Homily by Rev. Fr. Joseph Zo Mung. Assumption of Mary (Aug 15. 2022)

Christu sungah kongit azahtak huai thuzui nulepa ulenau te. Tuni pen leitung buppi ah Nu Catholic Pawlpi in Feastday of the Assumption of the B.V Mary ci-in Tonu Maria Vantungah apumpi leh akha tawh a kilaktohna pawi ih bawl hi.

Tonu Maria pen Vantungah a kahto hilo in akilato ahi hi. Topa Jesu pen ama tha tawh hansungpan thoto in tua khitteh Vantungah a kahto ahi hi. Tonu Maria ahih leh ama tha tawh a kahto hilo in a tapa in a laktoh ahi hi. Hih pen ei Christian te in Upna kiciamna sunga ih cih den Misite hinkikna, tawntung nuntakna thute ka um hi ih cih pen tuni a ih bawl Tonu Maria Vantungah a kilak tohna pawi in ahong ki cingsak ahi hi.

Hih upna pen Christian masa te in tanglai pek panin a na kiplet mahmah upna thuthuk khat hi-in (Sixth Century- AD-600) kim pawl panin kinak gen mahmah in mun tampi ah zong hih pawi naki bawl zelzel hi. A hi zongin November 1, AD- 1950 kum panin alianbel Siampipa Pope Pius XII na in leitungbup ah Upding thukhun (Dogma) in hong tangko khia pan hi. Bangci bangin tangko hiam cih leh “Having completed the course of her earthly life, Mary was assumed body and soul into heavenly glory” “Tonu Maria pen a leitung hun a bei ciangin a pumpi leh a kha tawh vantungah kilato hi” ci-in hong tangko khia hi.

Hibangin Pope te in Dogma upding thu khun a tangko ciangin ih theih ding thu khatin banghiam cih leh amaute ii a tangko manin Catholic thuzuite in a um pan hilo-in, Catholic thuzui mite ii kumtampi sung upna aneih khit thu pen Pawlpi-in kantelin man tak tak hi cih a muh ciangin Pope te in upna thuthuk- Dogma in a tangko pan hi cih hong phawksak nuam ing. Mipi tampitak te ii upna thu pen aman kei leh manlo hi upding hilo hi ci-in hong tangko dinga, aman thu ahih leh man taktak mah hi upding zuihding thuthuk hi ci-in Dogma in a hong tangko khia ahi hi.

Hih thawhkikna tawh kisai pen (1Cor 15:23) “A hi zongin mikhempeuh amau hun ciat a tun uh ciangin a thokik ding uh hi” ci hi. Tua banah (Mt 27:52) “Hante zong kihonga, asisa misiangtho te luang tampi hing kikin hong thokik uh hi” na ci hi. Eite zong Tonu Maria mah bangin ih siangtho leh ih leitung hun abei ciangin vantungah Tapa Jesu in hong lato ding cih pen ei Christian te ii upna bulpi ahi hi.

Banghangin Tonu Maria Vantungah kilato hiam cih en leu leu ni. A kilaktohna ahang tampi a om te sung pan ahihna leh asepna ci-in nam (3) tuak Laisiangtho tungtawnin hong gen nuam ing.

A hihna en dih ni. Tonu Maria in kua ahi hiam cih leh.

1. The Immaculate Conception - Topa Jesu ii Nu dingin teeltuam angah Mawhcilna neilo in apiang asinagtho Nungak Maria ahi hi. Hih pen (Gen 3 :15, Rev 12: 1-8), Numei suan leh Gulpi suan kilang neih ding cih thu leh “Numei khatin ni puanbangin silhin, a khe nuaiah khapi om a, a lutungah aksi sawm le nih a tuang kumpi lukhu akhu hi” cih laisiangtho Pasian kammal te in teeltuam Numei a hih lam hong thei sak hi.

2. Mary daughter of God the Father- Pa Pasian ii a tanu, Mother of God the Son (Jesus)- Tapa Jesu ii a Nu (and) Spouse of God the Holy Spirit – Khasiangtho Pasian ii a Zi ahihna thu (Lk 1:28), (Mt 1:23),

Full of Grace – Thupha hehpihna khempeuh tawh a kidim nu ci-in vantungmi Gabriel in a hopihna leh Gai-in Tapa khat na nei ding hi a cih na te ah ki mu thei hi.

3. Mary Mother of all mankind- Leitung mite khempeuh ii nu a hih na (Jn 19: 25-29) Behold your mother – John aw na Nu na en in ci-in ama nu pen ei leitung mite khempeuh ii nu dingin a hongpiakna thu ih mu thei hi.

