Homily By Rev. Fr. Davic Lian (March 7.2022, Mon)

Mt 25: 31-46 Christu sungah Kong it thuzui ulehnau, NulehPa te Topa Jesu in ei mihing te pen an bek tawh nungta hi lo-in, Pasian kam pan ong luangkhia Pasian thu tawh a nungta I hihna ong gen mah bangin eite khempeuh Pasian thu tawh a nungta Pasian tanu tapa te I hih zawh na dingin Pasian kammal tawh tha I kipia nuam hi. Tuni Lai Siangtho masa Siampite Lai Siangtho sungah Pasian in ei mihingte khempeuh a siangtho dingin hong deih hi. Pasian in eite khempeuh a siangtho dingin hong sam hi. Eite khempeuh a siangtho dingin ong deih hi. Bang hang hiam cih leh amah zong siangtho hi. Siangthona I cih ciangin I lungsim siangtho na, I pumpi siangtho na, I Kha siangtho na cih bangin ki mu thei hi. I lungsim siangtho leh lungdam aa, I kha siangtho leh I kha dam hi. Tua ahih manin nuntakna I ngah na dingin zong kha dam ding kisam hi. Kha siangtho ding kisam hi. Tua ahih manin eite nuntakna sungah siangtho lohna hangin natna tuamtuam te hong piangin, khat leh khat kilem lohna te hong piang hi cih I mu thei hi. Tu laitak in zong I siangtho lohna hangin ki muhdahna, ki hazatna te hong piang hi. I gam sungah siangtho lohna hangin gal kido na te hong piang hi. Tua ahih manin I lungsim, I kha, I innkuan sung a siangtho nangin I hanciam ding thupi mahmah hi. Siangtho na dingin mawhna pan ki dawm aa, Pasian thu tawh ki tuakin I nuntak leh a siangtho te suak ding hang. Vantung gam ah I lut theih nading mawhna pan siangtho na I neih ding kisam hi. Topa Jesu in mawhsutna Sacramentu ong bawlsak ahih manin ei Catholic Pawlpi te I hamphatna pen mawhna pan siangtho thei, I thupha ngahna lampi ahi hi. Tua ahih manin eite khempeuh in adiak diak in hih Vua hun sungin mawhna pan kisikkik in, Pasian kiang zuan in siangtho na tawh I nuntak zawh na ding leh thu hoih thupha, na hoih na pha mite tungah a sem zo te I hih zawh nang hanciam ding hi hang. Lungdamna Lai Siangtho sungah mihing tapa pen vangliatna minthanna tawh mihing khempeuh thu khen dingin hong pai ding hi. Eite khempeuh pen tuu leh keel bangin hong khen ding hi ci-in I mu thei hi. Eite in mi khat peuh I huh ciangin Topa Jesu a huh I hih lam I ki phawk ding kisam hi. Tu laitakin itna gilkial, ki lemna a daangtak mi tampi om hi. Eite in itna an te, mawh kimai sakna tui te mite tungah a piakhia zo, huhna apia zo, itna te ahawmkhia zo aa, Topa Jesu ahuh zo, apanpih zo te I hih zawh nang hanciam ni. Naupangno khat tungah I bawl thupha pen Pasian tungah a bawl I hih mah bangin na hoihlo khat I bawl leh zong pen Topa Jesu tungah a ginalo, ahoihlo a bawl I hih lam ki phawkin eite khempeuh in ahoih agamta, ahoih a sem zo te I hih nang han ciamni. I sep ding kilawm te, sep khakloh mawhna te kidawm in, sep ding akilawm te sem ngam aa, gen ngam aa, mite phat tuam nading a sem zo te I hih ding leh, eite khat leh khat ki-it in, mawhna thanemna, a hoih lo na te ki dawm aa, Pasian tanu tapa hoih te, ama deihna banga a siangtho te I hih zawh na dingin han ciam ciatni.