Homily By Rev. Fr. Joseph Zo Mung (April 21.2022)

Lk 24: 35- 48
Tuni Lungdamna Laisiangtho sungah Topa Jesu a thawhkik khit ciangin a nungzuite nih in lampi ah thu kikumin a om laitakin Topa Jesu in amaute hopih aa, amaute in Topa ahih lam thei lo-in sikha sa-in a lau na uh thu I mu hi.
Tua thu in eite upna bang ci ciang hiam cih I kisit tel ding hong phawk sak hi. Eite in Pasian thu um in, Pasian thu tel taktak ing ci-in I ki ngaihsut hangin I nuntakna sungah Pasian I muh ciangin, Pasian thu te I zak ciangin muang zo lo-in sikha sa-in I lau hun zong om thei ding hi.
Nungzuipi te a lau ciangin Topa Jesu in kei pen sikha hilo hing. Ka pumpi a taktak mah hi, ka liamma te hong lawng un ci-in lawng sakin, note in nek theih bang nei na hi uh hiam ci-in Topa Jesu in a dot ciangin Ngasa pia uh aa, tua emin a nek ciangin nungzuipi te in hi pen a tho kik Topa Jesu hi ci-in um pan uh hi. Tuni in eite in I upna te teci a kipang tak ciangin bekin I up pan leh tua in upna picing hi nai lo hi.
Topa Jesu in upna picing anei dingin eite hong zawn hi. Ama thu leh la te hong genkhol hi. Eite in thu I nget ciangin thakhat thu in I ngah ciang bekin a um pan te I hih leh I upna te pen picing lo hi.
Tua ahih manin eite khat ciatin I nuntakna te ah Pasian ka um takpi hiam? Nungzuipi te in Topa Jesu in na lamdang a lah ciang bekin a up pan mah bangin ken zong a um pan ka hi hiam cih ki sittel in eite in mu lo, za lo na pi-in a um te in thupha ngah zaw hi a cih mah bangin na lamdang hong lah ding ngak nawnlo in Topa Jesu hong gen te thuman hi, thutak hi, nuntakpih ding kisam hi cih phawkin I nuntakna te ah teci panna kisam lo aa, Pasian thu a um te, Pasian thu a zui te I hih zawh nangin hanciam ni. Tua banga I hih zawh nangin I biak Topa Pasian in mimal khat kimciat thupha hong pia ta hen.