Homily by Rev. Fr. Joseph Zo Mung (18.5.2022)

Jn 15: 1-8
Christu sungah kong it thuzui ulehnau te, tuni Lungdamna Laisiangtho sungah Topa Jesu in amah tawh kizop zia nakpi takin hong gen hi. Kei mah in Lenggah gui ka hi hi, ka Pa in lenggah lo neipa ahi hi ci hi. Tua khit teh kei sungah om un ci-in amah tawh kizop nading zong gen hi. Tua khit teh amah tawh a kizom lo, lenggui tawh a ki zom lo ahiang khempeuh ki sattan ding hi ci hi. Tua bek thamlo in mi khat peuhin kei sungah om a, ama sungah kei ka om leh tua mi in gah tampi a gah ding hi ci hi.
Hi lai mun ah bang phawk ding I hi hiam cih leh Topa Jesu in bang hangin amah tawh ki pumkhat ding thu gen hiam? Topa Jesu hun lai in Judah mitampi in Pasian um in Topa Jesu umlo uh hi. Tua ahih manin Pasian a um veve, Topa Jesu tawh a kipawl lo mi tampi om hi. Tua te adingin koi man, koi khial cih teel ding haksa hi. Tua ahih manin Topa Jesu in lenggah gui tawh hong genteh hi.
Van ahoih khat a om nak leh a hoihlo zong om hi. Tua ahih manin a hoih leh a hoihlo a kikhen tel theih na dingin lenggah, a gui tawh a kizop kei leh a man hilo hi cih Topa Jesu in hong gentehna hi. Tua ahih manin Pawlpi sungah zong en lehang Topa Jesu in Pawlpi khat bek hong phuan himah taleh Topa Jesu pawlpi ka hi ci-in lei tungah pawlpi tampi hong ki behlaplap hi.
Nungzuipi te pan hong ki zom, Catholic siangtho Pawlpi ka um hi ci-in Upna thu bul (Credo) sungah Christian masa te khempeuh in na ci-in, tu in zong Christian fellowship a ki bawl nak leh Christian min pua khempeuh in zong tua kammal mah na zang hi. Ahi zongin ih up dan, I zuih dan, I biak dan ki bang nawnlo hi. Bang hangin ki lamdang hiam cih leh lenggui tawh a kizom leh a ki zomlo a om man ahi hi. Tua ahih manin a sit leh a tuh a piang pen lamdang lo hi.
Nidanglai in Siampi a ki ci pen Lawki Siampi te leh Catholic Siampi te bek om in ahi zongin tu in Catholic Siampi ka hi a cih tektek loh hang Phungyi, Siampi tampi tak om ta hi. Nidanglai in Puantual a silh pen Catholic Siampite bek hi-in, tu in a tuh tampi hong piang ta hi.
Gentehna in Catholic Siampite in khualzitna ah a zat tangzang dingin Roman Catholic Church tawh ki zom ahih manin Roman collar ci-in min kivawhin tua te ki zang aa, ahi zongin tu in Siampi ahilo mi tampi takin zong tua bangin zangin a sit leh a tuh khen nading haksa hi.
Nidanglai in Topa Jesu in hi-in ka si hi ka sa hi ci-in bangzah ta in gen ta leh a um lo mi tampi om in, ahi zongin tu in a um tampi hong om aa, hong ki behlap in a um khempeuh in a sit ngah zo lo ahih manin a sit a zang leh a tuh a zang zong mitampi hong om ta hi.
Tua ahih manin hi te en lehang, nidangin misi sa te ading thu ngetsakna ahi zongin, han ah hawha thu ngen ding ahi zongin, mawh sutna cih te Catholic Pawlpi bekin zang himah taleh tu in Christian dang tuamtuam te in zong hong thei in amongdawn a sit leh a tuh hong om ta hi. Tuni Lungdamna Laisiangtho in tua te hong genkhol ahi hi. Tua ahih manin na khempeuh a sit leh a tuh om aa, a sit a om manin a tuh hong piang hi cih pen ki khial lo hi. Ahi zongin asit pen a tuh tawh ki bang ngeilo hi.
Tuni Topa Jesu in kei sungah nang na om aa, nang sungah kei ka om a cihna in a sit tawh kizop ding a deihna hi. Kei tawh a ki zomlo hiang te ki sattan ding hi ci hi. Tua ahih manin eite in I upna sungah Topa Jesu tawh I kizom takpi hiam, ka Pawlpi in Topa Jesu tawh a ki zom takpi hiam, Topa Jesu deih danin ka zui hiam, Topa Jesu hong hilh danin ka zui hiam cih ngaihsun in ki sit tel in Topa Jesu deihna bangin I gamtat zawh nang hanciam ni.