Homily By Rev. Fr. John Mang (March 16.2022, Wed)

Mt 20: 17-28
Pan mun lakna in tutna hi aa, tutna in za/ thuneihna hi. Thuneihna in makai suahna, lutang hi aa, makai in nasem, sila, tanu tangzang cihna hi.
Tuni I zak Lungdamna Lai Siangtho sungah Topa Jesu in nungzuipi (12) tawh Jerusalem khuapi manawhin va kuan uh hi. Mihing tapa in gimna, thahna, bawlsiatna te thuak ding hi ci-in nungzuipi tungah theisak khol, genkhol hi.
Tua te kawmkal ah Jebedee tapa te ahi, James leh John in a Nu tawh Topa kiangah hong nai uh aa, min leh za hong gen uh hi. Ziat leh vei ah panmun, tutna, za hong ngen uh hi. Hi thu adang nungzui (10) te in a theih uh ciangin lungkimlo uh hi. Topa Jesu in bang gen hiam cih leh note lak ah panmun, za, thuneihna, tutna nangahnop uh leh adang khempeuh te nasem, sawltak suak masa ding hi ci-in nungzuipi te na hilh cian hi.
Tu khanghun ciangin gamsung ki-ukna, ki makaihna ah ukpi, kumpi kideih nawnlo hi. Makaipi, gam makai pi, gam uk kumpi bek ki deih ta hi. Gammi, gamta te zawhthawh bawlin amau neihsa te laksak, guksak, suksiatsak, haltumsak bek thamloin mithat kumpi koi mun koi mun ah kuamah in deih nawnlo hi. Ki mudah hi. Zong a kihtak huai mahmah ahi hi.
Gammi, gamta te a it, a hehpih, a panpih, a makaih, gimna tawlna a thuak, nasem taktak Kumpi makai te kideih hi. Tua te ki lamen hi. Tua te kipakta hi. Tua dan nasem ding te ki lunggulh mahmah hi. Tuni I gam I lei ah makaipi te, biakna ukna sungah Pasian nasem te, I minam sungah panmun nei te, ki pawlna tuamtuam ah thunei te, innkuan sung, beh sung, phung sungah lutanga a om te, panlakna, munlakna, tutmun ngahna te in leitung min leh za, gual tung tuang nading, ang sung ding, aituam ding hi peuhmahlo hi.
Thuneihna, za neihna in zong tangpi tangta, gammi te adingin makai hoih, a citak sawltak, tanu thusa suahna tawh panmun lakna, mapang khopna hizaw ta hen. I pu I pa ten Simbeng zong kimcitciat tangzang kiguan kici hi. I gam I lei ah, Pawlpi sungah apil asiam khangthak mi tampitak om kha ding hi. Tua te sung panin nang leh kei liangko ah tutmun, khawlmun, panmun, thuneihna te ong kisot ciang a tangzang ding, mi tampi phattuam na dingin na asem ding tanu tapa te hihang cih tuni I phawk ding I deih mahmah hi.
Tua ahih manin I biak tung Sian Mang in I gam I lei ah kiphatsakna, kiliatsakna te hang, min leh za te, thuneihna te kisaktheihpih in gal ki do na, sal kisuahsakna te khempeuh vengsak henla, mihing, ganhing, singkung, lopa, leitang mahmah hong cidam kik sak ta hen. A telsiam ding leh a nuntakpih dingin Topa’n mimal kim khatciat thupha hong pia kimciat ta hen. Amen.