A sepna nam tampi lak pan nam (3) en dih ni.

1. Kiniam khiatna nei. Na sila nu hing na gen bangin kei tungah piang ta hen (Fiat voluntas tu a) – (Lk 1: 38), Sila bangin a kiniamkhiat manin Pasian kammal pen mihing in ama sung pan hongsuak khia ahihna thu hih laisiangtho sungah kimu thei hi.

2. Upna picing nei, A zak bangin a zui takpi nupi hoih- gamtat hoih nu a hi hi. (Lk 11: 27-28) Mi honpi te lak pan numei khat in nang hong paai gil leh na teep nawi in thupha ngah ahi hi a cih leh Topa Jesu in bangci bangin dawng kik hiam cih leh Pasian thu za a, a zui te in thupha ngah taktak ahi uh hi ci-in na dawng kik hi.

3. Leitungah buaina haksatna tampi tuak mah ta leh lungnuam takin Pasian a phat den nu ahi hi. (Lk 1:46-55), Magnificat- ka kha in Topa aphat hi.

Hi ci bangin hihna leh sepkhiatna, hoihna phatna tampi tawh a kidim nu a hih manin Topa Jesu in a Nu Tonu Maria pen leitungah a om ding deih lo in Vantung ah a pumpi leh a kha tawh a lato hi cih thu hong phak sak nuam ing.

Hih a dang tampite en dahni, Tapa Pasian (Topa Jesu) ii Nu a hihna namkhat bek bek zong tawh vantung ah laktoh tak mah mah hi cih thu zong hong phawk sak sawnsawn nuam ing.

Bang hanghiam cih leh nang leh kei dingin ki ngaihsun dih ni: Topa Jesu bangin Vantung Gam ah Kumpi tokhom tungah a tu hi zen zen leng ih ngei aa tu ding kua ih sam masa tam maw---

Kei bang hi leng Siampi khat ka hih manin – Ka nu leh ka pa mah ka sam masa ding hi.

No zi nei- Pasal nei te in bel na Nu le Na Pa uh sam masa ding maw.. na zi a hih kei leh na pasal sam masa ding … tua bel no thu hin teh...

Topa Jesu in zong zi nei lo ahih manin … Vantung Gam Kumpi tokhom tungah a tut cing a Nu Tonu Maria mah Vantung ah a Pumpi leh a Kha tawh na lato masa in tua khitteh vantung kumpi nu ci buaih min phatna zong na pia sawn sawn lai hi.

Hih pen leitung thu in enleng zong nial theih ding leh hazat theih ding hi peuh mah lo hi. Kei hi leng zong ka Nu mah a lato masa ding ka hi hi.

Tua ahih manin Topa Jesu a it eite khempeuh in ama ii a it mahmah a Nu Tonu Maria zong ih it ding kisam hi. Tua bek thamlo in Topa Jesu in a Pa pen eite in zong Pa ih cih dingin hongpia in, a Nu zong eite in Nu ih cih dingin hongpia khia ahih manin Pasian pen Pa ih cih ding leh Tonu Maria pen Nu ih cih ding hi cih zong hong phawk sak nuam ing. Hi bangin ih sap theihna pen Topa Jesu ii deihna ih zuihna hi cih zong ih phawk dingin hong deih ing.

Tua ahih manin Topa Jesu ii Nu Tonu Maria pen Nu ih cih nop kei leh (Jn 19: 25-29) sunga “John aw na Nu na en in” a cih kammal a nial bek thamlo in Topa Jesu tawh Unau Sanggam khat hi keng ci-in a tangko te ih suak kha ding hi cih zong hong phawk sak nuam ing. Tua ahih manin Tonu Maria pen Nu aw ci-in kamkhum takin sam in ama ii pawi ni-in ei a ta te lungdam ciat ni.

Tuni in Tonu Maria Vantuan ah a kilaktohna pawi, ama ii minthanna, gualzawhna leh lungdamna pawi ih bawl kawm in ih Nu Tonu Maria tawh lungdam khawm ni.

Ama ii hoihna phatna te etteh in eite zong nitawpni ciang ih Tonu mah bangin vantungah a kilato te ih hih zawh nang hanciam ciat ni.

Ih nu Tonu Maria beelin Vantungah a kilato Kumpinu aw’ kote aa dingin thu hongngetsak tan! ci-in thungen ciat ni.

Tuni Tonu Maria Vantungah akilaktohna pawi a bawl mimal khat kim ciat tungah a kisam thupha namkim te Ih Biak Topa Pasian in hongpia ta hen! Amen.

By- Fr. Joseph Zo Mung

Add new comment

1 + 0 =