh te bang cih ding ahi hiam ci-in a thukhen ding dan dong hi.
Tuni, eite nuntakna sungah hi pen ngaihsut huai mahmah hi. Tuni, tu laitak in I neihsa te, I sep I bawlna te en lehang, lo neipa, Topa in upna muanna tawh tavuan hong pia in hong cing hong kem sak ahi hi. Hih lo khawhlawhte in lo neipa asawl mite apai ciangin zahtak lo-in, tua te tungah itna neilo ahih manin na that in na bawlsia mawk hi.
Hih thu in bang hong phawk sak hiam cih leh eite tungah lo neipa ahi Pasian in muanna tawh neih leh lam ahi zongin, pilna siamna ahi zongin, thu neihna aana ahi zongin hong ap hi. Tua te in ei ahilo aa, Pasiana ahi hi. Tua ahih manin tua te pen ei ading bekin zat ding hilo aa, mite adingin Pasian deihna bangin lo nei pa adingin zang ding cihna ahi hi.
Tua ahih manin eite khat ciatin tuni I din munte ki entel in Pasian in kei tungah bang ciang muanna tawh kei hong ap hiam cih phawkin Pasian ii hong ap na te pen Pasian deihna bangin mite tungah azangsiam ding, mite phattuam na dingin a zang siam dingin hanciam ni.