Catholic Nisim Lungdamna Laisiangtho. Zehtan Hun Nipi Kaal (5) Ni. 29.3.2023(Wed)

John 8:31-42
31. Tua khit ciangin Jesu in amah a um Jew mite’ kiangah, “Note in ka gen bangin gamta-in na zuih uh leh ka nungzui taktakte na hi ding uh hi.

32. Note in thuman thutak zong na thei ding uh a, tua thuman thutak in note hong suaktasak ding hi,” a ci hi.

33. Amaute in, “Kote in Abraham’ suan le khakte ka hi uh a, cikmah hunin kuama sila-in ka om ngei kei uh hi Bang hangin note hong suaktasak ding hi, ci na hi hiam?” ci-in amah a dong uh hi.

34. Jesu in amaute’ kiangah, “Ken a man takpi kong genin ah, ‘Mawhna a bawl khempeuhte in mawhna’ sila ahi uh hi.

35. Sila pen innkuan sung mun khat ah om tawntung lo hi; tapa ahih leh a om tawntung hi.

36. Tua ahih manin, Tapa in note hong suahtaksak leh na suakta taktak ding uh hi.

37. Note in Abraham’ suan le khakte na hih lam uh kong thei hi. Ahi zongin note in na sung uh ah ka thu lutsak zo lo na hih manun note in thah dingin kei nong zong uh hi.

38. Keimah in ka Pa’ kiang pan ka muhsate note’ tungah kong genkhia hi. Note in zong na pa uh’ kiangah na zak bangun na gamta uh hi,” a ci hi.

39. Amaute in Jesu’ kiangah, “Ka pa uh Abraham ahi hi,” a ci uh hi. Jesu in amaute’ kiangah, “Note in Abraham’ tate na hih uh leh, Abraham’ gamtat bangin na gamta ding uh hi.

40. Ahi zongin tu-in ka Pa’ kiangah ka zak bangin note’ kiangah thuman thutak hong hilhpa ahi keimah thah nong sawm uh hi. Tua bangin Abraham gamta lo hi.

41. Na pa uh’ gamtat bangin note na gamta uh hi,” a ci hi. Amaute in Jesu’ kiangah, “Kote in zawlta ka hi kei uh hi; Pasian kici Pa khat bek ka nei uh hi,” a ci uh hi.

42. Jesu in amaute’ kiangah, “Pasian in note’ Pa ahih leh, note in kei nong it ding uh hi. Bang hang hiam cih leh keimah in Pasian’ kiang pan hong pai ka hi a, tu-in hih lai-ah ka om hi. Keima ut thu-in hong pai ka hi kei a, amah in kei hong sawl ahi hi.

Hi in Topa' Lungdamna Laisiangtho ahi hi.