Homily By Cate. Michael Kang Lian (April 5.2022)

Jn 8: 21-30
Christu sungah kong it thuzui ute naute, tu laitak in thu lamdang tam mahmah ahi zongin I nuntakna te Topa kiangah nisim I ap ding kisam hi.
Tuni Lungdamna Laisiangtho sungah Topa Jesu in Jew ulian te kiangah kei om na ah nong pai thei kei ding uh hi, kei nong zong ding uh aa nong mu kei ding uh hi, na mawhna hang un na si ding uh hi a cih ciangin amaute in lamdang sa mahmah uh hi. Topa Jesu in note nuai lam mi na hi uh aa, kei pen tung lam mi ka hi hi ci hi. Kei in kei thu tawh nasem lo-in, vantunga om ka Pa thu tawh na sem in, ka Pa hong gen te bek a gen ka hi hi ci-in a hilh cian tak ciangin mi tampi in Jesu um uh hi ci-in tuni Laisiangtho sungah I mu hi.
Topa Jesu in kei deihna bangin na asem ka hi kei aa, ka Pa deihna bangin a sem ka hi hi a cih mah bangin ei Christian te in, Pasian nasemte hitaleh ei deihna sangin Pa Pasian deihna bangin na I sep leh Pasian in hong ompih tawntung ding hi cih tuni Laisiangtho sungah I mu hi.
Tua ahih manin Pasian deihna bangin I sepna tawh eite in mi tampi tak te tawntung nuntakna ah a tunzo te I suah zawh na dingin, mi tampi takte Topa tuu huang sungah a lutsak zo dingin mimal khat kim ciat I biak Topa Pasian thupha hong pia kim ciat tahen.