Homily By Rev. Fr. John Mang (March 23.2022,Wed)

Mt 5: 17-19
Pasian thu, ngeinakipte zuihna leh a thupiakte zuihna in gam, gamh luah nading ahi hi.
Tuni Lai Siangtho masa (Thu 4: 1,5-9) sungah Pasian in Israel mite Pupi ahi Abraham tungah gam leh gamh luah sak dingin na kiciam hi. Tua gam leh gamh luah theih na dingin Moses tungtawn in thukham, thukhunte na pia leuleu aa, thu piakna nam (10) ahihkeileh thukham nam (10) ahi hi.
Tua thupiakna te zuihna in kamciamna gam ngah ding, gamh luah ding bek thamlo in, minam dangdangte sang pil zaw ding, ciim zaw ding, siam zaw ding, minthanna ngah ding hi cih thu ahi hi. Khat veivei pawlkhat ten Pasian thukham zuihna in ahaihuai dana angaihsun zong pawl khat om thei ding hi. Pasian thukham a zui te hai thei se ee ci-in a nuih sansan zong pawlkhat om thei ding hi. Ahi zongin Lai Siangtho sungah Pasian thukhamte zuihna in pilna, ciimna, gamhluahza ngah na ding hi cih Lai Siangtho masa sungah I mu thei hi.
Tua ahih manin hi thupiakna te mangngilh ngeilo ding, ciamteh den ding, nuntakpih ding banah akhang akhangin hilh sawnsawn ding cih Pasian thu vaikhakna I deihna ahi hi.
Tuni Lungdamna Lai Siangtho (Mt 5: 17-19) sungah Topa Jesu in thukhamte leh kamsangte thu hilhna a beisak, a susia dinga hong pai hi keng, a kicing sak ding hi ing cih na gen hi. Khat vei lai-in Lai Siangtho siam a kisa mahmah, thei a kisa mahmah, pil a kisa mahmah mi khat om hi. Lai Siangtho simsim in, a deihloh teng phiatin, a sawtna the lamdang kei ee, ka deihlohna teng at khia ning, balkek ning ci-in a bawlbawl leh a tawpna ah Lai Siangtho laimalte bei-in a bu hawm bek cianlai hi na ci hi.
Topa’n a kammal te, a thukhamte malkhat zong pellem dingin deihlo hi. Tua ahih manin Lai Siangtho kammal ei deih teng la, deihloh teng lakhia, khel suk khel to cih om thei lo hi. Nang leh kei deih thu, deihloh leh deih thu hong ki dong hilo hi. Thu ciamlui pan thu ciam thak, Lai Siangtho lui pan Lai Siangtho thak ah thukhamte, thu hilhna te, biakna ngeina kip te cik mah hunin ki khel ngeilo hi. Bang hang hiam cih leh Pasian zong zanni, tuni, zing ciang, thai ciang a kikhel ngeilo Pasian hi, ciampel ngeilo Pasian hi, a nungta tawntung Pasian hi.
“Sepkhiatna in kampau sangin muibun zaw hi.” I zak thu, I muh thu, I up thu, Topa kammal leh a ngeina te genkhiatna bek hilo, sepkhiatna, nuntakpihna tawh ama kamciamna gam, gamh a luah zo dinga a kisa, nang leh kei nasemte Pasian tanu tapa te I suahzawh na dingin hanciam ciat ni. A za, a ngai mimal kim khat ciat I biak Topa Pasian in thupha hong pia kimciat ta hen.