Homily By Cate. Joseph Hau Kap (March 10.2022,Thur)

Mt 7: 7 – 12
Tuni Lungdamna Lai Siangtho in thu I nget ding a kisapna leh na amawk in a kingah lohna hong thei sak hi. Na khat peuh peuh I ki sap ciangin mi ong huh ding bek ngak lo zaw in ei lam pan I nget theih ding a kisapna thu Topa Jesu in hong thei sak nuam hi.
Zong un, na mu ding uh hi ci hi. Na khat peuh peuh zong lo pi in ki mu thei lo hi. I nuntakna ding, I silh I ten ding I zon mah bangin I kha ading, Pasian Kha Siangtho hehpihna ngen ding, tua teh tua thuman nuntakna lampi man zong ding, Topa Jesu kiang hong tun ding lampi I zon ding kisam hi.
Kiu un hong ki hon ding hi cih ciangin I zong ding na khat peuh peuh ahi zongin, I nget ding na khat peuh peuh ahi zongin I muh theih na dingin kiu leng ong hon ding hi cih lunggulhna, ngaihsutna tawh tua I nget ding, I ngah ding thupha khat peuhpeuh I ngah na dingin kong kiu leng ong hon ding hi cih lametna tawh I kiuh na dingin hong thei sak nuam hi.
A ngen mi peuhmah ki pia dinga, a zong mi peuhmah in mu ding hi ci hi. Tua ahih manin Pasian hong piak ding thupha ahi, leitung thupha leh thuman thutak nuntakna pen I phawk theih na dingin Pasian kiangah nget ding, Kha Siangtho khuavak, nuntakna thuman thutak I theih theih na dingin I nget ding kisam hi.
A zong ten mu ding cih ciangin I upna bek ah lungkim ding hilo in kei om na, ka pawlpi, ka pilna zon dan ahi zongin ki ngaihsun in tua pan in thuman thutak I zon ding thupi hi. Thuman thutak zong lo-in I hihna bangbang in I om leh mi picing zong ki hi thei lo hi.
Tate in moh ngen leh suaktum a pia om lo aa, ngasa ngen leh gul a pia a om loh mah bangin Pasian in I nget nak leh ong piak ding thu hong gen hi. Tua bek thamlo in ei tungah hong ki bawl ding I ut bangin eite in zong mite tungah bawl ding cih pen thupi takin Topa Jesu in ong hanthawn hi.
Tua ahih manin hih Vua hun sungah mite in hong maitai ding lunggulh masa lo-in, mite adingin thupha bawlin, na hoih sem in, thu I ngetsak ding pen Topa’n deih hi cih phawkin pumpi kidekna, antang thungetna te leh thupha bawlna te tawh ei tungah hong ki bawl ding I deih mah bangin mite tungah zong a bawl zo ciat dingin ki hanthawn hang.