Catholic Nisim Lungdamna Laisiangtho. Zehtan Hun Nipi Kaal (5) Ni. 26.3.2023(Sun)

John 11:1-45
1. Tu-in Mary le a sanggamnu Martha’ teenna Bethany(a) khua ah Lazarus(b) kici mi khat cina-in a om hi.

2. Cinapa Lazarus’ sanggamnu Mary in Jesu’ khe sathau namtui nuh a, a sam tawh a nulsaknu ahi hi.

3. Tua ahih manin, a sanggam numeite in Jesu’ kiangah mi sawl uh a, “Topa aw, na itpa cina-in a om hi,” ci-in a vaikhak uh hi.

4. Ahi zongin Jesu in hih thu a zak ciangin, “Hih natna in sihna ding natna hilo hi. Pasian’ minthanna ding hi a, tua thu’ hangin Pasian’ Tapa a minthang ding hi,” a ci hi.

5. Jesu in Martha, a sanggamnu le Lazarus a it hi.

6. Ahi zongin Lazarus’ cinat thu a zak ciangin pai loin ama omna mah ah ni nih a taam lai hi.

7. Tua khit ciangin Jesu in a nungzuipite’ kiangah, “Judea gam lam ah paikik ni,” a ci hi.

8. A nungzuipite in ama kiangah, “Rabbi aw, Jew mite in tu-in suang tawh nang den dingin hong sawm lai uh ahih manin, tua lamah paikik ding na hi hiam?” a ci uh hi.

9. Jesu in, “Sun hun sung nai sawm le nai nih pha hilo ahi hiam? Sun hun laitaka lam a paite puk lo uh hi, bang hang hiam cih leh amaute in leitung’ khuavak a mu uh hi.

10. Ahi zongin zan hun laitaka lam a paite a puk uh hi, bang hang hiam cih leh amaute’ sung ah khuavak omlo hi,” a ci hi.

11. Tua bangin thu a gen khit ciangin Jesu in amaute’ kiangah, “Eite’ lawmpa Lazarus ihmu-in a om hi. Amah a phong dingin ka pai ding hi,” a ci hi.

12. A nungzuipite in, “Topa aw, amah ihmu ahih leh na dam lel ding hi,” a ci uh hi.

13. Jesu in Lazarus’ sihna thu a gen hangin a nungzuipite in a ihmu taktak a cihna a sa uh hi.

14. Tua ciangin Jesu in, “Lazarus si zo hi,

15. note in na upna dingun tua lai-ah om lo ka hih manin note’ aadingin kei ka lungdam hi. Ahi zongin ama kiangah va pai ni,” ci-in teltakin a gen hi.

16. Unau peeng cih khiatna a nei Didymus kici Thomas in a nungzui dangte’ kiangah, “Amah tawh sihna a thuak khawm dingin ei zong va zui ni,” a ci hi.

17. Jesu a tun’ ciangin Lazarus hankhuk sungah ni li om khinta cih a thei hi.

18. Tu-in Jerusalem khuapi panin Bethany khua tai nih bang a gamla hi.

19. A sanggampa’ sihna hangin Martha(c) le Mary a hehnem dingin Jew mite tampi hong pai uh hi.

20. Jesu’ hong paina thu Martha in a zak ciangin a dawn dingin a pai hi. Mary ahih leh, inn sungah tu-in a om hi.

21. Martha in Jesu’ kiangah, “Topa aw, nang a om hi lecin ka sanggampa si lo ding hi.

22. Ahi zongin tu nangawnin zong Pasian’ kiangah na nget peuhpeuh Pasian in hong pia ding, cih ka thei hi,” a ci hi.

23. Jesu in ama kiangah, “Na sanggampa a thokik ding hi,” a ci hi.

24. Martha in Jesu’ kiangah, “Ni tawp ni-a thawhkik hunah amah hong thawhkik ding ka thei hi,” a ci hi.

25. Jesu in ama kiangah, “Keimah in thawhkikna le nuntakna ka hi hi. Kei hong um mi in a sih hangin a nungta ding hi.

26. Nungta-a kei hong um mi peuhmah si ngei lo ding hi. Hih thu na um hiam?” ci-in a dong hi.

27. Amah in, “Ka um hi, Topa aw. Leitunga hong pai ding Pasian’ Tapa, Christu na hi hi, cih ka um hi,” a ci hi.

28. Martha in hih bangin a gen khit ciangin inn ah ciah a, a sanggamnu Mary’ kiangah, “Hih lai-ah Siapa hong tungta a, nang hong kan hi,” ci-in a kosim hi.

29. Mary in hih thu a zak ciangin thakhatin dingkhia a, Jesu a va dawn hi.

30. Tu-in Jesu khua sungah lut nai lo a, Martha tawh a kituahna munah a om lai hi.

31. Inn sunga Mary tawh a om, amah a hehnem Jew mite in, Mary thakhatin dingkhia-a a paikhiat a muh uh ciangin han ah pai-a a va kap ding sa-in ama nung a zui uh hi.

32. Jesu’ omna munah Mary hong tun ciangin amah mu a, a khe phungah khukdinin, “Jesu aw, nang hih lai-ah a om hi lecin ka sanggampa si lo ding hi,” a ci hi.

33. Mary le amah tawh hong paikhawm Jew mite amah tawh kap a om Jesu in a muh ciangin, a lungsim nakpitakin sukha a, a lunggim mahmah hi.

34. Jesu in, “Amah koi ah vui na hi uh hiam?” ci-in a dong hi. Amaute in ama kiangah, “Topa aw, hong pai inla, hong en in,” a ci uh hi.

35. Jesu a kap hi.

36. Tua ahih manin Jew mite in, “Amah in Lazarus bangzahtakin it ahi hiam, cih en un!” a ci uh hi.

37. Ahi zongin amaute pawlkhat in, “Mittawte khua a musak thei hih pa in hih mi zong a sih lohna dingin bawl theilo ahi hiam?” a ci uh hi.

38. Tua khit ciangin Jesu in a lungsim sungah nasa mahmah kawmin hanah a pai hi. Tua han pen suanghawm khat hi a, suangtum khat tawh kisin hi.

39. Jesu in, “Suangtum hemkhia un,” a ci hi. Misipa’ sanggamnu Martha in, “Topa aw, tu-in ahih leh, a uih ta ding hi. Bang hang hiam cih leh, a sih zawh ni li pha ta hi,” a ci hi.

40. Jesu in ama kiangah, “Kei nong up leh, Pasian’ minthanna na mu ding hi, hong ci khin hilo ka hi hiam?” a ci hi.

41. Tua ahih manin amaute in suangtum a hemkhia uh hi. Tua ciangin Jesu dakto a, “Pa aw, ka thungetna hong za na hih manin na tungah ka lungdam hi.

42. Nangmah in ka thungetna nong zak tawntungna ka thei hi. Ahi zongin nangmah in kei nong sawlna thu hih lai-a ding mite in a up theihna dingun tu-a bangin hong ngen ka hi hi,” a ci hi.

43. Hih thu a gen khit ciangin Jesu in ngaihtakin, “Lazarus aw, hong paikhia in,” ci-in a sam hi.

44. Misipa, a khut le a khete hanpuan tawh kitunin, a maitang puan khatin a kituamsa-in hong paikhia hi. Jesu in amaute’ kiangah, “Amah phelkhia unla, paisak un,” a ci hi.

45. Tua ahih manin Mary’ kianga a hawh Jew mi tampite in Jesu’ bawl na lamdang a muh uh ciangin amah a um uh hi.

Hi in Topa' Lungdamna Laisiangtho ahi hi.