Homily By Rev. Fr. David Lian (March 14.2022, Mon)

Lk 6: 36-38
Christu sungah kong it nulehpa, ulehnau te, tu laitakin I gam sungah gal leh sa hang hitaleh, natna satna hang hitaleh lungkhamna tampi om mah tase leh I nuntakna ah Pasian mangngilh lo a, Pasian tungah I ki ngak zawh nang tha ki pia nuam hang.
Tuni Lai Siangtho masa lungngai lehang, Pasian cihtakna, Pasian thumanna leh mihingte’ ginatlohna, mihingte ki ciatlohna, Pasian thu zui lo a, Pasian kiang pan lam pialna te I mu hi. Pasian pen citak in, a mite it in, a mite a hehpih thei Pasian ahih na I mu hi. Pasian in amah a it te hehpih in thupha pia hi. Tua ahih manin eite zong Pasian it aa, ama thu I zuih leh ama thupha a sang ding te I hi hi. (Jn 14: 15) na ah “Kei hong it te in ka thukham zui ding hi” ci hi. Tua ahih manin eite khempeuh citak in ama sungah a nungta I hih ding thupi hi. Eite in tuni, Pasian kiang zuan in, I mawhna khempeuh Pasian kiang pulak khia in, kiniamkhiatna tawh Pasian kiang zuan ciat ni.
Lungdamna Lai Siangtho sungah “No te’ Pa in hehpihna a neih mah bangin note in zong hehpihna nei un. Mi it thei un” ci-in I mu hi. Pasian in eite hong it hi. Hong hehpih hi. Tua ahih manin eite zong khat leh khat I ki-it ding ahi hi. Tu laitak in lei tungah Russia leh Ukraine gal ki do na te I za hi. Bang hangin hi bang hoih lohna te piang hiam? Khat leh khat ki-it theih lohna, khat leh khat mawh ki mai sak theih lohna, khat leh khat hehpihna I neih lohna hang ahi hi.
Kawlgam sungah bang hangin hoih lohna te piang, siatna tuam tuam te piang hiam? Khat leh khat ki-it taktak zawh lohna hang, khat leh khat mawh ki maisak zawhlohna hang ahi hi. Eite in itna man a nei Pasian tungah thungen in, amah banga itna man I neih zawh nang nisim I hanciam ding ahi hi.
Misiangtho Mother Theresa in bang ci hiam cih leh “I gei a om, I ki nai pih penpen te I itna, I hehpih theihna in itna kipatna hi. I gei a om te kua te hiam? I innkuanpih te, I naseppih te, tua te tungah itna I neih masak nak leh tua pan it na hong kipan hi” ci hi. Leitung I uk nang, leitung I zawh nading in eite in galvan te, thautang te zanglo in itna, hehpihna te zang ni ci-in hong gen hi. Tua ahih manin eite in leitung I uk nop leh leitung mite I makaih nop leh itna man tawh I uk ding, deihsakna, hehpihna tawh I makaih ding thupi hi.
Misiangtho John Paul II in “kiphatsak nading, aituam lungsim ding mun omsak kei ni. Lau nading mun omsak kei ni. Ahi zongin itna in piakkhiatna te ong nget ciang tua te lau lo-in I piakkhiatna tawh nasem ni” ci hi. Tua ahih manin eite in itna hangin piakkhiatna, supna, baina te zong lau lo-in, hangsan takin a sem ngam, a piakhia ngam te I hih ding thupi hi.
Tua ahih manin eite khempeuh in Pasian in eite hong it bangin amah it in, eite khat leh khat I ki-it siam ding a thupi penpen ahi hi. Pa Pasian in eite hong it in, I sih tawntung ding deihlo in, ong hotkhiat na dingin ama tapa Topa Jesu hi leitung ah hong pai sakin ong honkhia hi. (Jn 3: 16) na ah “Pasian in hi leitung it mahmah ahih manin mawh nei mite a honkhia dingin a tapa hong sawl hi” ci-in I mu hi.
Tua bek thamlo in (1Jn 4: 19) na ah “Eite khat leh khat ki-it ni. Bang hang hiam cih leh Pasian in eite hong it masa hi” ci-in I mu thei hi. Tua ahih manin eite in Pasian it in, midangte it in hilehang, I innkuan, I veng I paam, I gam sung, leitungah ki-itna, kilemna, hehpihna mante hong om ding hi. Tua ahih manin ei nuntakna khempeuh ah ei mihing te Pasian tungah cihtak lohna, thanemna I neih hang, a citak tawntung Pasian, amah it in beel in, itna deihsakna tawh mite a makaih, na hoih napha asem zo semsem, thupha abawl zo semsem te I hih zawh na dingin hanciam ciat ni.