Homily By Rev. Fr. Joseph Zo Mung (April 20.2022)

Lk 24: 13-35 Tuni Laisiangtho te sungah thungetna ii thupitna, Pasian thupha sanna te I mu hi. Laisiangtho masa sungah khutdawhngen khe zaw pa khat in Topa Jesu min tawh damna ngah hi. Peter te biakinnpi ah a pai ciangin tua khe zawpa mu uh aa, Peter in ko kong piak ding uh bangmah ka nei kei uh hi. Nazareth khuami Jesu min tawh damna ngahin ci-in a dom toh ciangin tua khe zaw pa in damna ngah takpi hi. Hih khe zaw pa in lungduai takin lametna tawh damna angah nangin na hanciam aa, Peter in Topa Jesu min suangin thu angetsak ciangin damna ngah takpi hi. Lungdamna Laisiangtho sungah nungzuipi nihte Emmaus khua ah apai laitakin Pasian thu kikum kawm uh hi. Amaute nung panin Topa Jesu in bang thu kikum na hi uh hiam ci-in dong hi. Amaute in zong Jerusalem khua a thupiang te gen uh hi. Tua khit ciangin nitum kuan a hih manin apaisuak sawm Topa Jesu kiangah amaute tawh a taam khawm nangin gen uh aa, tua lai ah taam khawm in an ne khawmin khomun belnen hi. Tua hi aa, nungzuipi te in Topa Jesu kiangah hong taam in ci-in a nget manin a taam ahi hi. Khe zawpa in zong ama hanciam zawh zah in lametna tawh ahanciam khit ciang damna a ngah ahi hi. Tua in a nget takpi manin angah na thu, thungetna ii manphatna thu ahi hi. Thu I nget ciangin zong ei lam pan I hanciam zawhzah I hanciam khit ciangin I nget te ngah pan ding cihna ahi hi. Tua ahih manin hih khutdawh ngen khelbaipa in a hanciam zawhzah in a hanciam khit ciangin Pasian damsakna angah mah bangin eite in zong I hanciam zawhzah in hanciam in, I hih theihzah in I hih khit ciangin a kisam laite Pasian in ong huh ding hi cih phawkni.