Homily By Rev. Fr. Dominic Langh (March 13.2022,Sun)

Lk 9: 28-36
Azahtak huai, Christu sungah kong it nulehpa, ulehnau te, tuni I sim Lungdamna Lai Siangtho sungah Topa Jesu in mual tungah kahto in a Pa’ vangliatna tawh kidim in a mel pen meii sangin tang zaw hi ci hi. Tua lai ah apaipih nungzuipi thum te pen Topa Jesu in pawlpi tangin a paipih hi ci hi. Tua laitak in a nungzui dang te pen Topa Jesu ii vangliatna mukha lo hi mah taleh amau om na ah Pasian na sem in om uh hi ci hi.
Topa Jesu vangliatna tawh a mel a kilamdatna thu bang hangin tuni sim I hi hiam cih leh nungzuipi te adingin Topa Jesu pen a siapi, a Makai pi uh ahih manin muang citakin muang uh aa, Topa Jesu in gimna thuakin, sihna thuak ding cih a gen ciangin amaute in sang zo lo uh hi. Amaute in Topa Jesu tungah upna, muanna lianpi nei uh aa, bang mah gentheih haksatna thuak kha lo ding cih muangna nei ahih man un Topa Jesu in gimna, thatna thuak ding a cih teh um zo lo ahih manin Topa Jesu in ama ii Mesiah ahihna leh ong pai na hang a tel theih na dingun, mual tungah paipih in vangliatna, minthanna a lak ahi hi.
Tua vangliatna, minthana, Moses leh Elijah te tawh a om khopna ahi eite ii lungnopna, kha muanna pen Topa Jesu in Calvary mual tungah a thuak ding te a gen kholhna hi. Calvary mual tungah ama taklam leh veilam ah guta nih ki khai aa, tua in ama hun a cinna, vangliatna, minthanna tawh a thawhkik nading hun a lahkholhna hi. Tua bangin mual tungah Topa Jesu a mel a ki lamdang laitak in Moses leh Elijah kilang hi. Tua ahih manin Peter in Topa aw, hi lai ah om nuam mahmah hi. Tua ahih manin nang ading inn khat, Moses ading inn khat, Elijah ading inn khat lam ni-in hi lai ah om ni ci-in Topa Jesu kiangah gen hi. Ahi zongin Topa Jesu in na thukimpih lo hi.
Bang hang hiam cih leh hi mual tunga amuh Topa Jesu ii vangliatna in nikhat ni ciangin sihna pan thokik aa, vantunggam ah kah to ding cih tua vangliatna a muhsak kholhna hi aa, tua ma in Topa Jesu in mite bawlsiatna thuak ding, sihna thuak ding cih te limtakin tel sak nuam hi.
Tulaitak in I gam sungah gentheih haksatna a thuak mi tampi tak ki om aa, gal tai mi tampi tak ki om hi. Hi banga lungkham buaina, gentheih haksatna te tawh I kidim laitakin I Topa Jesu ii hong kepna, hong huaina, ama khut sung a muanhuaina te a thakin phawk kik in I Topa kiang I zuat kik ding nakpi takin thupi hi.
Tuni I sim Lungdamna Lai Siangtho sungah Topa Jesu ii vangliatna te a muh ciangin nungzuipi te lungdam lua, lungkim lua in hi lai ah inn lam in om ni a cih mah bangin Topa vangliatna sungah nungta in, Topa vangliatna sungah lungdam takpi aa, Topa tawh a om khawm takpi te I hih nang hanciam ni.
Tulaitak gal lauhuaina hangin cihmawh, gentheihna a thuak mi tampite lak ah lungsim picingna tawh Pasian a phatkha, a bia kha, a ki khawm kha te mi hampha hi hang. I hun mawk beisak kei ni. Vua hun sungah I pawlpi in hong hilhna a om mah bangin nidang sangin thungen zaw ding, nidang sangin pumpi kidekna, annek tuidawn ki dekna te nei ding, antang, sa tang ni hun ah tang ding, tua khit the nidang sangin thupha bawl ding, cik piakna te bawl ding, I kiim I paam a a kisam mite tungah huhna te bawl ding ci-in I pawlpi in Vua hun sunga I kalsuan zia ding ci-in pawlpi ong gen mah bangin hi kalsuan zia ding tawh kalsuan leng hi thupha te a dim taka angah ding te hi hang.
Nungzuipi te in meii leh vuk sanga a tangzaw, a ngo zaw Topa vangliatna a muh teh lungkim lungdam in kipak mahmah uh aa, tua mah bangin Topa vangliatna te sungah a lungkim a lungdam te I hih ding thupi hi. Tua banah Topa vangliatna amukha lo nungzuipi te in amau om na ah acimawh, a zawngkhal te huhin buai mahmah uh hi. Topa ong ompihna, ong itna hanga lungdamna tawh I nuntaka I kalsuan leh tuni in I nasepna, I kalsuan na te ah Topa thupha in hong ompih ding hi.
Leitung na te, nikten puansilhte, nek leh dawn te leh a lungkham huai, a dah huai thu te bekbek ngaihsut in I neih leh I lungnop hun ding om ngei lo hi. Hi gentheih haksatna te kawmkal ah I Topa Jesu vangliatna om den hi. Tuni I ngah kei zongin zingciang ngah ding hi hang. I Topa vangliatna angah kha te, a mu kha te, a thupha a sang kha te lungdam in kipak hi.