Homily by Rev. Fr. Joseph Zo Mung. Advent Nipini, (Nov 27.2022)

Lungdamna Laisiangtho (Matthew 24: 37 - 44) tung tawnin Rev. Fr. Joseph Zo Mung tung pan Kha-an vakna.
Christu sungah kong it ulehnau te, tuni pen Adventu nipi masa ni ahi hi. Ih pawlpi adingin biakpiakna kum sungah kum akipat ni ahi hi. Adventu cih kammal ii a khiatna in kiginkholhna, ngakna cih khiatna nei hi. Topa Jesu hong pai ding kiginkholhna hi. Topa Jesu bawngan kuang sungah a hong pai nading ih muak nang kiginkholhna leh anihvei hong pai kik na I dawn nading in ki ginkholhna ci-in pawlpi in nam nihin I ki ginkholh dingin hong deih hi.
Tua khit ciangin ih pawlpi in ki ginkholhna dingin nipi kaal li sung hun hong pia hi. Adventu paak kual zong ki bawl aa, tua in mong nei lo Pasian hong itna cih leh kipatna leh tawpna nei lo, Topa Jesu in hun khempeuh uk hi cih lim lahna in lo hing (a eng) tawh kibawl hi. Tua a eng mel/ lo hing in nuntakna hong lahna ahi hi.
Tua paak kual tungah khuaimeivak tawn li ki koih hi. Tua in nipi li cih limlahna hi-in nipi li khit ciangin a laizang ah khat ki koih ding a, tua pen Christmas ni, Topa Jesu hong suahni ciangin ki vak ding hi. Khuaimeivak masa pen in bang khiatna nei hiam cih leh lametna (Hope) kici in (Prophetcy candle) kamsangte genkholhna khuaimeivak cih khiatna nei hi. Anihna khuaimeivak in itna ahihkeileh upna, Topa Jesu pen Tonu Maria sung pan hong suahna phawkna hi-in (Bethlehem candle) kici hi.
A thumna ciangin lungnopna/ lungdamna nipi (Joy) ci-in ki ciamteh hi. Tua khuaimeivak pen Sherphet candle ci-in tuu cing te ii lungdamna phawkna in a kivak ahi hi. A li na pen (Peace) ci-in, nopsakna, kilemna nipi ni-in kiciamteh in tua khuaimeivak pen vantungmi te, misiangtho te I lungdamna, nopsakna tawh a kivak khuaimei ci-in Angels candle ci-in ki ciamteh hi. Tua nipi kaal li khit ciangin Topa Jesu hong suakin peace on earth ci-in leitungah kilemna om hi cih lahna in Topa Jesu in leitungah kilemna puak dingin hong pai ahih manin tua nipini pen kilemna, nopsakna nipi ci-in kiciamteh hi. Tua ahih manin Adventu paakkual tawh kisai thu ih phawk ding hong deihsak ing.