Homily By Rev. Fr. Joseph Zo Mung (April 19.2022)

Jn 20: 11-18
Christu sungah kong it nulehpa ulehnau te, tuni Lungdamna Laisiangtho sungah Maria in a tho kik Topa Jesu a upna leh amuhna tel takin I mu thei hi.
Maria in han ah pai-in Topa Jesu ki vui na a et ciangin mu lo ahih manin kap hi. A kah laitak in Topa Jesu ii lu a ki tuamna leh a khe ki tuamna ah vantungmi khat ciat mu aa, tua te in Maria kiangah kua zong na hi hiam ci-in a dot ciangin amah in ka Topa luang ki la khia hi, amah a zong ka hi hi ci-in gen hi. Tua khit ciangin a nung lam a kihei ciangin Topa Jesu mu hi. Ahi zongin Topa Jesu ahih lam thei lo-in huan cingpa sa hi. Tua pa in kua zong na hi hiam? Bang hangin kap na hi hiam ci-in a dot ciangin ka Topa hi lai mun pan kila khia hi. A ki koihna na theih leh hong gen in ci hi.
Tua banga a dot ciangin tua huan cingpa in Mary aw ci-in sam hi. Tua banga asapna aw a zak ciangin Mary in hi aw za ngei ing ci-in phawk kik in “Rabboni” Sia aw ci in dawng aa, a Topa ahih lam a theih ciangin ama nai in a khe nam dingin a ki thawi ciangin Topa Jesu in kei ka pai na ding om lai hi. Ka sanggamte kiangah pai inla va gen in ci-in sawl hi.
Hih Laisiangtho in bang hong thei sak nuam hiam cih leh eite in haksatna tuamtuam I tuak ciang, I lungkham I dah hun ciang, Topa Jesu I gei ah om thei, a tho kik Topa Jesu pen Kha tawh om a hih manin ei kiangah a tawntung in om hi. Ahi zongin eiten I mu kha kei hi. Mary in zong Topa Jesu a gei om himah ta leh tel lo hi. Ama upna ah Topa Jesu pen han sungah om ding cih a hih manin tua sungah a omloh ciangin a muh lam zong thei lo hi. Topa Jesu in Maria aw ci-in a sap ciang bekin a kha mit tawh mu thei pan hi.
Eite in zong a thokik Topa Jesu I muh theih na dingin I kha mit I hon kul hi. Eite in Topa Jesu luang pen han sung bek ah I zon khak leh mulo ding hi hang. I Kha mit tawh I zon tak ciangin bek in I mu ding hi. Amah pen I sanggamte sungah zong om thei, I innkuan pih te, I nasep pihte sungah zong om thei hi. Gentheih haksatna I tuak ciangin I gei ah zong om thei hi. Ahi zongin amah I zong kei aa, a aw I zak kei leh Maria in huan cingpa a sak bangin eite in zong I sa kha ding hi. A diakdiak in mizawngte sungah om thei hi. Mi cimawhte kiangah zong na om thei hi.
Tua ahih manin hih a thokik Topa Jesu I muh na dingin bangin hong khaktan hiam. I muh nei kei leh I Kha mitte hongin I muh theih na dingin zong ni. Eite khat ciatin a thokik Topa Jesu tawh anuamsa, a lungnuam, Topa Jesu tung pan I ngah lungdamna te midangte tungah a hawmsawn zo te I suahzawh nangin hanciam ni.